Mark 7
7
1Ka aŋFarisi yi aŋkarmɔkɔ alɔm aŋa wur ro Yerusalɛm aŋ thoŋklanɛ dɛr rɔkin ka Yisɔsȧŋ, 2aŋ po nənk aŋkarande ŋɔŋ alɔm aŋ di ɛdi yaŋ kəte yak mȧta maŋ, aŋ thɛkɛ ŋa. 3kotȧy-e aŋFarisi yi aŋYuda bɛ aŋ wop ɛmaŋ ya aŋbȧki, aŋ di hɛ thambe aŋ yak mȧta maŋ finɔ. 4Ɔwa, maŋ wur ka ɔdɛr ɔthila-e, aŋ di hɛ thambe aŋ bukɔ, ɔwa mȧtȧy məgbathi məlɔm mə yi ama aŋ selɔ wop, mɔ kayakəs ɛpɔthi, ɛfȧt yi ɛyɛt ɛkɛm. 5Ka aŋFarisi yi aŋkarmɔkɔ aŋ yif kɔ, To som aŋkarande a mu aŋ te tȧŋ makur ma aŋbȧki-e, kɛrɛ aŋ di ɛdi yaŋ yi məta mənɔkɔ-e? 6kɔ pa ro ŋaŋ, Ka tȧteŋ Isaya ɔ nȧbi ta na amunafaki ma ɔ gbal kəpa,
Aŋfəm aŋe aŋ yikis mi yi tasəŋ taŋ,
Kɛrɛ ɛmerȧ yaŋ ɛ bɔlȧnɛ mi;
7Kɛrɛ aŋ bȧtho mi kətiŋ,
Maŋ thəksa mathəksa ma aŋyamari ŋa afəm.
8Nə tey aŋyamari ŋa Kuru, nə wop makur ma afəm ɔbaki mədɛr.
9kɔ pa ro ŋaŋ, Nə kasi aŋyamari ŋa Kuru kȧmȧ nə wop makur ma nu. 10kotȧy-e Mosisȧŋ ɔ po pa, Yikis ɔkas ka mu yi ɔkara ka mu, dɛ yi, Kɔnɔ ɔwe mə fɔf ɔkas yi ɔkara ɔləs-e, ta ɔ fi rafi, 11kɛrɛ naŋ nə pa, Bepi wuni ɔ pa ka ɔkas kɔŋ thalɔm ka ɔkara kɔŋ, Arəka ra mi ara mə naŋfas mu-e rə yi Kɔrban, (rə yi tə kəpa-e, Sɔnd ka Kuru) 12ɔ ba hɛ sɔ tə kəyɔ koko ta ɔkas kɔŋ thalɔm ta ɔkara kɔŋ. 13Nə dim ȧrim ra Kuru salata mȧkur ma nu ama nə po bot. Ɔwa tȧy təgbȧthi təwunɔŋ tə mə nə yɔ sɔ.
14kɔ kȧl tela aŋfəm ro ŋɔŋ sɔ, ɔ pa ro ŋaŋ, Təla mi nu na bɛ, ɔwa ta pə sɔk nu. 15Rəka o rəka rə yi hɛ ara yi rokaŋ ka wuni ara pə yi-e, bepi rə wɔŋ kɔ rokor-e, rə nɔkɔs kɔ; kɛrɛ ɛyɛt ɛyɛ mə wur ka ɔwuni-e, yə yi ɛyɛ mə nɔkɔs kɔ. 16Bepi wuni o wuni ɔ ba ɛləns-e, ta ɔ təl. 17Ma ɔ wur ka aŋfəm-e, ɔ kɔnɛ ka ȧŋseth, aŋkarande ŋɔŋ aŋ yif kɔ ta aŋlomɔ. 18kɔ pa ro ŋaŋ, Naŋ sɔ nə ba hɛ kəsɔthnɛ-i? Nə tɛ hɛ kəpa rəka o rəka ara yi rokaŋ ka wuni rə gbəli hɛ nɔkɔs kɔ-i bepi rə wɔŋ kɔ rokor-i? 19Pəkasifɛ rə wɔŋ hɛ ka ȧŋmerȧ ŋɔŋ, kɛrɛ ka akor kɔŋ, ɔwa rə ləpsɔ wur kɔ. Ɔ pa ȧte tə kəfethər ɛyɛt ɛdi bɛ. 20kɔ kȧl pa, Arəka ara mə wur ka wuni-e, rə mə nɔkɔs kɔ. 21kotȧy-e, kəwur rokor-e, kəwur ka ɛmerȧ ya aŋfəm-e, ɛnanɛ ɛləs-o, kəba ɛpure-o, kȧrəp-o, 22tȧkey-o, afela ŋa yɛt ya wuni lɔm-o, məkar mələs-o, kȧtut-o, ɛyanfa-o, ɛfɔr ɛmara-o, tȧfɔf tələs-o, kȧbonɛ tȧy-o, yi ȧŋpənk-o; 23mȧtȧy mələs ame bɛ mə wur ka ȧŋmerȧ, ɔwa mȧ mə nɔkɔs wuni.
24Kədarəŋ kati ɔ yokanɛ kɔ wur ri, ɔ kɔnɛ ka manəŋkəra ma ro Tair yi ro Sidon. Kɔ wɔŋ rə aseth, ɔ yema hɛ wuni o wuni ɔ tȧrȧ ti, kɛrɛ ɔ gbəli hɛ maŋknɛ. 25kotȧy-e ka ɔlɛmp wati wuni bom ulɔm-e, ɔ ba wath bɛra ɔwe ba ukərəfi uləs, ma ɔ təl ta atɔŋ-e, ɔ der, ɔ fumpɔ ka ȧtȧtək tɔŋ. 26Ɔwuni bom ɔwe ɔ yi uKrik, ȧŋbona ŋɔŋ ŋə yi uSairofinisiyan; kɔ nɛmthɛnɛ Yisɔsȧŋ kȧmȧ ɔ wurɔ ɔkərəfi ka ɔwan kɔŋ ubɛra. 27Kɛrɛ Yisɔsȧŋ ɔ pa ro ŋɔŋ, Ta aŋfɛth aŋ mɔtha ras namra, kotȧy-e pə lomp hɛ tə kəgbasi ɛdi ya aŋfɛth tə kəfaka ɛtən. 28Ɔya ɔ wosa ɔ pa ro ŋɔŋ, Tȧteŋ Pa, kɛrɛ hali ras ɛtən ka aŋthebəl roratha aŋ di atɔmp ta aŋfɛth. 29kɔ pa ka ɔya, Ta ȧte mə pa-e, kɔnɛ, ɔkərəfi ɔ po wur ka ɔwan ka mu ubɛra. 30Ɔwa ma ɔ kȧl ka ȧŋseth ŋɔŋ, ɔ bəp ɔwath ɔ fənthȧ ro fənt, ɔkərəfi ɔ po wur kɔ.
31Ma Yisɔsȧŋ ɔ wur ka ȧŋgbȧp ŋa ro Tair-e, ɔ thas ro Sidon tə kəkɔ ka kȧbȧŋ ka ro Kalili, ɔ gbəkinɛ manəŋkəra ma ro Dikapɔlis. 32Ka a kȧrȧ kɔ ri wuni taŋa, ɔ kȧl ba təbɛthɛ; ka aŋ nɛmthɛnɛ kɔ tə kədeŋ kɔ kȧta kɔŋ. 33kɔ kera kɔ rayɛr kəwur ka ȧruniya datɔŋ, kɔ wɔŋȧ mȧsəl mɔŋ ka ɛləns yɔŋ, ɔ thuf, kɔ gboŋ ramer rɔŋ. 34Ɔ kəli ka ȧkȧriyana, ɔ laŋ, ɔ pa ro ŋɔŋ, Ɛfatha, pə yi mɔ, Kanthɛ. 35Ka ɛləns yɔŋ ɛ kanthɛ, ɔwa ramer rɔŋ rə səlɛ, kɔ fɔf gbəraŋ. 36kɔ ma ŋa kȧmȧ aŋ te kanɛ ti wuni o wuni, kɛrɛ ma ɔ bȧr maŋ ŋa, ya aŋ bȧr taməs ti. 37Aŋ kabanɛ ɔthasar aŋ pa, Ɔ pons mȧtȧy bɛ ɔfinɔ, ɔ yɔ hali aŋtȧŋȧ aŋ təl, ɔwa tabobo aŋ fɔf.
Currently Selected:
Mark 7: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
