Luk 4
4
1Ka Yisɔs ɔ la ɔYina məsəm, ɔ wur ro Yɔrdan, ɔwa ɔYina ɔ kera kɔ ro wula, 2Mərey təgba tərəŋ-e, Sethani ɔ gbɔns kɔ. Ka mȧrey mati ɔ di hɛ rəka o rəka, ɔwa ma mə poŋ-e, dor rə wop kɔ. 3Ka Sethani ɔ pa ro ŋɔŋ, Bepi mə yi ɔWan ka Kuru-e, yamari aŋsar aŋe kȧmȧ aŋ səkɛ kəbo. 4Ka Yisɔs ɔ wosȧnɛ kɔ, ɔ pa, A po gbal kəpa, Pə yi hɛ rə kəbo gbo son rə wuni kəpet mɔ ŋesəm-e, kɛrɛ rə rim o rim ra Kuru. 5Ka Sethani ɔ gbepa kɔ ka kəteŋ kəbɔli rəkɔm, ɔ tɔri kɔ tabȧy bɛ ta ȧdȧru rə kəgbȧləp win. 6kɔ pa ro ŋɔŋ, I ti sɔŋ mu aŋfɔsɔ aŋe bɛ yi aŋyiki ŋati, kotȧy-e a po laŋklia ŋi ro rɔmi; ɔwa i gbəli sɔŋ ŋi wuni o wuni ɔwe i yema. 7Tiyȧŋ bepi mə bȧtho mi-e, i ti sɔŋ mu ŋi bɛ. 8Ɔwa Yisɔs ɔ wosa ɔ pa, Sək mi rȧŋ Sethani. A po gbal kəpa, Mə tə bȧtho ɔMarki ɔKuru ka mu, ɔwa kɔn son kɔnɔ mə yi tə kəbȧtho. 9Ka Sethani ɔ kera kɔ ro Yerusalɛm, ɔ təmər kɔ rə ȧgbȧp ŋin ɔbɔli rəkɔm ka ȧŋseth ŋa Kuru, kɔ pa ro ŋɔŋ, Bepi mə yi ɔWan ka Kuru-e təlpɛ roratha; 10kotȧy-e a po gbal kəpa,
Ɔ tə yamari aŋmȧleka ŋɔŋ ta ȧtȧ mu, tə kəbumər mu,
11ɔwa
Ka mȧta maŋ aŋ tə kɛkər mu
Kama mə te pəth rə ȧsar.
12Ɔwa Yisɔs ɔ wosa, ɔ pa ro ŋɔŋ, A po pa, Te mɛmər ɔMarki ɔKuru ka mu. 13Ma Sethani ɔ poŋ ɛgbɔns bɛ-e, ɔ ter Yisɔs haŋ alɔkɔ alɔm.
14Ka Yisɔs ɔ kȧlanɛ ro Kalili ka aŋfɔsɔ ŋa ɔYina məsəm, kɔ ba ŋes abana ka ȧŋthɔf ŋati bɛ. 15kɔ thəksa aŋfəm ka ɛseth yaŋ ɛgbanɛ, ka ŋa bɛ aŋ yikis kɔ.
16Ka Yisɔs ɔ der ro Nasarɛth rə a rusəm kɔ. Ɔwa mɔ mə matanɛ mɔŋ mə yi-e, ɔ wɔŋ ka ȧŋseth agbanɛ ka aŋsabath, kɔ təmȧ tə kəkaraŋ. 17Ka a sɔŋ kɔ ȧkȧfȧ ka Isaya tə kəkaraŋ. Ɔ kanthi ki, kɔ bəp ɔdɛr rə a gbal kəpa,
18ƆYina ka ɔMarki ɔ rensa mi,
Pəkasifɛ ɔ po səməs mi tə kətɔri ȧkɛra kəfinɔ ka Kuru ka ȧŋmɔnɛ.
Ɔ som mi tə kətaməs kasəli ka atɛndɛbira,
Yi kakal kəli ka aŋfith,
Tə kəsɔŋ rȧwankom ka aŋa a thiŋkər rə afɔsɔ rəkɔm.
19Tə kətaməs karen kəfinɔ ka ɔMarki.
20kɔ kantha ȧkȧfȧ, ɔ kala ki ka ȧŋbɔy, kɔ yirȧ. Ɔwa ɛfɔr ya ŋa bɛ aŋa yi ka ȧŋseth agbanɛ ɛ tansa kɔ. 21kɔ təp kəpa ro ŋaŋ, Thonɔŋ a po lasər mȧgbal ame ka katəl ka nu. 22Ɔwa aŋfəm bɛ aŋa bəpər-e, aŋ fɔf finɔ ta atɔŋ, ɔwa aŋ kabanɛ ta ȧsim təfinɔ ȧte wur ka kȧsəŋ kɔŋ; aŋ yif, Ɔwan uruni ka Yosɛf kɔn thahɔ ɔwe-i? 23kɔ pa ro ŋaŋ, Tɛntɛnɛ nə tə tɔri mi aŋlomɔ aŋe, Bolomba, ramərnɛ; tȧy o tȧy ȧte sə təl mə po yɔ ro Kepaniyɔm-e, yɔ ti sɔ nɔ ka ȧŋthɔf a mu. 24kɔ pa ro ŋaŋ, Tɛntɛnɛ i kanɛ nu, a malanɛ hɛ unabi o nȧbi ka ȧŋthɔf ŋɔŋ. 25Kɛrɛ i kanɛ nu ka təteŋ kəpa, Abora agbȧthi aŋ yi ro Isrɛl ka mȧrey ma Ilaya, ma a kantha ȧkuru təren təsas yi yof tamthərukin, ka ȧŋlɔkɔ ma dor rəbana rə yi ka ȧŋthɔf bɛ. 26Kɛrɛ a som hɛ Ilaya ka ukin ka ŋaŋ thambe ka ubora ro Sarɛptha, ka ȧŋthɔf ŋa Sidon. 27Ɔwa afəm agbȧthi aŋa ba arom aŋ yi ro Isrɛl ka ȧŋlɔkɔ ŋa Ilasha ɔnȧbi, kɛrɛ a fethər hɛ ukin ka ŋaŋ thambe Nemɔn ɔSirian. 28Ka ŋaŋ bɛ aŋa yi ka ȧŋseth agbanɛ maŋ təl mȧtȧy ame aŋ bora bansȧ, 29aŋ yokanɛ aŋ bȧl kɔ ka kȧpet, aŋ kera kɔ ka ɔthalnɛ wa kateŋ ro a təmər kȧpet ka ŋaŋ, kȧmȧ a fitha kɔ roratha. 30Kɛrɛ Yisɔs ɔ thas ka kətɔŋ ka ŋaŋ ɔ kɔnɛ.
31kɔ thor ro Kepaniyɔm, kəpet ka ro Kalili, kɔ thəksa ŋa ka aŋsabath. 32kaŋ kabanɛ mathəksa mɔŋ, ȧtesoma-e ȧrim rɔŋ rə yi yi afɔsɔ. 33Ɔwa wuni ɔ yi ka ȧŋseth agbanɛ, ɔ ba ukərəfi uləs, ɔ sel ɛrɔŋ, 34ɔ pa, Ko tȧy tȧŋ sə ba yi munɔŋ-a? Munɔ Yisɔs ɔwe ro Nasarɛth! Mə der tə kələsər su-i? I tȧrȧ ɔwe mə yi-e, ɔSəm ka Kuru. 35Ka Yisɔs ɔ ŋal kɔ, ɔ pa, Taŋk, ɔwa wur ro ŋɔŋ. Ma ɔkərəfi ɔ po napanɛ kɔ kətɔŋ ka ŋaŋ-e, ɔ wur, ɔ yɔ hɛ kɔ ɔbaŋ. 36Ɔwa ŋa bɛ aŋ kabanɛ, aŋ fɔflanɛ aŋ pa, Ko rim raŋ are-e, kotȧy-e, rə afɔsɔ ɔ yamari aŋkərəfi aləs, ɔwa aŋ wur-e? 37Ka tȧgbuŋ tɔŋ tə gbanthɛnɛ dɛr o dɛr ka ȧŋthɔf ŋati.
38Ma Yisɔsȧŋ ɔ wur ka ȧŋseth agbanɛ-e, ɔ wɔŋ ka ȧŋseth ŋa Saymɔn. Ɔwa mədɛr məgbipanɛ məlel mə wop ɔniŋkara ka Saymɔn, ka aŋfəm aŋ nɛmthɛnɛ kɔ ta atɔŋ. 39kɔ bȧkər kɔ, ɔ ŋal ratu, ka rə ter kɔ. Ka ɔlɛmp wati ɔya ɔ yokanɛ ɔ yɔna ŋa.
40Ma aret rə yema wɔŋ-e, aŋfəm bɛ aŋa ba afəm atuy rə rətu o rətu, aŋ kȧrȧ ŋa ka Yisɔs; ɔ rend mȧta mɔŋ ka ŋa bɛ, ɔ yenkəs ŋa. 41Ɔwa aŋkərəfi aləs sɔ aŋ wur rə afəm agbȧthi, aŋ woŋa, aŋ pa, Munɔ mə yi ɔWan ka Kuru; kɔ ŋal ŋa, ɔ selɔyɛ aŋ fɔf ȧtesoma-e aŋ tȧrȧ kəpa kɔnɔ yi ɔKrayst.
42Ma pə sɔk-e, Yisɔs ɔ wur ɔ kɔnɛ dɛr ɔyeŋ. Ɔwa aŋfəm aŋ thɛns kɔ. Maŋ fir kɔ aŋ yema kali kɔ kəwur ro rɔŋaŋ. 43Kɛrɛ ɔ pa ro ŋaŋ, I ba tə kətɔri ȧkɛra kəfinɔ ka rȧbȧy ra Kuru ka tapet təlɔm sɔ, kotȧy-e ta ȧte tə a som mi.
44Ɔwa Yisɔsȧŋ ɔ taməs ka ɛseth ɛgbanɛ ro Kalili.
Currently Selected:
Luk 4: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
