Mathiu 15
15
1Ka aŋFarisi yi aŋkarmɔkɔ kǝwur ro Yerusalem aŋ der ka Yisɔs, aŋ pa, 2kɔyɛŋ aŋkarande a mu aŋ lǝsǝr makur ma aŋbȧki ma aŋ te yanɛ yeŋka aŋ di-e? 3kɔ lasi ɔ pa ro ŋaŋ, kɔyɛŋ naŋ sɔ nǝ lǝsǝr aŋyamari ŋa Kuru salata makur ma nu-e? 4kotȧy-e Kuruȧŋ ɔ pa, Yikis ɔkas ka mu yi ɔkara ka mu, dɛ yi; Kɔn ɔwe mǝ fɔf ɔlǝs ta ɔkas thalɔm ta ɔkara-e, ta ɔ fi rafi. 5Kɛrɛ naŋ nǝ pa, Wuni o wuni ɔwe mǝ pa ka ɔkas kɔŋ thalɔm ɔkara kɔŋ, Arǝka ra mi ara gbǝli naŋ munafas mu-e, a sɔŋ ri Kuru-e, 6ɔ ba hɛ sɔ tǝ kǝyikis ɔkas kɔŋ thalɔm ɔkara kɔŋ. Ɔwa nǝ po wop ȧrim ra Kuru ɔyai salata makur ma nu.
7Na amunafaki, pǝ yi ɔlompi ȧte ɔnȧbi Isaya ɔ nȧbi ta ȧtȧ nu ma ɔ pa,
8Aŋfǝm aŋe aŋ yikis mi yi tasǝŋ taŋ,
Kɛrɛ ɛmerȧ yaŋ ɛ bɔlȧnɛ mi.
9Kɛrɛ aŋ bȧtho mi gbo kǝtiŋ, aŋ thǝksa ɛmaŋ ya
afǝm a kǝpet mɔ mȧthǝksȧ maŋ.
10Mȧ ɔ po tela aŋfǝm ro rɔŋɔŋ-e, ɔ pa, Tǝl nu, ɔwa tȧ pǝ sɔk nu. 11Pǝ yi hɛ arǝka ara mǝ wɔŋ ka kasǝŋ ara mǝ nɔkɔs wuni, kɛrɛ ara mǝ wur ka kasǝŋ, rǝ mǝ nɔkɔs wuni. 12Ka aŋkarande ŋɔŋ aŋ der kaŋ pa ro rɔŋɔŋ, Mǝ tȧrȧ kǝpa aŋFarisi aŋ bansȧ maŋ tǝl ȧsim ȧte-i? 13Kɛrɛ ɔ lasi ɔ pa, Ŋǝnt o ŋǝnt aŋa ɔKas kȧmi ro riyana ɔ te tɛp-e, a ba kǝtusi ŋi. 14Tey ŋa, aŋ yi gbo afith aŋa kɔtha aŋfith. Ɔwa bepi ufith ɔ kɔtha ufith-e, ŋa ŋarǝŋ aŋ tǝ fumpɔ ro fo. 15Ka Pita ɔ pa, Lokthia su aŋlomɔ aŋe. 16Ka Yisɔs ɔ pa, Naŋ sɔ nǝ tha ba hɛ kǝsɔthnɛ-i? 17Nǝ tɛ hɛ kǝpa rǝka o rǝka ara mǝ wɔŋ ro sǝŋ rǝ thas rokor-i, ɔwa a lǝpsɔ fitha ri-i? 18Kɛrɛ mȧtȧy ama wur ka kasǝŋ mǝ wur ka ȧŋmerȧ; ɔwa ame-e, mǝ mǝ nɔkɔs wuni. 19Ȧtesoma-e ɛnanɛ ɛlǝs-o, kǝdifǝth-o, kǝrǝp-o, rǝkeiyo, mǝseri ma rǝyem-o yi kǝfɔf Kuru ɔlǝs-e, ɛ wur ka ȧŋmerȧ. 20Mȧtȧy ame mǝ mǝ nɔkɔs wuni, kɛrɛ tǝ kǝdi kǝte yanɛ kǝ nɔkɔs hɛ wuni.
21Ka Yisɔs ɔ wur ri, ɔ kɔ ka ɛgbap ya ro Tair yi ro Sidon. 22Ɔwa wuni bom ka ro Kenan ɔ wur ka ɛgbap yati, ɔ sel ɛrɔŋ ɔ pa, Pa, munɔ ɔwan ka Debid, ba mi ȧney. Ukǝrǝfi ɔ sɔmpa ɔwan kȧmi ubɛra. 23Kɛrɛ ɔ lasianɛ hɛ kɔ hali dim din. Ka aŋkarande ŋɔŋ aŋ der aŋ nɛmthɛnɛ kɔ, aŋ pa, Yɔ ɔwath ubɛra ɔ kɔnɛ, kotȧy-e ɔ bokǝr su. 24Kɛrɛ ɔ pa, A som mi gbo ka talɔmɛ tǝsɔkar ta ȧŋseth ŋa Isrɛl. 25Ka ɔya ɔ der ɔ sɔna kɔ tǝwu, ɔ pa, Pa, mar mi. 26Ka Yisɔs ɔ pa, Pǝ mar hɛ tǝ kǝgbasi kabo ka aŋfɛth tǝ kǝfitha ki ka ɛtǝn. 27Kɛrɛ ɔwath ubɛra ɔ pa sɔ, Tǝteŋ Pa, kɛrɛ hali ɛtǝn aŋ di atɔmp ȧte mǝ fumpɔ ro thɔf kǝwur ka aŋthebǝl ŋa aŋmarki ŋaŋ. 28Ka Yisɔsȧŋ ɔ pa ro ŋɔŋ, Bithaŋ, kȧlanɛ ka mu kǝ bana. Ta pǝ yɔnɛ mu mɔ mǝ mǝ yema. Ka ɔwan kɔŋ ubɛra ɔ yeŋk ka ȧŋlɔkɔ ŋati gbeŋ.
29Ka Yisɔs ɔ wur ri, ɔ kɔ fatǝr kȧbȧŋ ka ro Kalili. Kɔ gbep ka kateŋ rokɔm, ɔ yirȧ ri. 30Ka suniya tǝbana tǝ der ro ŋɔŋ tǝ banȧnɛ aŋtǝtkɛ-o, aŋfith-o, tabobo-o, aŋlopanɛ-o yi alɔm agbȧthi, ka a bot ŋa ka ȧtȧtək tɔŋ. Kɔ yeŋkǝs ŋa bɛ, 31haŋ ȧruniya rǝ kabanɛ maŋ nənk tabobo aŋ fɔf, aŋlopanɛ aŋ yeŋk, aŋtǝtkɛ aŋ kɔth yi aŋfith aŋ nənk. Kaŋ yikis ɔKuru ka Isrɛl.
32Ka Yisɔs ɔ tela ro ŋɔŋ aŋkarande ŋɔŋ, ɔ pa, I ba ȧney ta ȧruniya, ȧtesoma-e aŋ po yi yi minɛŋ mǝrei mǝsas, aŋ ba hɛ ra rǝdi. I yema hɛ tey ŋa ŋa ador, ta thani aŋ pika ro roŋ. 33Ka aŋkarande ŋɔŋ aŋ pa ro ŋɔŋ, Reke mǝ sǝ sɔthɔ tǝbo tǝgbathi tǝbeki namsǝr ȧruniya rǝbana are ka ɔdɛr ɔyeŋ ɔwe-e? 34Ka Yisɔs ɔ yif ŋa, Mɔlɔ tǝbo nǝ ba-a? kaŋ pa, Tamthǝdɛrǝŋ, dɛ yi ɛlop athȧn. 35kɔ kanɛ ȧruniya tǝ kǝyira yirȧ ro thɔf. 36kɔ gbasi tǝbo tamthǝdɛrǝŋ yi ɛlop-e, kɔ muti mɔmɔ, ɔ simǝth yi, kɔ sɔŋ aŋkarande ŋɔŋ kȧmȧ aŋ sɔŋ ȧruniya. 37Ka ŋa bɛ aŋ di aŋ namra, ɔwa aŋ gbas tǝbǝlai tamthǝdɛrǝŋ ka ɛbɛm ɛtianɛ. 38Ɔwa ŋaŋ aŋa di aŋ yi mɔlɔ ma afǝm aruni ɛwul yanlɛ, kǝte lɔmanɛ aŋfǝm abom yi aŋfɛthȧŋ. 39kɔ ter ȧruniya, ɔ bȧkȧ ka ȧŋbil, kɔ der ka ȧŋgbȧp ŋa ro Makadan.
Currently Selected:
Mathiu 15: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
