Luk 2
2
1Ka pə re yi ka mȧrey mati Sisar Akɔstɔs-əŋ ɔ tam kəpa a ba tə kəgbal ames ma aŋfəm ka ȧdȧru bɛ. 2Kagbal ames ma aŋfəm ake kə yi kətɔtɔkɔ bɛ ka kasara ka Siriniyɔs ro Siriya. 3Ɔwa wuni o wuni ɔ kɔnɛ ka kȧpet kɔŋ, kȧmȧ a gbal ȧŋes ŋɔŋ. 4Yosɛfȧŋ sɔ ɔ wur ro Nasarɛth ka ȧŋthɔf ŋa ro Kalili, ɔ kɔ ro Yudiya ka kȧpet ka Debid ȧke a bont Bɛthlihɛm, ȧtesoma-e ɔ yi ka ȧŋseth yi ȧŋbɔnshɔ ŋa Debid, 5kȧmȧ a gbal ȧŋes ŋɔŋ yi Meri ɔwe ɔ fath; ɔwa ɔ ba kor kəbaki. 6Kɛrɛ maŋ yi ri-e, mȧrey ma Meri mə lasər ta kȧkom kɔŋ. 7Ɔwa ɔ kom ɔwan kɔŋ utɔtɔkɔ uruni, kɔ rapər kɔ totha təbɔli, ɔ bot kɔ dɛr ro mə a bot ɛdi ya ɛsɛm, ma aseth ayiyanɛ alɔm aŋ te sɔ yi ta ȧtȧ ŋaŋ-e.
8Ka afəm atɔl təlɔmɛ aŋ yi ka ȧŋthɔf ŋati, aŋ bȧkər ro lal tə kəbumər akuthi ka ŋaŋ tȧtȧk. 9Ɔwa ɔmaleka ka Kuru ɔ wurər ŋa pus, ka aŋyiki ŋa Kuru aŋ gbɛnthar ŋa, kaŋ nesa. 10Ka ɔmaleka ɔ pa ro ŋaŋ, Te nu nesa, ȧtesoma-e i kȧrȧ nu kɛra kəfinɔ ka məbɔnɛ məbana, ama mə yi ta afəm bɛ. 11kotȧy-e a po koma nu thonɔŋ ka kȧpet ka Debid uKisis ɔwe yi Krayst ɔMarki. 12Ɔwa aŋe aŋ tə yi alomar ro rɔnu; nə tə bəp kalɛnth a rapər kɔ totha təbɔli, ɔ fənthȧ dɛr ro mə a bot ɛdi ya ɛsɛm. 13Ka ɔlɛmp wati runiya ra aŋyama ŋa ro riyana rə yi yi ɔmaleka, rə thɔkəs Kuru, rə pa,
14Ta Kuru ɔwe yi rokɔm ɔ ba ayiki,
Ta məthɔfəl mə yi nɔru ka aŋfəm aŋa mə thesis kɔ.
15Ma aŋmȧleka aŋ wur ro ŋaŋ aŋ kȧlanɛ ro riana-e, aŋtɔl ɛsɛm aŋ pa kətɔŋ ka ŋaŋ, Maŋ kɔ nu ro Bɛthlihɛm kȧmȧ sə nənk ȧtȧy ȧte ȧtȧ po yɔnɛ, ȧte ɔMarki ɔ po tɔri su. 16kaŋ kɔnɛ ri yi kəgbukɛ, aŋ bəp Merɛŋ yi Yosɛf-əŋ, ɔwa kalɛnth ɔ fənthȧ ka ɔdɛr ro mə a bot ɛdi ya ɛsɛm. 17Ɔwa maŋ nənk ɔwath-e, aŋ tɔri ȧŋpa aŋa a kanɛ ŋa ta ɔwath ɔwe. 18Ka aŋfəm bɛ aŋa təl ti-e aŋ kabanɛ ta mȧtȧy ama aŋtɔl aŋ kanɛ ŋa. 19Kɛrɛ Merɛŋ ɔ bɛnɛ mȧtȧy ame bɛ-e, ɔ tȧmtȧmnɛ ma ka ȧŋmerȧ ŋɔŋ. 20Ɔwa aŋtɔl ɛsɛm aŋ kȧlanɛ rə kəyikis yi rə kəthɔkəs Kuru ta mȧtȧy bɛ ama aŋ po təl yi ama aŋ po nənk, mɔ mə a kanɛ ŋa.
21Ɔwa ma mərey tamthərɛsas mə po thas-e, ȧŋlɔkɔ aŋ bek tə kəbirons kɔ, ka a bont kɔ ŋes Yisɔs, ȧŋes aŋa ɔmaleka ɔ sɔŋ kɔ yeŋka ɔkara ɔ gbasi akor kɔŋ.
22Ɔwa ma mȧrey ma kagbili ka ŋaŋ mə po lasər mɔlɔ ma aŋthɔ ŋa Mosis aŋ pa, aŋ kȧrȧ ɔwath ro Yerusalɛm tə kəlaŋkli kɔ ka ɔMarki, 23(mɔ mə a gbal ka aŋthɔ ŋa ɔMarki kəpa, Uruni o runi ɔwe kanthi ȧŋpɔru a tə bont kɔ usəm ka ɔMarki), 24dɛ yi tə kəwura sathka mɔ mə a pa ka aŋthɔ ŋa ɔMarki, təfop ŋarəŋ, thalɔm təpərəm təfɛth ŋarəŋ. 25Ɔwa, kəla, wuni ɔ yi ro Yerusalɛm, ȧŋes ŋɔŋ ŋə yi Simiyɔn; wuni ɔwe yi ulompi, ɔ nesa Kuru, ɔ kar kȧbɛfəth ka Isrɛl. Ɔwa ɔYina məsəm ɔ rensa kɔ. 26Ɔyina məsəm ɔ po tɔri kɔ kəpa ɔ ba hɛ tə kənəŋk rəfi haŋ ɔ po nənk ɔKrayst ka ɔMarki. 27Ka ɔYina məsəm ɔ kora kɔ ka ȧŋseth ŋa Kuru; ɔwa ma Yosɛf yi Merɛŋ aŋ wɔŋȧ ɔwath Yisɔsȧŋ, kȧmȧ aŋ yɔ matanɛ ma aŋthɔ-e, 28Simiyɔn ɔ gbasi ɔwath ka maloŋk mɔŋ, ɔ ruba Kuru, ɔ pa,
29ƆMariki, ka-ake ter ȧŋbɔy a mu ɔ kɔnɛ yi məthɔfəl
Mɔ mə ȧrim ra mu rə pa-e.
30kotȧy-e, ɛfɔr ɛ mi ɛ po nənk kakisis ka mu.
31Ȧke mə po bɛnɛnɛ roder kədi ka təbona bɛ;
32Amotha tə kəmotha tȧbona təlɔm
Yi aŋyiki ŋa aŋfəm a mu Isrɛl.
33Ɔwa Yosɛf-əŋ yi ɔkara ka ɔwath aŋ kabanɛ ka mȧtȧy ama a fɔf ta atɔŋ. 34Ɔwa Simiyɔn ɔ ruba ŋa, ɔ pa ka Meri ɔkara kɔŋ, Kəla, a bot ɔwath ɔwe ta kafumpɔ yi kȧyokanɛ ka agbȧthi ro Isrɛl; ɔwa ta alomar sɔ aŋa mə a pɛnsa;
35kȧmȧ ɛnanɛ ya ɛmerȧ ɛgbathi ɛ ŋaibɛ. Yao, agbathɔ aŋ tə raf kabuth ka mu sɔ.
36Ɔwa Ana, unabi ubɛra ɔ yi ri, ɔwan bɛra ka Fanuɛl, ka ȧŋbɔnshɔ ŋa Asar; ɔ po bȧk kəbak kəbana, ɔ yirȧ ka ɔwos kɔŋ təren tȧmthədɛrəŋ ka kȧfanɛ kɔŋ. 37Ɔ tiyȧ ubora təren təgba tanlɛ təren tanlɛ. Ɔya ɔwe ɔ gbapɛ hɛ ȧŋseth ŋa Kuru, kɛrɛ ɔ bȧtho Kuru gbɛs pali-əŋ, rə kəramnɛ yi kəwop asum. 38Ɔ wɔŋ ri ȧŋlɔkɔ ŋati gbeŋ, ɔ muti Kuru mɔmɔ, ɔ fɔf ta ɔwath ka ŋa bɛ aŋa kar ta kabani ka Yerusalɛm.
39Maŋ po yɔ mȧtȧy bɛ mɔ mə aŋthɔ ŋa Kuru aŋ pa-e, aŋ kȧlanɛ ro Kalili, ka kȧpet ka ŋaŋ ro Nasarɛth. 40Ɔwa ɔwath ɔ tɛŋa, kɔ bȧk mədɛr ka ɔYina, ɔ la kətemp, ka ȧŋboŋa ŋa Kuru aŋ yi kɔ.
41Ɔwa aŋfəm ŋɔŋ aŋ la kɔ ro Yerusalɛm kəren o kəren ka amet ma kapainɛ. 42Ma Yisɔsȧŋ ɔ po bȧk təren tɔfɔt tərəŋ-e, aŋ kɔ ro Yerusalɛm mɔ matanɛ ma amet mə yi. 43Maŋ po lasər marey-e, aŋ kȧlanɛ, ɔwa ɔwath Yisɔsȧŋ ɔ tiyȧ rodarəŋ ro Yerusalɛm, kɛrɛ Yosɛf yi ɔkara kɔŋ aŋ tɛ hɛ ti; 44kɛrɛ maŋ nanɛ ɔ yi yi ŋaŋ ka aŋyama-e, aŋ bȧsər ȧŋbiyas ȧrey ŋin, kaŋ thɛns kɔ kətɔŋ ka rȧkomra yi antaranɛ ŋaŋ. 45Ɔwa maŋ te nənk kɔ-e, aŋ kȧlanɛ ro Yerusalɛm tə kəthɛns kɔ. 46Ka pə re yi kədareŋ ka mərey məsas aŋ bəp kɔ ka ȧŋseth ŋa Kuru, ɔ yirȧ kətɔŋ ka aŋkarmɔkɔ, ɔ sua ŋa ɛləns, ɔ yifəth yifəth ŋa sɔ. 47Ŋa bɛ aŋa təlȧ kɔ aŋ kabanɛ ka kȧtȧrȧ kɔŋ yi ɛgbaki yɔŋ. 48Ɔwa maŋ nənk kɔ-e, aŋ kabanɛ; ka ɔkara kɔŋ ɔ pa ro ŋɔŋ, Wan kȧmi, to som mɔ yɔ su yaŋ-e? Kəla, ɔkas ka mu yi minɛŋ, sə thɛns mu rə asoli abana. 49Ɔ pa ro ŋɔŋ, To som mə nə thɛns mi-e? Nə tɛ hɛ kəpa i ba kəyɔ mapanth ma ɔKas ka mi-i? 50Kɛrɛ pə sɔk hɛ ŋa ta ȧte ɔ pa ro rɔŋaŋ. 51kɔ kȧlanɛ yi ŋaŋ ro Nasarɛth, ɔwa ɔ yi usanɛ ro ŋaŋ, kɛrɛ ɔkara kɔŋ ɔ bɛnɛ mapa ame bɛ ka ȧŋmerȧ ŋɔŋ.
52Ɔwa Yisɔsȧŋ ɔ bȧr sɔthɔ kətemp yi kəsaŋa. Ɔ ba kəmar tȧy ka Kuru yi ka afəm.
Currently Selected:
Luk 2: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
