YOHANES 21
21
Yesus ndo Nonti brei bak yo di igya kui Noni ibou muhwindacan
1Jei bi lene Yesus ndo Nonti brei bak yo di igya kui Noni mbigom kin bu ei Igpong Tiberias nintig dip. Nipek kep mem yokti rinok gini, 2Simon Petrus kin Tomas (di ijem “Ninggre”) kin Natanael (di nitimieisi leu minu mien Kana ei hanjop Galilea) kin Zebedeus nipmot bat cin kin yo di igya kui Yesus ibou can kin bu yahagom induk yam ei gom. 3#Luk. 5:5 Simon Petrus pai bak nindigsi nya “Duug com jala kep wau ug ri.”
Nindigsi nya ibuhup “Nibit na.” Gima rino yahagom ibri ut biyuug nggok wau. Noro mmun jei dima ipos wau hi bi kikau binjap kep. 4Tirigi mpia pri tu lene Yesus ttau kep yok biya ei igpong nintig dip noro yo di igya kui Noni ingat igbit Noni bi. 5Yesus pai biyok “Disut bat jen, jipos wau hi tu e?”
Yoni ibuhup “Hi bigyo.”
6 #
Luk. 5:4-7
Noni pai biyok “Jicom jide jala ei ut nite bei jinda com ug api mijibrim tut wau.” Lene icom jala noro bit bon ibrim hanyen kui kan bi lewo jala mpung tut wau mang bibor.
7No di Yesus ningon kieti pima pai bak Petrus “No dima ne Tuhan ri!” Tirigi Petrus miap bipia No dima ne Tuhan rin lene juk nide sinsun ninda ser ningkek (lewo juk sinsun dima leu no nipou su) bikinyon ei minyeiti. 8Yo di igya kui Yesus nindigsi nya iba ut bitot minyei ug ei mam bei bibrim jala tut wau mang bibor di mpung eisi kwei lewo minyei di icom jala kep wau eisi jo dideu mam bei ug hon meter sratus gom he. 9Tirigi ikwei krau mam bei lene ingat hum mbom di hi ndip wau nghui eisi kin roti. 10Yesus pai biyok “Ma jittei wau di jibrim jala tut dima ndrim hi kwei biDa.”
11Simon Petrus kui ug ei ut dip bikri jala kwei ei igpong nintig dip. Mbro nok gino jala mpung tut wau nindig ngat ningat sratus gom ningot muhwi ba, ningai lo, tun tut bi. 12Yesus pai biyok “Jikwei yem wau nghui dini.” Noro hi di brim ningkek bihig ser Noni “Na tou i?” bi. Lewo yahagom ikan tut bipia Noni ne Tuhan ri. 13Gima rino Yesus dideu yok ba, yai roti bikwas tut yok. Nok gima cem kwas wau dima tut yok.
14Mpe dima lene ikwop Yesus nindo Nonti brei bak yo di igya kui Noniti nimbiningai rin ei niabiati tirigi Allah win Noni hanyen leu gi mai tu.
Yesus mbus Petrus ningonti
15Tirigi igyem wau nghui bingwig leu lene Yesus hig ser Simon Petrus “Na di Simon di Yona nipmot e, angon ngakei Da nindig dor njiriek nindigsi dini ide ningon ngakei Dati e?”
Petrus buhup “Tuhan e, igbit ri. Akan tut bipia dingon ngakei Na.”
Yesus pai binoni “Ma anyohou Ditde domba pmot nya.”
16Yesus hig ser noni nimbican bu “Na di Simon di Yona nipmot e, angon ngakei Da e?”
Petrus buhup “Tuhan e, igbit ri. Akan tut bipia dingon ngakei Na.”
Yesus pai binoni “Ma anyohou Ditde domba nya.”
17Yesus hig ser noni nimbiningai bu “Na di Simon di Yona nipmot e, angon ngakei Da e?”
Petrus ningon ngguk drek dip Yesus nipaisi lewo Yesus hig ser noni mbiningai su. Gima rino noni buhup “Tuhan e, akan tut mun nyeng hagom ba, akan tut bipia dingon ngakei Na!”
Lene Yesus pai binoni “Ma anyohou Ditde domba nya. 18Dipai nijit bina bipia tirigi apilei yo ne akri bang kep antig bou ba, ambut ug ei mpia tto nsi hi bit leu ajoi sutti. Noro ei nidipti bu tirigi anghim koi su ne mporo asu anda hacem leu api hiter mingot anda bittei na ug ei mpia ttou nsi di ajoi sut bi.” 19(Tug hon nipaisi dima lene Yesus mbot kep tut notou Petrus miba nimaisi bikon Allah ninyeng ei nidipti bu.) Gima ngwig leu api Yesus pai binoni “Abit Da.”
Yesus pai sut no di ya kui Noni di ningon kieti
20 #
Yoh. 13:25
Tirigi Petrus kiek no bingat no di ya kui Yesus di ningon kieti pima di ya ei Petrus ninghim dip. (No dini ne no di son nyahan bigwam simiak Yesus tirigi igyem njita bihig ser Noni “Tuhan e, tou rimitri Na i?” pima ri.) 21Petrus ngat no dima lene hig ser Yesus “Tuhan e, notou mem no dima i?”
22Yesus buhup “Gino dijoi sut bipia no dima niyaijo kikau ug bipek dikwei hanyenti kep lene ma aba angon srip huk munhyet dima au. Noro tut nani ne ma abit Da!”
23Gima rino yo di ibit Yesus nindigsi nya isuglai biyam bipia no dima mimai bi sren. Noro Yesus pai sut no dima niyaijo kikausi bi. Noni pai hak “Gino dijoi sut bipia no dima niyaijo kikau ug bipek dikwei hanyenti lene ma aba angon srip huk munhyet dima au.”
24No dima miap kep nihyet tut nipek kepti dima bipas kep hagom tu. Nikan tut bipia mun di noni pai ei nuhui him hagom nijit-jau.
Yohanes kes nihyet hon
25Ningat ne Yesus yai midyai hiter nya mang bibor bu. Gino hi pas kep tut Nide midyai di yai nya gom-gom sindam lene dikan bipia bit bon dihyei njek dip titut yam bon mpia ttou nsi nok gi dem mem inju srat nya hagom eisi kan bi.
Currently Selected:
YOHANES 21: HAD
Highlight
Share
Copy
Want to have your highlights saved across all your devices? Sign up or sign in
