Luk 18

1kɔ fɔf rə alomɔ ka aŋkarande ŋɔŋ kȧmȧ aŋ tȧrȧ kəpa aŋ yi tə kəramnɛ lɔkɔ o lɔkɔ, ɔwa kȧmȧ pə te bȧk ŋa. 2kɔ pa, Uthoŋkas ɔ la yi rə kəpet, ɔ nesa hɛ Kuru, ɔ kəli hɛ ader ra wuni. 3Ɔwa ubora ɔ yi ka kȧpet kati, kɔ kɔ kȧtkȧt ka ɔthonkas ɔwe, ɔ pa, Thonkas ȧŋpa aŋa sə ba yi ɔtheranɛ kȧmi. 4Kɛrɛ ɔ yenk hɛ selɔ. Kədarəŋ kati ɔ pa ka ȧŋmerȧ ŋɔŋ, Hali ma i te nesa Kuru-e, thalɔm i te kolo wuni-e, 5ma ɔbora ɔwe ɔ sɔmpa mi-e, i ti thonkas ȧŋpa ŋɔŋ, pəkasifɛ kȧder kɔŋ katkat kə tə lela mi. 6Ka ɔMarki ɔ pa, Təl nu ȧte ɔthoŋkas ukənə ɔ pa. 7Ɔwa Kuru mɔ thonkas hɛ aŋthith ŋɔŋ aŋa mə kulir kɔ pali gbɛs hali ɔ muyu ŋa haŋ-i? 8I kanɛ nu ɔ tə thonkas ŋa lɛmp. Kɛrɛ ma ɔWan ka wuni ɔ der-e, ɔ tə bəp kəlanɛ ka raru-i?

9kɔ fɔf aŋlomɔ aŋe ka aŋfəm aŋa lanɛ aŋ yi alompi, ɔwa aŋ sai sai afəm alɔm bɛ. 10Afəm ŋarəŋ aŋ kɔ ka ȧŋseth ŋa Kuru tə kəramnɛ. Ukin ɔ yi uFarisi, ɔlɔm-e, uthoŋkla ɛfȧk. 11ƆFaresi ɔ təmȧ ɔ ramnɛ yaŋ ka aŋyɛthɛ ŋɔŋ, Kuru i mɔmɔ mu ma i te yi mɔ afəm alɔm, i ba hɛ kansoŋ, i ba hɛ məkənə, i yɔ hɛ kərəp, hali ɔthoŋkla ɛfȧk ɔwe-e, i yi hɛ mɔ kɔnɔ. 12Ayik o yik i wop asum mȧrəŋ, i sɔŋ ɛyaka ka ɛyɛt mi bɛ. 13Kɛrɛ ɔthoŋkla ɛfȧk ɔ təmȧ ɔbɔli poŋ, ɔ selɔ hɛ tə kəlȧkthi ɛfɔr yɔŋ ka ȧriyana, ɔ nap aŋkəpət ŋɔŋ, kɔ pa, Kuru ba mi ȧney, minɛ i yi wuni ləs. 14I kanɛ nu ɔwuni ɔwe ɔ kɔ ka ȧŋseth ŋɔŋ, ɔ po sɔthɔ məmari pəthasi ɔlɔm; kotȧy-e wuni o wuni ɔwe ŋatanɛ a tə thora kɔ, kɛrɛ ɔwe thoranɛ, a tə ŋata kɔ.

15Ka aŋfəm aŋ kȧrȧ sɔ talɛnth taŋ ka Yisɔs kȧmȧ ɔ gboŋ ŋa, kɛrɛ ma aŋkarande ŋɔŋ aŋ nənk ti-e, aŋ ŋal ŋa. 16Kɛrɛ Yisɔsȧŋ ɔ tela ŋa ro ŋɔŋ, ɔ pa, Te bɛnt aŋfɛth tɔ kəder ro mi, kotȧy-e awunɔŋ ŋa ba rȧbȧy ra Kuru. 17Tɛntɛnɛ i pa ro nu, wuni o wuni ɔwe te malanɛ rȧbȧy ra Kuru mɔ wath ufɛth ɔ gbəli hɛ wɔŋ ri.

18Ɔwa urəbomp ulɔm ɔ yif kɔ, ɔ pa, Karmɔkɔ uthɔth, to mə i yɔ kȧmȧ i sɔthɔ aŋesəm thəbana-e? 19Ka Yisɔs ɔ pa ro ŋɔŋ, kɔyɛŋ mȧ mə bont mi uthɔth-e? Uthɔth ulɔm ɔ yi hɛ thambe Kuru. 20Mə tata ɛyamari, Te yɔ kərəp, te dif, te keya, te sɔŋ məseri ma rəyem, yikis ɔkas ka mu yi ɔkara ka mu. 21kɔ pa, I po wop mȧtȧy ame bɛ kȧbi ka rafɛth ra mi. 22Ɔwa ma Yisɔs ɔ təl ti-e, ɔ pa ro ŋɔŋ, Tȧy tin tȧ mə paŋ ras; thila ɛyɛt bɛ ɛyɛ mə ba, mə yerəs yi ka aŋfəm amɔnɛ, ɔwa mə tə sɔthɔ kɛŋ ro riyana. Ɔwa der, mə tȧŋ mi. 23Kɛrɛ ma ɔ təl mȧtȧy ame-e, ɔ saŋ amɔl abana, kotȧy-e uyola ubana wɔŋ. 24Ma Yisɔs ɔ nənk ȧte-e, ɔ pa, Pə tə yi ɔbaki mədɛr ta ŋaŋ aŋa ba tɛŋ təbana tə kəwɔŋ ka rȧbȧy ra Kuru! 25Ȧtesoma-e pə tha yi ɔfɔy tȧy ta ȧyɔkmɛ tə kəsɔnthɔs aŋfeŋk ŋa asɛni, pəthasi wuni yola tə kəwɔŋ ka rȧbȧy ra Kuru. 26Ɔwa ŋaŋ aŋa təl ti aŋ pa, Kanɛ mən mə gbəli kisi-e? 27Kɛrɛ kɔnɔ ɔ pa, Mȧtȧy ama thas aŋfɔsɔ ŋa afəm mə thas hɛ aŋfɔsɔ ŋa Kuru. 28Ka Pita ɔ pa, Kəla, saŋ sə po tey ɛyɛt ɛ su bɛ, sə tȧŋ mu. 29kɔ pa ro ŋaŋ, Tɛntɛnɛ i kanɛ nu kəpa, wuni ɔ yi hɛ ɔwe po tey aseth-o, urani-o, uwɔnt-o, aŋa kom kɔ-o, thalɔm awuth salata rȧbȧy ra Kuru-e, 30ɔwe mə te sɔthɔ ɔgbȧthi ka ȧŋlɔkɔ aŋe yi aŋesəm thɔbana ka ȧdȧru ara mə der.

31kɔ gbasi aŋtɔfɔt ŋarəŋ, ɔ pa ro ŋaŋ, Kəla, sə kɔ ro Yerusalɛm, ɔwa mȧtȧy bɛ ama aŋnabi aŋ gbal ta ɔWan uruni ka wuni mə tə lasər. 32kotȧy-e a tə lȧnki kɔ ka tȧbona təlɔm, ɔwa a tə sel kɔ, a tə yɔ kɔ ɔləs, a tə thufər kɔ, 33aŋ tə sȧpȧ kɔ rəkɛt, aŋ tə dif kɔ; ɔwa ka ȧŋrey aŋa bekȧ məsas ɔ tə kȧl yokanɛ. 34Kɛrɛ pə sɔk hɛ ŋa ta mȧtȧy ame; ȧŋpa aŋe aŋ maŋknɛ ŋa, aŋ sɔthnɛ hɛ ȧte ɔ pa.

35Ka pə re yi, mɔ mɔ fat ro Yɛriko-e, wuni fith ulɔm ɔ yirȧ ro roŋ rayɛr, ɔ tə thola. 36Ɔwa ma ɔ təlȧ ȧruniya ara thas-e, ɔ yif aŋkolo ŋati. 37kaŋ kanɛ kɔ kəpa Yisɔs ɔwe ro Nasarɛth-e, kɔnɔ mə thas. 38kɔ sel ɛrɔŋ, ɔ pa, Yisɔs, munɔ wan ka Debid, ba mi ȧney. 39Aŋfəm aŋa təmȧ rodi aŋ ŋal kɔ kȧmȧ ɔ taŋk, kɛrɛ ɔ bȧr gbo sel ɛrɔŋ, Munɔ wan ka Debid, ba mi ȧney. 40Ka Yisɔsȧŋ ɔ təmȧ, ɔ yamari kȧmȧ a kȧrȧ kɔ ro ŋɔŋ. Ɔwa ma ɔ po fat-e, ɔ yif kɔ, 41Ko mə yema i yɔna mu-e? Ɔ pa, Pa, kȧmȧ i sɔthɔ kakəli kȧmi. 42Ka Yisɔsȧŋ ɔ pa ro ŋɔŋ, Sɔthɔ kakəli ka mu. Kȧlanɛ ka mu kə po mu yenkəs. 43Ka ɔlɛmp wati ɔ sɔthɔ kakəli kɔŋ, kɔ tȧŋ kɔ rə kəthɔkəs Kurɔŋ; ɔwa aŋfəm bɛ maŋ nənk ti-e, aŋ yikis Kuru.

Currently Selected:

Luk 18: TMNNT

Highlight

Copy