KISAH 4
4
Petrus kin Yohanes igya ei Nikei Puig Yahudi Nya yoho bei
1Petrus kin Yohanes itri nihyet bak tungwatu ningot ndig pima yok sri lene imam nya ibou poi kin yo di igya ser Tuhan De Ig ide nibou nya kin Saduki nya ibou poi ittau kep yok. 2Ingon sibui sut Petrus kin Yohanes lewo itri tut bipia Yesus kiju hanyen leu nimai eisi tu. Ba, nikiju hanyenti ne bindo bipia tungwatu nya cem mikiju hanyen leu imai eisi. 3Gima rino ikat tungwa cin di igya kui Yesus dima binggam yok ei ig bui nsi. Gima rino Petrus kin Yohanes isima kikau binjap kep lewo mpia mmun ser tu. 4Noro tungwatu ningot ndig di imiap nihyet di yo di igya kui Yesus ingginau yok tut dima imang bibor ingon jo kep. Apino yo di ingon jo kep nya ibikum eisi bu ba, imangti ibou sribu muhwi.
5Njap di hyep bu ne Nikei Puig Yahudi Nya kin nibou kintrorti nya kin guru puig timiei nya yahagom induk yam ei nittou nsi gom ei minu ndig Yerusalem. 6Ba, Imam Nibou Ndig Hanas kin Kayafas kin Yohanes kin Aleksander kin Hanas nide bat nya cem yahagom ingat ri. 7Bihi ibuwak Petrus kin Yohanes kwei bigya ei yoho bei leu api ihig pus yok “Jinggon ndei no di nimig lit di kei hanyen dima i? Ma jipai igbit tut jide nisindemti binye. Jiyai nisindemti dima tug hon tou ninyeng i?”
8Petrus ba Allah Ninnei De nisindemti bibuhup “Je di nibou kintrorti kin je di Nikei Puig Yahudi Nya e, 9jimbus nyeni ningonti tut no di nimig lit di nyeni ningondut kin notou nibindei ba, noni kei hanyen bu cem. 10Suar je di nibou nya jahagom kin mben Israel yahagom jiyok ngon kep bipia nogindini no di nimig lit ya bibie joho bei bikei hanyen tug hon Yesus leu minu ndig Nazaret De nisindemti. Apo jipek Yesus kin biei salib noro Allah win Noni hanyen leu nimai eisi tu. 11#Mzm. 118:22 Srat bokti tut Yesus di ipas ei Gi Preu Nitimieiti pai ‘Tig mma di je di tukan jikou sut dima ne cou nipmem di bon ninyeng dor njiriek tig mma nindigsi nya hagom ri.’
12Tungwatu nya igyai niteu leu sisarti kin niyaijo nijep tug hon Yesus Nongkom he. Lewo tungwa hi leu tungwatu nya ikieti ei dihyeisi dini nisurti-nipekti hagom gi yai nisindemti leu Allah mem gima teu nye leu sisar kan bi.”
13Nikei Puig Yahudi Nya inggap leu tut Petrus kin Yohanes di iji ngkiem nok gima. Ikan tut bipia yo cin dini igyai inyeng bicoi pikor cem bi. Lene jo nibreisi mem Nikei Puig Yahudi Nya bipia yo cin dini ne yo di igya kui Yesus ri. 14Noro bit bon Nikei Puig Yahudi Nya ibuhup ighyet kan bi lewo ingat no di kei hanyen dima ya ei yoho bei brei bou igyai him bit Petrus kin Yohanes. 15Gima rino icuk Petrus nya biyuug leu ninsi Nikei Puig Yahudi Nya ide dima bigwam ei nisai mbigom leu api isimbot kep biyam tut yok. 16Yoni ihig yam “Nyeni inggon ndei yo dini i? Lewo timiei minu ndig Yerusalem yahagom ikan tut bipia ibon mindur nindig bibor tu. Bit bon nyeni itte tut kan bi. 17Gima rino jikwei ba, iggai ser yok bingkiem leu binhyepo itri tut nihyet bak tungwatu nya tug hon Yesus ninyeng bu au. Tug hon nisinati dima lene mindur dini nibimbiti mitibim bikieng kep minu nindigsi nya bi.”
18Lene ihig yo cin dima bicoi hanyen kwei leu api icuon ser yok ngkiem bipai “Harin dima jindat kep Yesus ninyeng bijingginau tungwatu nya tut Noni cem hanyen bu a.”
19Noro Petrus kin Yohanes ibuhup “Ma jenti jihig yam tut mun di nijit di Allah joi sut. Nibit jenti jihyet e, he ma nibit Allah nihyet e, he notou i? 20Lewo bit bon nikimut nuhui leu mun di ningat bou niyai him binimiap ei nitingou nsi cem kan bi.” 21Bit bon Nikei Puig Yahudi Nya ipai mun bibisu tindei mem gima igyai ninghuisi di wei bak yo cin kan bi. Gima rino ikon ighyet kep yok mbigom kin bu leu api ikes yok nyahan bimbut lewo tungwatu yahagom inggei sut Allah tut mindur di pek kep mem no dima. 22No di kei hanyen tug hon mindur dima nide njap ug ei ari bingwam ningot bitai binjiriek tu.
Yo di ingon jo kep nya yahara mem nibrim ningkekti leu Allah
23Niabiati Nikei Puig Yahudi Nya ikes yok leu lene Petrus kin Yohanes ingkwei hanyen bingat isut bat yo di inggre kin mbusyamei nya bipui sut mun di imam kin nibou kintrorti nya icug yok tut. 24#Kel. 20:11; Neh. 9:6; Mzm. 146:6 Tirigi isut bat nya imiap mun di ipui sut dima lene iba ingon gom bingat nadi bak Allah bipai “Na di Tuhan apai tes mpia-bbed him kin dihyeisi dini kin muk ngeisi tut mun di joti nya hagom. 25#Mzm. 2:1-2 Aba Allah Ninnei bipai angon kanti tug hon nyeni nidigup Daud. Noni ne Ade awak rin di pai ‘Nggon rino yo di ninghim Tuhan ingon sibui i? Nggon rino ngkiai dihyeisi dini yuhum yam nsi tut mun di bon ninyeng bi i?
26Nibou ndig dihyeisi dini injei siceu ba, yo di inyeng jei nya igyok ingon gom cem leu binhyepo itte tut Tuhan kin Nide Nibou Ndig di teu tungwatu biyai niyaijo nijep biyok.’
27 #
Mat. 27:1-2; Mrk. 15:1; Luk. 23:1, 7-11; Yoh. 18:28-29 Ba, gima igbit lewo Herodes kin Pontius Pilatus induk yo di ninghim Tuhan kin mben Israel ei gom ei minu ndig dini leu binhyepo itte tut Yesus di Ade Awak di kwes-kwau di Nani adimig ei nok Nibou Ndig di teu tungwatu biyai niyaijo nijep biyok. 28Idem yam leu binhyepo igyai mun di hagom bit leu nok akos tutti nipou su tut mun di micut igkep Noni. Ba, akos tut mun di mipek kep nya hagom tug hon Ade nisindemti kin angon kanti. 29Na di Tuhan e, nogindini angig ayai kep yo dima icug nyeti nya. Ba, ampu Ade awak di nyeni leu binhyepo nibrim ningkek tut nihyet Ade bak tungwatu nya. 30Ampu nye leu binhyepo tungwatu nya ikei hanyen ba, abon bindo kin mindur tug hon Yesus ninyeng di sindem bibor cem lewo Noni ne Ade Awak di kwes-kwau ri.”
31Tirigi ingat nadi bingwig leu lene ig di imbus yam eisi ugwa-kwei. Allah Ninnei srek kwei ei yahagom dip bisindem tut yok apino ibrim ingkek tut Allah nihyet kep tungwatu nya.
Yo di ingon jo kep nya ibippiet ide mun di inyeng tut nya biyam
32 #
Kis. 2:44-45
Yo di ingon jo kep nya yahagom ingon kin innei gom kin yam ba, hi drui kep nide mun di nyeng tut bi. Noro ibippiet hagom biyam. 33Yo di igya kui Yesus igyai nisindemti nindig bibor mem gima itri tut Tuhan Yesus nikiju hanyenti di yoni ingat bou igyai him. Gima rino Allah singat tut yok nindig bibor. 34Hi di srig yo di ingon jo kep nya ikieti nuhwap mbum bi. Lewo yo di inyeng tut dihyei hanjop nsi kin ig nya itri mun dima yok bibipek mitiei leu api ipwoi mitiei dima kwei, 35bigyai bak yo di igya kui Yesus leu api yoni ikwas mitiei dima tut yo di ihwap mbum nya. 36Nok gima tut Yusuf cem. No dini ntun pung Lewi him ba, nitimieisi leu Mios Siprus. Yo di igya kui Yesus ijem ninyeng hi Barnabas (ninyeng dima noyam kin niwin kep tungwatu ingonti), 37di tri nide dihyei hanjop nsi gom bibipek mitiei lene pwoi mitiei dima kwei biyai bak yo di igya kui Yesus.
Currently Selected:
KISAH 4: HAD
Highlight
Share
Copy
Want to have your highlights saved across all your devices? Sign up or sign in
