KISAH 8
8
1Ba, Saulus cem ningon kei sut Stefanus nimaisi.
Saulus hwen bit yo di inggre kin mbusyamei
Ei njap gom ndia lene tungwatu nya sindi ihwen bit yo di inggre kin mbusyamei ei minu ndig Yerusalem nindig bibor. Gima rino yo di ingon jo kep nya inang bintek gimahap bidem hanjop Yudea kin Samaria noro yo di igya kui Yesus igwam nyahan bintek gimahap bi. 2Lene yo di ikuk yok bak Allah ibou poi itig Stefanus ningut lo, ingon ngguk bibor bipim kui jei sut.
3 #
Kis. 22:4-5, 26:9-11 Noro Saulus hwen kikep yo di inggre kin mbusyamei binggek yok. Noni ug cut igkep yok ei ide ig bei sindam leu api kat pinai nya kin sop nya binggam yok ei ig bui nsi.
Filipus tri tut Nihyet Di Kei ei minu Samaria
4Yo di ingon jo kep nya di intek gimahap pima itri tut Nihyet Di Kei bidem minu dima kou hagom. 5Filipus ug ei minu ndig gom ei Samaria leu api tri tut Nibou Ndig di teu tungwatu biyai niyaijo nijep biyok di Allah preu ei mem yok. 6Tungwatu ningot ndig ingig itingou mem Filipus nihyet bingat mindur di noni bibon bou igyai him apino imang bibor igyok ngon kep nihyet di tibim ei nuhui him. 7Lewo ninnei rom nya di igya ei tungwatu ningot ndig ingonti iba ighyet biyahara leu api yehei leu yo dima ingonti. Yo di inggicai nya kin yo di imig lit nya imang bibor ikei hanyen. 8Gima rino mben Samaria nya ingon llei bibor.
9Ei minu ndig dima cem Simon di ninda dut no rima. Timiei Samaria nya inggap leu tut noni tut mun di noni ba ninda dut biko ninno tu dima. Lene Simon ba ningon di jei sut nonti bitri tut bipia noni mipbor ngat. 10Gima rino timiei nya leu yo di yuhui mbum bipek kin timiei di inyeng jei ei minu ndig dima yahagom igyok ngon kep Simon nihyet bisimbot kep biyam bipai “No dini ne ‘Nisindemti Nindig Bibor’ di kwei leu Allah ri.” 11Mun di noni ba ninda dut biko ninno tu dima bindei ba, tungwatu inggap leu tut noni nindig bibor bigyok ngon kep nihyet. 12Noro Filipus tri tut Nihyet Di Kei tut Allah Ninyeng Tak Kepti kin Yesus Kristus di Nibou Ndig di teu tungwatu biyai niyaijo nijep biyok. Lene pinai nya kin sop nya ingon jo kep Filipus nihyet leu api itur yok ei minyeiti. 13Simon cem ningon jo kep Nihyet Di Kei. Tirigi itur noni ei minyeiti leu lene noni bit-bit nyen Filipus binggap leu tut mindur kin bindo di noni bibon nya.
14Yo di igya kui Yesus di ingat rin ei minu ndig Yerusalem imiap mben Samaria inghapti tut gi ingon jo kep Allah nihyet tu. Gima rino ipinak Petrus kin Yohanes ug ei minu ndig dima. 15Tirigi ikwei krau minu Samaria lene ingat nadi mem yo di sindi ingon jo kep nya leu binhyepo Allah Ninnei srek kwei ei ingonti, 16lewo Noni srek kwei ei ingonti bisindem tut yok bigyo. Sindi itur yok ei minyeiti tug hon Yesus ninyeng he yo. 17Gima rino Petrus kin Yohanes ikes inda ei timiei minu ndig Samaria dip bibindei ba, Allah Ninnei srek kwei ei ingonti.
18Simon ngat lo, yo di igya kui Yesus ikes inda ei yo dima dip bibindei ba, Allah Ninnei srek kwei ei ingonti. Lene noni yai mitiei bak Petrus kin Yohanes, 19lene pai biyok “Jikwas nisindemti dini ndrim hi tut dani cem leu binhyepo dikes dinda ei tungwatu dip leu api Allah Ninnei srek kwei ei ingonti.”
20Noro Petrus buhup “Ma ade mitiei pror tut na ei nikineisi hak ug! Akan bipia aba mitiei bipek nisindemti di Allah yai bina e? 21Adem mem ayai midyai dini bit nye bi lewo angon sren ei Allah niyai him bi. 22Gima rino ma attin ser angon kanti di kinei dima leu ba, angat nadi bak Allah leu binhyepo Noni kos ser angon kanti di kinei dima hak ug! 23Lewo dikan tut bipia angon kinei sut nye nindig bibor ba, mun di sibut srou na cem.”
24Lene Simon hara Petrus kin Yohanes bipai “Ma jingat nadi bak Tuhan leu binhyepo mun di jipai kep dati dima hi cut igkep da bi.”
25Niabiati Petrus kin Yohanes itri tut Yesus di ingat bou igyai him bitri tut Allah nihyet mbigom kin bu leu lene ingkwei hanyen ug ei minu ndig Yerusalem. Yoni imbut bitri tut Nihyet Di Kei kak puig sinon ug ei hanjop mang bibor sindam ei minu Samaria.
Filipus ug um mben Etiopia gom di ninyeng jei
26Lo bi lene Tuhan de malaikati gom pai bak Filipus “Akiju! Aug ei bei mpia nibiho#8:26: Nipas kep ei bei mpia nibiho cem kei lene nipas kep mem mpia huk pijum cem kei. ba, akak puig di jo leu minu ndig Yerusalem bibie ug ei minu ndig Gaza ei iggum ndigsi.”#8:26: Nipas kep ei iggum ndigsi cem kei lene nipas kep di tungwatu imbut kak bu bi cem kei. 27Gima rino Filipus mbut hak ug. Nok rino noni um mben Etiopia gom di ninyeng jei di ngkwei hanyen ug ei nitimieisi. No dini ne no di nibou kintror di ninyeng jei di ninyeng tak kep mitiei hagom di jo bak nibou ndig sop Kandake ei minu Etiopia ri. Noni ug kuk no bak Allah ei minu ndig Yerusalem, 28leu api bri nide kroba pran bingkwei hanyen ug ei nitimieisi lo, kwop Srat Nabi Yesaya kak puig sinon. 29Allah Ninnei pai bak Filipus “Aug ya kui kroba pran dima ba, asir nitta.” 30Noni ug ya kui kroba pran bimiap lo, andigpoi dima kwop Srat Nabi Yesaya. Gima rino Filipus hig ser noni “Andigpoi e, angon dorti tut srat bokti di akwop dima e?”
31No dima buhup “Gino tungwagom pingok da tut bi lene notou mem dingon dor niti i?” Lene noni cigit Filipus bikui ei krobati bit noni. 32#Yes. 53:7-8 Srat bokti di noni kwop dima pai “Ibuwak Noni nok ijem domba mem ibui bidigo. Nok domba pmot di ikos ninta leu lo, hara bahap niji cem bi. 33Tungwatu inim kep Noni lene iba ingon di sren bi bibon Noni. Bit bon hi pui sut yo di intun Noni him kan bi lewo niyaijo ei dihyeisi dini dem tu ba, hi di ntun Noni him cem bi.”
34Andigpoi di ninyeng jei di kwei leu minu Etiopia dima hig ser Filipus “Apai mingat bida. Nabi dini pui sut tou i? Pui sut nonti e, he pui sut hiter?” 35Gima rino Filipus ba srat bokti dima nok nitriti bibuhup no dima nihyet bitri tut Nihyet Di Kei tut Yesus binoni. 36Yo cin dima imbut kak puig sinon biyuug krau minyei utti gom. Andigpoi pai “Angat i, minyei ut rimo! Mindei bu ribindei dino ma atur da ei minyei ut dimati bi i?”
[37Lene Filipus buhup “Gino aba angon titut yam bingon jo kep Yesus lene dice tut ba, ayai nitur na ei minyeiti hak ug.” Andigpoi leu minu Etiopia dima pai “Dingon jo kep bipia Yesus Kristus ne Allah Nipmot ri.”]
38Lene andigpoi cuk sigbir bikes kroba pran biya leu api Filipus kin noni ikinyon ba, ijuk ug ei minyeisi lene Filipus tur noni ei minyeiti. 39Hammi tirigi ikiju kui leu minyei ugyousi rino Allah Ninnei teu Filipus leu mpia ttou nsi dima. Andigpoi dima ngat noni bu bi. Noro ba ningon di llei bibor bikak puig dima kikau. 40Lene Filipus ngat lo, noni kwei krau minu ndig Asdod kros. Ba, noni tri tut Nihyet Di Kei bidem minu ndig nya hagom kak puig sinon kikau buug krau minu ndig Kaisaria kep.
Currently Selected:
KISAH 8: HAD
Highlight
Share
Copy
Want to have your highlights saved across all your devices? Sign up or sign in
