KISAH 11
11
Petrus pui sut Kornelius bak nibou mbusyamei nya ei minu ndig Yerusalem
1Lene yo di igya kui Yesus kin nindigsi di ingon jo kep nya bidem hanjop Yudea nisurti-nipekti imiap tut ngkiai nya inghapti bipia ijoi sut ibit Allah nihyet. 2Leu api tirigi Petrus ngkwei hanyen ug ei minu ndig Yerusalem lene mben Yahudi di ibidip huk midut sunat nya itte tut noni. 3Ipai binoni “Nggon rino aug bong bit yo di igyai midut sunat bi dima ba, ayem njita bit yok i?” 4Gima rino Petrus nyohou mbot kep tut mun di pek kep mem noni leu nitriti hagom sindam biyok. Noni pai biyok,
5“Tirigi dingat rin ei minu ndig Yope bidingat nadi lene dingat-hi-ngat. Dingat lo, mai nghas di nyan bibor gom son nyahan kwei leu mpia-bbed him tut mun di bikri kep ninghas yenti bitai bikwei jo hon da. 6Tirigi diyok diyai kep ninsi bidingat mindhe-ndhe dibon nimig-ninda kin mindhe-ndhe di niten-pos kin mindhe-ndhe di iba inghop bijjei dihyeisi kin ha di dimba-mba nyen nya. 7Lene dimiap nihyet gom di tibim kwei bipai bida ‘Petrus e, akiju ba, abui mikwau dima yok hak ba, ayem ug.’ 8Noro disrep ‘Tuhan e, nok bi! Diyem kep mun di nye di mben Yahudi nipigig ser di ugwai-gwai kin nirom kuisi cem hi bi sren.’ 9Noro nihyet dima tibim hanyen kwei leu mpia-bbed him bipai ‘Tut mun di Allah pai sut bipia dia-diau ne ma ajem nok mun di nirom kuisi au.’ 10Mun dima yok bitimon da mbiningai leu lene kui hanyen ug ei mpia-bbed him bihigom. 11Hammi tirigi ibou ningai di ikwei leu minu ndig Kaisaria binggok ser da ikwei krau ig di dibong ser. 12Lene Allah Ninnei cuk da bipia ma dihig dingon eisi tut gino dibit yok au. Gima rino disut bat yo di ingon jo kep nya ibou muhwindagom leu minu ndig Yope cem ibit da ba, nuug ei minu ndig Kaisaria. Ba, nahagom nicoi ug ei Kornelius de ig bei ei minu ndig dima. 13Leu api noni pui kep binye tut malaikati di noni ngat lo, ya ei nide ig bei bipai binoni ‘Ma apinak tungwahi ug ei minu ndig Yope leu binhyepo buwak Simon Petrus kwei. 14Noni mitri tut nihyet di bindei ba, nani kin ade ig bei nsi nya jahagom jiyai niteu leu sisarti kin niyaijo nijep.’ ” 15Petrus binut bu bipai “Tirigi sindi ditri tut nihyet biyok lene Allah Ninnei srek kros kwei bicoi ug ei yahagom ingonti dem kep tirigi Noni coi kwei ei nyeni ingonti habiei ei nimbie him pima. 16#Kis. 1:5 Lene diyok ngon kep nihyet di Tuhan pai ‘Yohanes tur tungwatu nya ei minyeiti noro Allah mitur je ei Ninneiti.’ 17Gima rino jo nibreisi bipia Allah yai mun di kei bak ngkiai nya dem kep gi Noni yai binye tirigi nyeni ingon jo kep tuhan Yesus Kristus. Gima rino bit bon dibrim dingkek kep Allah bidibigen ser ningon kanti kan bi!”
18Tirigi mben Yahudi pima yok imiap Petrus nihyet lene itte tut noni bu bi. Lene inggei sut Allah bipai biyam “Gi nok ne Allah bon nituti mem ngkiai nya ittin ser ide sisar bikiek ndam Allah bigyai niyaijo nijep cem.”
Mbusyamei nya ei minu ndig Antiokhia
19 #
Kis. 8:1-4
Niabiati Stefanus yai nimai leu lene nibou mben Yahudi nya sindi ihwen bit yo di ingon jo kep nya. Gima rino intek gimahap binang ug ei minu Fenisia kin Mios Siprus kin minu ndig Antiokhia bitri tut Allah nihyet bak mben Yahudi nya he. 20Noro andigpoi di ingon jo kep nya ibou poi itimieisi leu Mios Siprus kin minu ndig Kirene ikwei ei minu ndig Antiokhia bitri tut Nihyet Di Kei tut Yesus bak ngkiai nya cem ei minu ndig dima. 21Tuhan sindem tut yok bibindei ba, tungwatu imang bibor ittin ser ide sisar ba, ingon jo kep Tuhan.
22Mun di pek kep mem yo dima nibimbiti tibim ug ei yo di inggre kin mbusyamei ei minu ndig Yerusalem itingou nsi. Gima rino ipinak Barnabas ug ei minu ndig Antiokhia. 23Tirigi noni kwei krau bingat lo, Allah singat tut yok lene ningon llei bibor. Lene noni pingok yo dima ingonti leu binhyepo iba ingon titut yam bingon gom tut Tuhan. 24Allah Ninnei sindem tut Barnabas biyai ningon di singat kin ningon di gom cem. Gima rino Barnabas bindei ba, tungwatu imang bibor itti kin Tuhan bibit nihyet.
25Mpe dima lene Barnabas ug ei minu ndig Tarsus binggok ser Saulus. 26Niabiati Barnabas um Saulus lene noni buwak noni bingkwei hanyen kwei ei minu ndig Antiokhia leu api ibong bit yo di inggre kin mbusyamei mem ari bingwam nitindur gom bingginau tungwatu imang bibor. Mpe dima cem tungwatu nya kindi ijem yo di ingon jo kep nya ei minu ndig Antiokhia inyeng Kresten.
27Mpe dima cem nabi nya ibou poi ijo leu minu ndig Yerusalem bikwei ei minu ndig Antiokhia. 28#Kis. 21:10 Nabi Agabus cem ningat rin bit yok. Noni kiju biya lene ba nisindemti leu Allah Ninnei bimbot kep tut ninggum nindig bibor di mikieng kep dihyei nisurti-nipekti. (Ba, nimbot kepti dima cut igkep tungwatu nya ei mpe dino Klaudius nok nibou ndig mem yok.) 29Gima rino yo di ibit Yesus ice tut yam hyet bikwas mitiei tut isut bat yo di ingon jo kep nya ei hanjop Yudea. Bikwop tungwagom-gom kwas mitiei bit leu nimati nya. 30Igyai hagom bit leu nok ice tut yamti dima lene ikes mitiei di ikwas tu dima bak Barnabas kin Saulus ba, yo cin dima ipwoi biyuug sut bigyai bak nibou mbusyamei nya.
Currently Selected:
KISAH 11: HAD
Highlight
Share
Copy
Want to have your highlights saved across all your devices? Sign up or sign in
