YOHANES 14
14
Yesus ne puig di ug ei Nicig nidim ri
1Yesus pai biyok “Ma jingon buhun bijingon bos-bos nyen au. Ma jiba jingon com Allah lene jiba jingon com Dani cem. 2Dicig de ig bon ninsi mang bibor. Da duug ei mpia ttou nsi dima leu binhyepo ditin ei nghim nsi mem je. Gino dipaisi dini igbit bi lene midipai nok bije bi. 3Niabiati bu tirigi duug tin ei nghim nsi mem je biput tu lene midikwei buwak je hanyen ug ei mpia ttou nsi dima leu binhyepo jigwam bit Da kikau. 4Jikan tut puig di bie ug ei mpia ttou nsi dima.”
5Lene Tomas hig ser Noni “Tuhan e, nikan tut mpia ttou nsi di aug eisi dima bi. Notou nikan tut puig di bie ug ei mpia ttou nsi dima i?”
6Yesus buhup “Dani ne puig mem nibikan tut Allah nijit-jausi kin nibiyai niyaijo nijepti ri. Bit bon no di tug hon Da bi ug ei Dicig nidim cem kan bi. 7Gino jikan igbit tut Dani lene jo nibreisi bipia jikan igbit tut Dicig cem. Hon kep ammani kui ne jikan igbit tut Noni bijingat igbit Noni.”
8Gima rino Filipus pai bak Yesus “Tuhan e, ando Acig brei binye lene dem.”
9Noro Yesus buhup “Filipus e, digwam bit je ninno tu noro akan igbit tut Da bigyo e? No di ngat igbit Da ngat igbit Dicig cem tu. Nggon rino ahara Da mem dindo Dicig brei bije i? 10Filipus e, angon jo kep bipia dinok gom kin Dicig ba, Dicig cem nok gom kin Da bi e? Nihyet di ditri tut bije kwei leu dingon kanti bi. Dicig di nok gom kin Da bindei mbut Nonti nikos tutti. 11Ma jingon jo kep Da tirigi dipai bipia dinok gom kin Dicig ba, Dicig nok gom kin Da. Gi bi ne ma jingon jo kep Da tug hon midyai di diyai nya. 12#Mrk. 16:19-20 Dipai nijit bije bipia no di ba ningon com Da miyai midyai noyam kin midyai di diyai nya. Ningat ne noni miyai midyai nindig bibor dor njiriek bu lewo duug gwam bit Dicigya. 13Mun nyeng dino jahara Da tut tug hon dinyeng lene midibirop hanyen bije leu binhyepo Dicig de nikei-kau-keisi jo nibreisi tug hon Nipmot di Dani. 14Mun nyeng dino jahara Da tut tug hon dinyeng lene midibirop hanyen bije.”
Yesus preu ei mem yok tut Ninnei Gi Kwes nikweisi
15 #
1Yoh. 5:3
“Gino jingon ngakei Da lene jibindei mbut Ditde nicukti nya. 16Dahara Dicig leu binhyepo Noni cuk No Di Mpu je#14:16: Nipas kep No Di Mpu je cem kei lene nipas kep No Di Gwam Ser jingon cem kei lene nipas kep No Di Biwin kep jingonti cem kei lene nipas kep No Di Ya Srak Ko Hagau je cem kei. hi kin bu. No dima migwam bit je kikau. 17No dima ne Ninnei Gi Kwes di mbot kep tut Allah de nijit-jausi bije ri. Bit bon tungwatu dihyeisi dini igyai Noni ei ingonti kan bi lewo bit bon ingat Noni bikan tut Noni cem kan bi. Noro jikan tut Noni lewo Noni gwam bit je ba, Noni nok gom kin je cem.
18Tirigi dimbut leu lene midikes je ei bijinok moibihi nya bi. Noro midikwei ngat je hanyen bu. 19Jei bi lene tungwatu dihyeisi dini ingat Da bou igyai him bu bi. Noro mijingat Da hanyen bu. Mijiyai niyaijo nijep tug hon Ditde niyaijoti. 20Tirigi njap dima dem lene mijikan tut bipia dinok gom kin Dicig lene jinok gom kin Da bit leu gi dinok gom kin je.
21No di ce tut bibit Ditde nicukti nya ningon ngakei Da. Dicig ningon ngakei no di ningon ngakei Da. Dani cem dingon ngakei noni bidindo Danti brei bak.”
22Yudas (di ter leu Yudas Iskariot) hig ser Noni “Tuhan e, nggon rino ando Nanti brei binyeni lene ando Nanti brei bak tungwatu dihyeisi hagom sindam bi i?”
23Yesus buhup “No di ningon ngakei Da bit Ditde ningginausi. Dicig cem ningon ngakei noni leu api Dicig kin Dani nikwei coi ei ningonti. 24No di ningon ngakei Da bi dima bit Ditde ningginausi cem bi. Ningginausi di tibim ei jitingou nsi kwei leu dingon kanti bi noro kwei leu Dicig di cuk Da kwei ningon kanti.
25Ditri tut dihyet dini yok hagom bije tirigi digwam bit je yo. 26Noro Dicig micuk Ninnei Gi Kwes di nok No Di Mimpu je kwei tug hon dinyenga. Noni ngginau jingonti tut mun nyeng hagom lene bindei ba, jiyok ngon kep mun di dipai bije hagom.
27 #
Flp. 4:7
Diyai ningon di jo nyahan bije. Ningon di jo nyahan dima ne Ditde rin ba, dikwas ndrim hi tut je. Ningon di jo nyahan di diyai bije noyam kin ningon di jo nyahan di tungwatu dihyeisi dini igyai bije bi. Ma jingon bos-bos nyen ba, jingon digit cem au. 28Jimiap dihyet di dipai bije ‘Dimbut rin noro midikwei ngat je hanyen bu.’ Gino jingon ngakei Dani lene mijingon llei sut gi dingkwei hanyen ndam Dicig lewo Noni ninyeng jei dor njiriek Da. 29Ditri tut dihyet dima brei bije nipou tirigi pek kep mem je bigyo leu binhyepo gino pek kep ei nidipti bu lene jingon jo kep Da. 30Dimbrap bit je kikau bi lewo tto bou mem no di ninyeng tak kep dihyeisi dini dideu su. Noro noni sindem mem gima om kep Da bi. 31Mbro nok gima lo, suar mun dima hagom cut igkep Da leu binhyepo tungwatu dihyeisi dini ikan tut bipia dingon ngakei Dicig ba, dibit nicuk Dati nya hagom.
Jikwei ba, imbut leu mpia ttou nsi dini.”
Currently Selected:
YOHANES 14: HAD
Highlight
Share
Copy
Want to have your highlights saved across all your devices? Sign up or sign in
