MARKUS 13
13
Yesus pui sut Tuhan De Ig nitimekti
(Mat. 24:1-2; Luk. 21:5-6)
1Tirigi Yesus hei leu Tuhan De Ig lene no di ya kui Noni hi pai biNoni “Guru e, angig ayai kep Tuhan De Ig di nindig bibor dini! Iba tig di nindig bibor di dia-diau bingot bikei bibor kei!”
2Yesus buhup “Ma acap ser ig di kei bibor kei dini bou ayai him. Lewo jei bi ne tungwatu nya minggek hagom ba, tig di jo-jo yam dip mijo nijoti bu bi.”
Mun di buhun kin nihwen bit yokti micut igkep yo di ibit Yesus
(Mat. 24:3-14; Luk. 21:7-19)
3Tirigi Yesus gwam jug#13:3: Nipas kep gwam jug: Mem nijam dima ne gino mben Yahudi ikinyon ei ningginau tungwatu nyati lene igwam jug nipou ug e. biNongkom ei Nungug Zaitun ei mpia di birok kik Tuhan De Ig ei hanyo ug lene Petrus kin Yakobus kin Yohanes kin Andreas ikwei hig ser Noni nyahan, 4“Apai igbit binye tut nituti mem mun dima yok hagom tirigi micut igkep nye ba, mindei rino bindo tut nipek kepti i?”
5Noni buhup “Ma jitindei ser tungwatu nya leu binhyepo hi ris bije ba, jisrawir au. 6Lewo tungwatu nya imang bibor miba dinyeng bipai sut yonti bipia yoni ne Nibou Ndig di teu tungwatu nya biyai niyaijo nijep biyok ri! Yo di ipai nok gima iris tungwatu nya imang bibor. 7Tirigi jimiap tut yo di ikon pran bit yam dideu je cem minu ting leu je cem lene ma jittin tut au. Lewo mun dini yok hagom midem igbit nipou ug e noro njap ningwig honti ne bigyo. 8Nibou di isindem nya yeheu imbuk mem yam ba, timiei minu hi ikon pran bit timiei minu hiter. Dihyei mun brim ei nisurti-nipekti ba, ninggum hwen tungwatu nya. Mun dini yok hagom micut igkep yok bibie ba, dem kep sop di sindi ninghim dut tut nimunggwom.
9 #
Mat. 10:17-20; Luk. 12:11-12 Ma jitindei ser tungwatu nya lewo yoni mikat je bibuwak je ug ei Nikei Puig Yahudi nya yoho bei leu api imbas je ei mben Yahudi ide ig mbusyameisi. Yoni ibuwak je ug ei yo di inyeng jei kin nibou ndig nya yoho bei drek dip dinyeng. Gini hagom bon nikwesti di kei bibor mem gima jitri tut Nihyet Di Kei biyok. 10Nipou tirigi njap ningwig honti tau kep nye bigyo lene suar tungwatu nya itri tut Nihyet Di Kei bidem dihyei nisurti-nipekti nipou ug e. 11Tirigi tungwatu nya ikat je bibuwak je ug ei nikei nya yoho bei lene ma jingon ku jenti tut mun di jibirop hanyen biyok au. Lewo mun di tibim ei juhui him mikwei leu jenti jingonti bi noro Jicig Ninnei miba jihyet di Noni pingok je tut dima bibirop yo dima ighyet. 12Mpe dima lene yo di ikinjoi bat yam mitri yam bigyai nimai biyam. Andigpoi nya mitri imunggwom bat nya lene imunggwom bat nya mitri icig bat ipmem bat nya leu api yo di ikrau nisindemti nya mijem nimai gau yok bu. 13#Mat. 10:22 Ba, tungwatu nya yahagom ingon mpo tut je drek dip gi jiya kui Da. Noro Allah miteu no di ya ngkiem kikau ug bipek ningwig honti biningwes ngun.”
Nisibutti Di Bindei Map Kui Tuhan De Ig
(Mat. 24:15-28; Luk. 21:20-24)
14 #
Dan. 9:27, 11:31, 12:11 “Mijingat Nisibutti Di Bindei Map Kui Tuhan De Ig ya ei ninsi di kwes-kwau (ma no di kwop srat bokti dini yok ngon kep ningginausi!) Mpe dima lene suar yo di ibong ei hanjop Yudea inang ug ei cet him. 15#Luk. 17:31 Tut no di kui bigwam ei ig bou njek lene ma juk hanyen kwei noro ma coi ei ig bei biyai nide ndigban au. 16No di yai miai cem ma ngkwei hanyen biyai nide sinsun cem au. 17Aye! Mpe dima lene notou mem sop di itta buhun nya kin sop di igyai ido bak munggwom ngwoi nya i? 18Ma jingat nadi tindei nijam ninangti dima leu binhyepo cut igkep je mem bed di biang hou au. 19#Dan. 12:1; Why. 7:14 Lewo tungwatu nya ei nijam dima migyai ninghuisi wei nindig bibor dor njiriek ninghuisi wei di tungwatu nya igyai habiei leu nimbie him kikau kwei bipek ammani kep cem lene kikau ug bipek njap ningwig honti cem. 20Gino Allah kos nijam dima nijeisi leu bi lene bit bon bihi ingwes ngun kan bi. Noro Noni mikos nijam dima nijeisi leu mem Nide limwa nya.
21Mpe dima lene gino hi pai bije ‘Jingat i! Nibou Ndig di teu tungwatu nya biyai niyaijo nijep biyok No rini e’ he ‘No rima e’ lene ma jingon bit ighyet au. 22Lewo nibou ndig di teu tungwatu nya biyai niyaijo nijep biyok nitrowai nya kin nabi nitrowai nya mikiju leu api indo bindo bibon mindur cem ba, ipi biris Allah de limwa nya noro limwa dima yok ingon bit ighyet bi. 23Gima rino ma jitindei ser! Dimbot kep tut gini hagom brei bije nipou tirigi nidemti bigyo.”
Munggwom Tungwatu Nipmot nikwei hanyenti
(Mat. 24:29-31; Luk. 21:25-28)
24 #
Yes. 13:10; Yeh. 32:7; Yl. 2:10, 31, 3:15; Why. 6:12 “Tirigi mun di buhun cut igkep yok ei nijam dima ningwigsi lene mpia njap dindi cem bed mmun micom bi cem, 25#Yes. 34:4; Yl. 2:10; Why. 6:13 ham nya micut leu mpia-bbed him cem nisindemti nya ei mpia-bbed him ugwa-kwei cem. 26#Dan. 7:13; Why. 1:7 Mpe dima lene tungwatu nya mingat lo, Munggwom Tungwatu Nipmot ttau kwei sut Nide nisindemti kin Nide nikei-kau-keisi ei bumbuhuiti kwei ri. 27Leu api Noni micuk Nide malaikati nya biyuug ei mpia nitausi kin nicutti kin nijjai kin nibiho hagom leu binhyepo imbus Nide limwa nya yahagom kwei leu dihyei nisurti-nipekti.”
Ningginausi tut biei ara ningat
(Mat. 24:32-35; Luk. 21:29-33)
28“Ma jiyok ngon kep ningginausi tut biei ara. Tirigi dideu gi mitu lene nitom millet leu nimbrinap kikau ug ei ninggrupti ba, nuui hei hanyen bidem ninda-nda hagom leu api jikan tut bipia bed di biang mpia ngei dideu su. 29Nok gima cem tirigi jingat mun pima yok hagom pek kep mem je lene mijikan tut bipia son dideu tto bou tu.#13:29: Nipas kep tto bou dideu su cem kei lene nipas kep Noni dideu su cem kei. 30Ma jiyon ngon kep bipia tungwatu nya ei nijam dini mimai bi bibou mun dini yok hagom midem igbit ug e. 31Mpia-bbed him kin dihyeisi dini misar noro Da dihyet misar bi sren.”
Tungwa hi kan tut mun pima yok nipek kepti bi
(Mat. 24:36-44)
32 #
Mat. 24:36
“Mbro nok gima lo, tungwa hi kan tut njap ningwig honti kin mun pima yok nipek kepti bi. Malaikati nya ei gwamti kin Da di Allah Nipmot nahagom nikan tut nipek kepti bi noro Dicig Nongkom kan tut. 33Suar jiyai ngkiem ba, jitou kep ser lewo jikan tut nijam dima nipek kepti bi. 34#Luk. 12:36-38 Bit leu nok andigpoi di tin ei bimbut rin ba, nipou tirigi mbut bigyo lene ndo midyai bak nide awak nya lene ba midyai bibikwop yok nipou ug e. Noni sok kep no di ya ser dimbou hui leu binhyepo suar bong nyek ser ba, niyai ngkiem. 35Gima rino ma jiyai ngkiem lewo jikan tut jam dino ig ceu nikwei hanyenti bi. Mpaba mikwei mem mmunti e, he mmun mau e, he hayausi e, he mpia nipriti e? Ikan tut bi. 36Leu mbigom Noni mitau kros kep je tirigi jibong mai yo. 37Dihyet di dibisok kep jeni dini ne dibisok kep tungwatu nindigsi nya yahagom bipia ma jiyai ngkiem bijiya ser.”
Currently Selected:
MARKUS 13: HAD
Highlight
Share
Copy
Want to have your highlights saved across all your devices? Sign up or sign in
