YOHANES 17
17
Yesus ngat nadi tindei yo di ibit Noni
1Tirigi Yesus kes nihyet hon tu lene Noni tou kep ginyo kug bipai bak Allah “Arig e, tto bou dem tu. Ma abindei ba, Apmot ninyeng jei bibor leu binhyepo Apmot mibindei ba, anyeng cem jei bibor. 2Arig e, ayai nisindemti biNoni leu binhyepo ninyeng tak kep tungwatu dihyeisi hagom ba, yai niyaijo nijep di jo kikau bak yo dino akes yok biNoni yahagom. 3Gino tungwatu nya iba ingon com bipia Nani ne Allah gom ngat di nijit rin ba, iba ingon com Yesus Kristus di acuk kwei lene igyai niyaijo nijep di jo kikau. 4Dindo Ade ninyeng jei biborti bak tungwatu dihyeisi dini tug hon midyai nya di akes biDa ba, hagom put tu. 5Arig e! Nogindini ma angkwei Ade ninyeng jei biborti di siyai bit yam nipou tirigi apai tes dihyeisi dini bigyo hanyen biDa.
6Dibindei ba, yo di akes biDa ei dihyeisi dini ikan tut Na tu. Anyeng tak kep yok habiei leu api akes yok biDa. Yoni ibit ahyet tu ba, 7tini bu ne ikan tut bipia ningat ne mun nyeng hagom di akwas tut Da kwei leu Nani habiei su. 8Ditri tut nihyet di asok ei Da dip bak yoni leu api igyai hagom ei ingonti tu. Yoni ikan tut bipia Ditde nijuk kwei leu Nati ne nijit-jau rin ba, ingon jo kep bipia acuk Da kwei.
9Dingat nadi tindei yok. Dingat nadi tindei tungwatu dihyeisi dini bi noro yo di akes yok biDa lewo anyeng tak kep yok. 10Ditde limwa nya yahagom ne Ade limwa nya ri. Ade limwa nya yahagom ne Ditde limwa nya ri. Diyai Dinyeng jei biborti tug hon yoni. 11Jei bi ne dihwou ndam Na. Digwam ei dihyeisi dini kikau bi noro yo di igya kui Da rino igwam ei dihyeisi dini yo. Arig di angon kwes-kwau e! Ma aba Ade nisindemti binyohou yok noyam kin gi abindei ba, Dani cem diyai nisindemti leu binhyepo yahagom inok gom kin yam bit leu nok sinok gom kin yam. 12#Mzm. 41:10; Yoh. 13:18 Tirigi digwam bit yok ne diba anyeng di sindem di ayai biDa binyohou yok apino ingwes ngun. Hi srawir bi. Noro no di suar srawir nongkom he. Suar noni srawir bit leu nok gi ipas kep ei Allah nihyetti. 13Jei bi ne dihwou ndam Na. Noro ditri tut dihyet dini hagom brei tirigi digwam ei dihyeisi dini leu binhyepo yo di ibit Da igyai Ditde ningon llei titut yam ei ingonti. 14Ditri tut ahyet bak yo di ibit Da apino tungwatu dihyeisi dini ingon mpo tut yok lewo inggre kin tungwatu dihyeisi dini bi. Gima bit leu nok Dani cem dinggre kin tungwatu dihyeisi dini bi. 15#1Yoh. 2:13-14, 5:18 Dahara Na leu binhyepo ateu yok leu dihyeisi dini bi. Noro ma anyohou yok leu binhyepo ingwes ngun leu Nisibut Cig. 16Dinggre kin tungwatu dihyeisi dini bi lene yoni cem inggre kin tungwatu dihyeisi dini bi. 17Ma adimig yok ei mem Nanti tug hon nijit-jausi. Nihyet Ade ne nijit-jau ri. 18Dipinak yok lene intek gimahap ug ei dihyeisi dini bit leu nok apinak Da kwei ei dihyeisi dini. 19Didimig Danti ei mem Na leu binhyepo yoni cem idimig yonti ei mem Na tug hon Ade nijit-jausi. Diyaisi dima bon ninyeng mem yok.
20Dingat nadi tindei yoni he bi noro bitut yo di hiter di ingon jo kep Da tug hon nihyet di yoni itri tut Da cem. 21Arig e, handeikon ba, yahagom inok gom kin yam bit leu nok sinok gom kin yam. Ma yahagom inok gom kin Sa leu binhyepo tungwatu dihyeisi dini ingon jo kep bipia Nani rino acuk Da kwei. 22Diyai ninyeng jei biborti biyok noyam kin ninyeng jei biborti di ayai biDa leu binhyepo yahagom inok gom kin yam bit leu nok sinok gom kin yam. 23Dinok gom kin yok ba, Nani anok gom kin Da ba, yahagom inok gom kin yam leu binhyepo tungwatu dihyeisi dini ikan tut bipia Nani rino acuk Da kwei ba, angon ngakei yok bit leu nok angon ngakei Da.
24Arig e! Dijoi sut bipia igwam bit Da ei mpia di dingat rin eisi leu binhyepo ingat Ditde ninyeng jei biborti di ayai biDa bou igyai him. Lewo angon ngakei Da ei nimbie him nipou tirigi apai tes dihyeisi dini bigyo. 25Arig di ningon sren-srau e! Tungwatu dihyeisi dini ikan tut Na bi sren noro dikan tut Na ninno tu. Yo dini ikan mungkun tut bipia acuk Da kwei. 26Dimbot kep biyok tut Nani tu ba, midimbot kep biyok tut Nani kikau bu leu binhyepo ingon ngakei yo di hiter bit leu nok angon ngakei Da ba, dinok gom kin yoni cem.”
Currently Selected:
YOHANES 17: HAD
Highlight
Share
Copy
Want to have your highlights saved across all your devices? Sign up or sign in
