KISAH 26
26
Paulus mbrap gau nonti ei Agripa noho bei
1Agripa pai bak Paulus “Nisindui sut ba, ambrap gau nanti nogindini.” Gima rino Paulus kimut ninda kep yo di idem yam dima leu api mbrap gau nonti bipai biyok,
2“Na di Nibou Ndig Agripa Di Anyeng Jei e, diba dingon di llei biya ei aho bei njap di ammani bidimbrap gau danti drek dip mun di mben Yahudi injei kep da tut nya hagom. 3Ningat ne dingon llei bibor lewo na di Andigpoi akan bidem tut mben Yahudi igyai kepti nya kin mun di bindei dino iba ighyet bidahat yam cem. Gima rino dahara bak nadi Andigpoi leu binhyepo aom angon tut da ba, angig atingou mem dihyet.
4Mben Yahudi yahagom ikan bidem tut diyai munti nya habiei dimien kikau kwei bipek ammani kep. Ikan bidem tut diyai kepti gi nipou nya ei ditimieisi kin minu ndig Yerusalem cem. 5#Kis. 23:6; Flp. 3:5 Ikan bidem tut diyai munti nya mimbrek tu. Gino ijoi sut ne dem mem ipai jit bipia ningat ne dinggre kin nimpung Farisi bidibit Allah nidimig sutti di nddong kei nya hagom nipou kwei bipek ammani kep. 6Ba, diya ei aho bei njap di ammani leu binhyepo ambus dingonti drek dip gi diba dingon com mun di Allah preu ei mem nyende pung di nintun him nya. 7Nyende pung di nintun him ibou simnaibrimigcan ikuk yok bak Allah bikwop mmun-njap ba, igyok ingon mem mun di Noni preu ei mem yok. Na di Andigpoi e, mben Yahudi ipai da kinei drek dip mun di Allah preu ei mem nye. 8Nggon rino disut bat di mben Yahudi di isrig ikieti ikan bipia bit bon Allah win nimai hanyen leu jui nsi kan bi i?
9 #
Kis. 8:3, 22:4-5 Nipou yo ne jo nibreisi bipia dikan bigya suar dimbuk tut Yesus di nitimieisi leu minu ndig Nazaret tug hon nisinati hagom. 10Ba, diyai midyai dima ei minu ndig Yerusalem. Diba srat nisindemti di imam nindig nya igyai bida bikat yo di ingon gom tut Allah imang bibor bidinggam yok ei ig bui nsi. Dani kin Nikei Puig Yahudi Nya nice tut yam tirigi ijem nimai gau yo dima. 11Dihwen bit yok bidem mben Yahudi ide ig mbusyamei mang bibor leu binhyepo dibindei ba, ibikep ser ide niba ingon com Yesusti. Dingon sibui sut yok nindig bibor biduhuk yok ug ei ingkiaisi cem leu binhyepo dihwen bit yok ei minu dima yok cem.”
Paulus pui sut niba ningon com Yesusti
(Kis. 9:1-19, 22:6-16)
12“Tut gima ne dipwoi srat nisindem leu imam nindig nya ba, duug sut ei minu ndig Damsyik. 13Na di Andigpoi e, Gima rino dimbut biduug ei puig sinon mem mpia huk pijum lene ninjeng di piga kei di nindig dor njiriek mpia nicomti com kros leu mpia-bbed him bipiga digai diyati kin yo di ibit da cem igyati. 14Nahagom nitti ug ei dihyeisi leu lene dimiap nihyet gom di ba nihyet Ibrani bihig ser da ‘Saulus e, Saulus e, Nggon rino ahwen bit Da bijo kikau i? Gino atte tut No di nok ade nibou bitut ningon kanti mem na kikau ne abindei nanti anggwen.’ 15Gima rino dibuhup ‘Na di Andigpoi e, anyeng tou i?’ Leu api Tuhan buhup ‘Dani ne Yesus di ahwen bit Da pima ri. 16Akiju ba, aya pijum! Dindo Danti brei bina leu binhyepo didimig na bidibindei ba, anok awak mem Da. Suar atri tut Da di angat bou ayai him njap di ammani kin mun di dindo bina ei nidipti bu cem bak tungwatu nya. 17Miditeu na ba, angwes ngun leu mben Israel indati kin ngkiai nya indati. Lewo dipinak na ndam yok, 18leu binhyepo apiga igyai ba, acen yok leu nidinditi ug ei nipigati. Leu binhyepo Bilis ninyeng tak kep yok bu bi noro Allah ninyeng tak kep yok. Allah mikos ser ide sisar tug hon ide niba ningon com Dati apino inggre kin Allah de limwa di Noni dimig ei su nya.’ ”
Paulus pui sut nide midyai
19“Na di Nibou Ndig Agripa e, dibrim dingkek kikau bidibit ningat-hi-ngat di Allah bindei bidingat bou diyai him dima. 20#Kis. 9:20, 28-29 Ditri tut nihyet bak tungwatu nya bipia suar ittin ser ide sisar lene iba ingon com Allah ba, iba igyai munti nya cem bindo brei bipia ittin ser ide sisar. Ditri tut nihyet dini ei minu ndig Damsyik nipou leu api ei minu ndig Yerusalem lene bidem hanjop Yudea cem ba, kikau ug bipek ngkiai nya. 21Gima rino mben Yahudi ikat da ei Tuhan De Ig bipi bigyai nimai bida drek dip. 22Noro Allah nyohou da habiei kikau kwei bipek ammani kep. Gima rino diya diyati dini biditri tut mun di dingat bou diyai him bak tungwatu yahagom bitut yo di inyeng jei kin yo di ibon inyeng bi. Nihyet di tibim ei duhui him dem igbit mun di nabi nya kin Musa ipai sut mipek kep mem nye. 23#Yes. 42:6, 49:6; 1Kor. 15:20 Ipai bipia Nibou Ndig di teu tungwatu biyai niyaijo nijep biyok di Allah preu ei mem yok pima miyai nimai leu api kiju hanyen leu nimai eisi bibie leu binhyepo Noni bon nikwesti mem mben Yahudi kin ngkiai nya igyai niteu leu sisarti kin niyaijo nijep ba, gini ne nipigati di piga digai yok ri.”
24Tirigi Paulus mbrap gau nonti tut nide midyai nya rino Festus mbrua kep noni kros bipai “Paulus e, mirei bon na! Abou ngwak sibui sut mun di guru nya ingginau na tut yo!” 25Noro Paulus buhup “Na di Andigpoi Di Anyeng Jei e, mirei bon da bi. Ditri tut mun di nijit nok tungwatu. 26Na di Nibou Ndig Agripa akan tut mun dini yok hagom tu. Gima rino dibrim dingkek kep na lewo dikan tut bipia nihyet di ditri tut dima hagom jo nibreisi mem na di Nibou Ndig. Mun di ditri tut dima hagom pek kep ei nidinditi bi. 27Na di Nibou Ndig Agripa Di Anyeng Jei e, angon jo kep mun di tibim ei nabi nya yuhui him e? Dikan tut bipia angon jo kep tu!”
28Lene Agripa pai bak Paulus “Ambrap mbigom dini he leu api akan bipia abindei bidinok no di Kresten e?” 29Paulus buhup “Dimbrap mbigom mbican lene nirin lo, dingat nadi bak Allah leu binhyepo na di Nibou Ndig kin je di nindigsi di jimiap kep dihyet njap di ammani jahagom jinok dani. Noro tut lante dini yok bi.”
30Gima ngwig leu lene nibou ndig kin nibou hanjop kin Bernike kin nindigsi nya yahagom ikiju bigya. 31Niabiati yehei ug ei nisai leu lene ipai biyam “No dima yai mun tunggwei leu dima inggam noni ei ig bui nsi bigyai nimai bak drek dip bi.” 32Lene Agripa pai bak Festus “Dem mem ikes noni leu nisima eisi tu lo, nihyet jo kep bipia suar noni ya ei Kaisar Roma nonti noho bei drek dip nide munhyet dini.”
Currently Selected:
KISAH 26: HAD
Highlight
Share
Copy
Want to have your highlights saved across all your devices? Sign up or sign in
