Mark 13
13
1Ɔwa ma ɔ wur ka ȧŋseth ŋa Kuru-e, ukin ka aŋkarande ŋɔŋ ɔ pa ro ŋɔŋ, Karmɔkɔ, kəli, ko məsar ɔwa ko ɛseth yeye! 2Ka Yisɔs ɔ pa ro ŋɔŋ, Mə nənk ɛseth ɛbana ɛye-i? A ba hɛ kəte yȧsar ŋin rokɔm ka alɔm aŋa mə a te fak.
3Ma ɔ yirȧ ka kateŋ ka Ɔlif ɔ lomanɛ ȧŋseth ŋa Kuru, ka Pitaŋ, Yeməsȧŋ, Yɔnȧŋ yi Andrɔŋ aŋ yif kɔ sɔ-e, 4Kanɛ su ȧŋlɔkɔ mȧtȧy ame mə ba kəyi, ɔwa ko yi amisali aŋa mə yi bepi mȧtȧy ame mə yɔnɛ-e? 5Ka Yisɔsȧŋ ɔ təp kəpa ro ŋaŋ, Botnɛ nu rə ȧmerȧ kȧmȧ wuni o wuni ɔ te nu tɔns. 6Agbathi aŋ tə der ka ȧŋes a mi, aŋ tə pa, Minɛ yi kɔnɔ; ɔwa aŋ tə tɔns agbȧthi. 7Ma nə təl ta səfa yi təgbuŋ ta səfa-e, te nu nesa. Mȧtȧy ame mə ba kəyɔnɛ, kɛrɛ ɔthalnɛ ɔ tha bek hɛ. 8kotȧy-e abona aŋ tə fumpɔ abona, ɔwa rəbȧy rə tə fumpɔ rəbȧy; kəyɛr ka ȧŋthɔf kə tə yi dɛr ɔgbȧthi. Dor rəbana rə tə yi. Mȧtȧy ame mə tə yi ɔtəpɛr wa kasɔmpanɛ.
9Kɛrɛ botnɛ nu rə ȧmerȧ, ȧtesoma-e a tə lȧnki nu ka ɛbare ya rəbȧy; a tə sapəth nu ka ɛseth ɛgbanɛ; a tə kȧrȧ nu rodi ka aŋbȧy salata mi, tə kəseri ro ŋaŋ ta ȧtȧ mi. 10Kɛrɛ a ba kəmɔtha taməs ȧkɛra kəfinɔ ka Kuru ka tȧbona bɛ yeŋka ɔthalnɛ ɔ bek. 11Maŋ kera nu tə kəlaŋkli nu-e, te nu ba asoli ta ȧtȧ mə nə fɔf, kɛrɛ tȧy o tȧy ȧtȧ a sɔŋ nu ka ȧŋlɔkɔ ŋati-e, tə mə nə fɔf, kotȧy-e, pə yi hɛ naŋ nə mə fɔf, kɛrɛ ɔ Yina məsəm kɔnɔ mə fɔf. 12Ɔwa uwɔnt ɔ tə lȧnki uwɔnt tə kəfi, ɔwa ɔkas ɔwan kɔŋ; ɔwa aŋwuth aŋ tə fumpər aŋa koməs ŋa, aŋ tə yɔ a dif ŋa. 13Aŋfəm bɛ aŋ tə gbɛŋa nu salata ȧŋes a mi; kɛrɛ kɔnɔ ɔwe mə muyu haŋ ka ɔthalnɛ-e, mə kisi.
14Kɛrɛ ma nə nənk ɔtheranɛ ka kədinɛ ta ɔwe ɔnȧbi Danɛl ɔ fɔf-e ɔ təmȧ ro ɔ te mar təmȧ, (ta ɔwe mə karaŋ ɔ sɔthnɛ) ɔwa ta ŋaŋ aŋa yi ro Yuda aŋ gbukɛ aŋ kɔ ka tȧteŋ; 15ɔwa kɔnɔ ɔwe yi ka ȧŋseth rokɔm ta ɔ te thor, thalɔm ɔ te wɔŋ ro seth tə kəwura rəka o rəka. 16Ɔwa kɔnɔ ɔwe yi ro kɔr ta ɔ te kȧlanɛ tə kəgbasi aruma rɔŋ. 17Mɔnɛ ro ŋaŋ aŋa yi ator yi ŋaŋ aŋa masər ka mȧrey mati! 18Ɔwa ramnɛ nu kȧmȧ kagbukɛ ka nu kə te yi ka ȧdȧrəŋ. 19Ȧtesoma-e ka mȧrey mati kəsɔmpanɛ kə tə yi, kəwunɔŋ ȧke te tha yi kȧbi ȧdȧru rə təpɛ ara Kuru ɔ təpi haŋ ka-ake, ɔwa kə ba hɛ sɔ kəyi. 20Ɔwa, thambe ɔMarki ɔ gbəŋki mȧrey mati, wuni o wuni ɔ ba hɛ naŋ tə kəkisi; kɛrɛ salata aŋthith aŋa ɔ po thithəs-e, ɔ tə gbəŋki ma. 21Ka ȧŋlɔkɔ ŋati bepi wuni o wuni ɔ pa, Kəli, ɔKrayst ɔ yi nɔ; thalɔm ɔ yi ro. Te nu lanɛ ti, 22kotȧy-e aKrayst ayem yi anȧbi ayem aŋ tə yokanɛ, aŋ tə yɔ ɛmisali yi tȧy təkabanɛ, kȧmȧ bepi pə gbəli yi-e, aŋ tə yɛthəs aŋthith. 23Kɛrɛ botnɛ nu rə ȧmerȧ. Kəla i po mɔtha kanɛ nu mȧtȧy bɛ.
24Ka mərey mati, kədarəŋ ka kasɔmpanɛ kati, aret rə tə biyȧ, ɔwa aŋof aŋ ba hɛ kəsɔŋ ɔwaŋ wati. 25Ɔwa atɔs ka ȧkuru tə tə fumpɔ ɔwa aŋfɔsɔ aŋa yi ka ȧkuru aŋ tə yiŋkthanɛ. 26Ɔwa ȧŋlɔkɔ ŋati aŋ tə nənk ɔWan ka wuni ɔ tə der ka aturu rə afɔsɔ yi ayiki abana. 27Ɔwa ȧŋlɔkɔ ŋati ɔ tə som aŋmȧleka, ɔ tə thoŋkla dɛr rɔkin aŋthith ŋɔŋ kəwur ka ɛgbap yanlɛ ya ȧdȧru, kəwur ka ɔthalnɛ wa ȧdȧru kəkɔ ka ɔthalnɛ wa ȧkuru.
28Thəkəs nu alomɔ ŋa aŋənt ŋa aŋgbɔnɔ; bepi mara məfɛth mati mɛ wur ɛbɔpər ɛfu-e, nə tȧrȧ ti kəpa rawok rə fat. 29Ya pə yi sɔ naŋ, bepi nə nənk mȧtȧy ame mə yɔnɛ-e, tȧrȧ nu kəpa ɔ po fat, hali ka tadare ta nu. 30Tɛntɛnɛ i kanɛ nu, rȧkomra are rə ba hɛ kəthas haŋ mȧtȧy ame bɛ mə gbenthis. 31Ȧkuru yi ȧdȧru ɛ ba kəthas; kɛrɛ ȧsim ta mi tə ba hɛ kəthas. 32Kɛrɛ ȧŋrey ŋati yi ȧŋlɔkɔ ŋati-e wuni o wuni ɔ ba hɛ kətara, hali aŋmȧleka ro riyana thalɔm ɔWan, kɛrɛ ɔKas gbo son. 33Botnɛ nu rə ȧmerȧ, bumər ɔwa ramnɛ, ȧtesoma-e nə tɛ hɛ ȧŋlɔkɔ ŋati. 34Pə yi mɔ wuni ɔwe kɔ rə ȧbiyas abɔli ɔ tey ȧŋseth ŋɔŋ, ɔwa ɔ sɔŋ afɔsɔ ka ɛbɔy yɔŋ, ukin o kin ɔ ba mapanth mɔŋ, kɔ yamari ɔbumər tə kəbum. 35Tiyȧŋ bumər nu, ȧtesoma-e nə tɛ hɛ ȧŋlɔkɔ aŋa ɔkas ka ȧŋseth mɔ der, pə yi rəfɔy-e, kəren datɔŋ-e, ka ȧŋlɔkɔ kətəpi mɔ tam-e, thalɔm rəbəth; 36ta thani ɔ der kəthɛna ɔ bəp nu nə dirȧ. 37Ɔwa ȧte i pa ro nu, i pa ka aŋfəm bɛ. Bumnɛ nu.
Currently Selected:
Mark 13: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
