YOHANES 19
19
1Leu api Pilatus ngkwei hanyen ug ei ig nibou ndig bicuk tentara nya “Jikat Yesus bijimbas Noni hak ug.” 2Tentara nya inghau cibou nggwen bibijuk Yesus nibou bittin nok topi leu api ijuk sinsun ngwoi di jei di ndok di jei ei Noniti, 3lene ingkwei-ngkwei nyen kep Noni bipigo “Na di Nibou Ndig mem mben Yahudi e, ayaijo kikau ug o!” Leu api ittem-ttem nyen nijap.
4Gima ngwig lene Pilatus hei ug ei nisai hanyen bipai bak yo di imang ndig dima “Jitou kep! Mbigom dihig Yesus hanyen kwei leu binhyepo jahagom jikan tut bipia dimbus ningonti tu lo, dikan tut mun di Noni yai tunggwei hi bi.” 5Gima rino Yesus hei leu ig bei tut cibou nggwen di ibijuk Noni nok topi bittin sinsun ngwoi di ndok di jei cem. Pilatus pai biyok “Jingat i! No pima ri!”
6Tirigi imam nindig nya kin yo di igya ser ingat Yesus lene iba ighyet di ten bibuhup “Apek Noni kin biei salib hak ug o! Apek Noni kin biei salib hak ug o!”
Pilatus pai biyok “Nnaba jibuwak Noni bijipek kin biei salib hak ug. Dimbus ningonti tu lo, dikan tut Nide mun di yai tunggwei hi bi.”
7Mben Yahudi dima ibuhup “Suar Noni tug ndei nimai drek dip nye di mben Yahudi nyende nicuk nyeti lewo Noni tri tut bipia Noni ne Allah Nipmot ri.”
8Tirigi Pilatus miap ighyet nok rino ningon ttin bibor bu. 9Gima rino noni ngkwei hanyen ug ei ig bei. Tirigi hi buwak Yesus hanyen kwei ei ig bei lene Pilatus hig ser Noni “Atimieisi leu hantou i?”
Noro Yesus hap niji bi. 10Gima rino Pilatus hig ser Noni “Nggon rino abuhup dihyet bi i? Ayok ngon kep bipia diyai nisindemti mem gima dikes Na ba, angwes ngun cem dibindei ba, ipek Nani kin biei salib cem.”
11Yesus buhup “Gino Allah yai nisindemti dima bina bi lene bit bon angget Da kan bi. Gima rino no di kes Da ei andati bon sisar nindig bibor dor njiriek ade sisar.”
12Tirigi Pilatus miap Yesus nihyet nok rino noni nggok puig mem gima kes Yesus ba, ningwes ngun. Noro mben Yahudi iba ighyet di ten bibor bipai “Gino akes Noni lene aham ambuk kep Kaisar! No di tri tut bipia noni ne nibou ndig rin dima ham nimbuk kep Kaisar!”
13Tirigi Pilatus miap ighyet dima rino noni buwak Yesus ug ei nisai bigwam ei bilen dip dino nikei nide ei biyati di ingig tig mma eisi. (Iba nihyet Ibrani bijem biyati dima Gabata.)
14Mpe dima ne son dideu mpia huk pijum tu ba, hyep lene tto bou dem mem Njap Ndig Paskah ri. Pilatus pai bak yo dima “No dini ne jide Nibou Ndig rin!”
15Yo dima iba ighyet di ten bibuhup “Akos Noni hak ug o! Akos Noni hak ug o! Apek Noni kin biei salib o!”
Pilatus hig ser yok “Jijoi sut gima dipek jide Nibou Ndig kin biei salib e?”
Imam nindig nya ibuhup “Kaisar nongkom he rinok nibou ndig di ninyeng tak kep nye o!” 16Gima rino Pilatus kes Yesus ei indati leu binhyepo ipek Noni kin biei salib. Yoni ibuwak Yesus biyuug sut.
Ipek Yesus kin biei salib
(Mat. 27:32-44; Mrk. 15:21-32; Luk. 23:26-43)
17Yesus hei ug ei ngug sai bittei Nide biei salib buug sut ei mpia ttou nsi di ijem ninyeng Gumihyep Nimbiam Bou. (Iba nihyet Ibrani bijem ninyeng Golgota.) 18Ipek Noni kin biei salib ei mpia dima ba, ipek ibou can bu kin ide biei salib ei mpia dima cem. Itas hi ei nite bei ninda prak lene hi ei nite bei ninda com lo, itas biei salib tut Yesus ei nahacanti. 19Pilatus cuk tungwa hi bipas “No dini ne Yesus leu minu ndig Nazaret ba, mben Yahudi ide Nibou Ndig rin” ei srat nimeng gomti bipek kin biei salib. 20Tungwatu nya ningot ndig ikwop kep ninyeng dima lewo mpia ttou nsi di ipek Yesus kin biei salib eisi dima jo dideu minu ndig Yerusalem. Tungwa dima ba nihyet Ibrani kin nihyet Latin kin nihyet Yunani bipas ninyeng eisi. 21Imam nindig nya yuug ngat Pilatus bisrep “Ma apas kep ‘Noni ne mben Yahudi ide Nibou Ndig rin’ au. Noro ma apas ‘No dima pai sut Nonti bipia Noni ne mben Yahudi ide Nibou Ndig ri.’ ”
22Noro Pilatus buhup “Mun di dipas kep tu dima jo kep nok.”
23Niabiati tentara nya ipek Yesus kin biei salib tu lene igyai nide sinsun bikwas bitaisi bikwas tut yam. Igyai nide sinsun ndok di jei di tukan nap kin yam bi noro bien nok nitut yam gom cem. 24#Mzm. 22:19 Tentara dima ipai biyam “Ma ikos sinsun ndok di jei dini kukiau sut yam au. Noro jikwei ba, iko bibinggok tut no di mima sinsun dini.” Mun di ipai dima pek kep nok gi ipas ei Allah nihyet bokti,
“Ikwas Ditde sinsun tut yam ba, iko bibinggok tut Ditde sinsun ndok di jei.”
Lene tentara nya igyai igbit nipas kepti dima.
25Yesus nipmem kin nipmem mien kin Maria di Klopas nitnem kin Maria Magdalena yahagom igya dideu Yesus de biei salib. 26Yesus ngat nipmem kin no di ya kui Noni di ningon kieti pima di igya ei mpia dima lene pai bak nipmem “Amei e, no dima ne apmot ri.”
27Leu api Yesus pai bak no di ya kui Noni dima “Noni ne apmem ri.” Hon kep njap dima kui lene no dima nyohou Yesus nipmem ba, cigit noni kui igya.
Yesus nimaisi
(Mat. 27:45-56; Mrk. 15:33-41; Luk. 23:44-49)
28 #
Mzm. 22:16, 69:22 Yesus kan tut bipia nogindini mun di hagom pek kep mem Noni tu. Noni pai “Dinggobiau.” Pai nok leu binhyepo mun di ipas ei Allah nihyet bokti mipek kep tug hon Noni.
29Bokor di mpung tut ba anggur ngei di hyenha jo ei mpia ttou nsi dima. Gima rino hi tur aigmui mbom ei ba anggur ngeiti ba, hak ei pika hisopti lene su tut bingget Yesus nuhui ngkek. 30Yesus muhun ba anggur ngei dima lene pai “Hagom put ei su!”
Lene ndun bou ba, Ninnei kimbas.
Tentara gom dat Yesus nikimbu dip
31Njap dima ne ide Njap Nigwam Kep Ninghuisi ba, mben Yahudi itin ei mem Njap Ndig Paskah di cut igbit njap dima ri. Gima rino nibou mben Yahudi nya ikou sut gima nimbiam nya ingut jo ei biei salibti kikau mem Njap Nigwam Kep Ninghuisi a. Lewo njap dima ne Njap Ndig di bon ninyeng. Gima rino yahara Pilatus leu binhyepo noni sindui sut yok ba, idahat yo di ipek yok ei biei salibti imig leu api icug ingut leu biei salib. 32Gima rino tentara nya yuug ba, idahat yo di ipek yok kin biei salib bit Yesus imig bibie. 33Tirigi ikwei ngat Yesus de biei salib lene ingat lo, ninnei kimbas tu. Gima rino idahat nimig bi. 34Noro tentara gom ba nide micim bidat Yesus nikimbu dip leu api ninggrom kin minyei biam leu nikimbu bokti.
35No di ngat mun di pek kep dima bou niyai him mbot kep tut bije leu binhyepo jeni cem jingon jo kep. Mun di noni mbot kep tut bije ne mijit-jau rin ba, noni kan tut mungkun bipia mun dima hagom cut igkep Yesus. 36#Kel. 12:46; Bil. 9:12; Mzm. 34:21 Nidahat Yesus nimig bi dima pek kep nok gi ipas ei Allah nihyet bokti “Hi dahat ninjum gom bi.” 37#Za. 12:10; Why. 1:7 Gima pek kep bit leu nok gi ipas ei Allah nihyet bokti hiter bu “Tungwatu nya itou kep huk No di iba micim bidat.”
Itig Yesus ningut
(Mat. 27:57-61; Mrk. 15:42-47; Luk. 23:50-56)
38Gima ngwig lene Yusuf di nitimieisi leu minu mien Arimatea hara Pilatus leu binhyepo sindui sut ba, noni ug cug Yesus ningut leu biei salib. (Yusuf cem bit Yesus noro ku mimun tut lewo ttin nibou mben Yahudi nya.) Pilatus ce tut leu api Yusuf ug cug Yesus ningut leu biei salib. 39#Yoh. 3:1-2 Nikodemus di mbrap bit Yesus mem mmun pima cem bit Yusuf ba, noni pwoi mur kin gaharu srig yamti di dem kilo ningot ningai kwei. 40Yahacem icug Yesus ningut leu lene inggai ei sre jepti ba, mur kin gaharu srigsi. Gima bit leu nok mben Yahudi igyai kepti mem ibitin ei nimai ngut nipou tirigi ikes ei jui nsi bigyo. 41Mpia ttou nsi di ipek Yesus kin biei salib eisi bon mitou ninghousi. Tungwatu nya itu hak mihyeti di nijep-jau di itig nimai ngut hi eisi bigyo ei mpia ttou nsi dima. 42Ikes Yesus ningut ei hak mihyeti lewo jo dideu lene jei bi ne jam dem mem Njap Nigwam Kep Ninghuisi ri.
Currently Selected:
YOHANES 19: HAD
Highlight
Share
Copy
Want to have your highlights saved across all your devices? Sign up or sign in
