MARKUS 7
7
Mben Yahudi idigup bat-idigai bat nya ide ningginausi
(Mat. 15:1-9)
1Mpe di gom bu lene Farisi nya nimpung gom kin guru Puig Yahudi nicukti nya ibou poi di ijo leu Yerusalem kwei inggreu ttai Yesus. 2Yoni ingat lo, yo di igya kui Noni ipiap inda bit leu Puig Yahudi nidimig sutti leu api igyem njita bi.
3Farisi nya bitut mben Yahudi yahagom iba ingon di gom bibit idigup bat-idigai bat nya ide ningginausi. Ipiap inda nipou leu api igyem njita. 4Ba, igyem njita di ipek ei pasarti bi bibou ipiap mun di ipek dima nipou ug e.#7:4: Nipas kep ipiap mun di ipek dima nipou ug e cem kei lene nipas kep ikek minyeiti nipou ug e cem kei. Ikrau kep idigup bat-idigai bat nya ide nidimig sutti mang bibor tut gima ipiap mok kin ampou kin nimbumbati di iba ngkimom-tembaga bibon hagom nipou ug e.
5Gima rino Farisi nya kin guru Puig Yahudi nicukti nya ihig ser Yesus “Nggon rino yo di igya kui Na ibit idigup bat-idigai bat nya ide ningginausi bi dino ipiap inda nipou leu api igyem njita bi i?”
6 #
Yes. 29:13
Yesus buhup “Mei! Jingon can yo! Nabi Yesaya nipaisi ndei je tu. Lewo noni pai,
‘Allah pai sut yo dini bipia inggei sut Da ei yuhui him he noro ingonti jo ei minu ting leu Da. 7Ikuk yok biDa mikui-kausi lewo ingginau tungwatu nya tut idigup bat-idigai bat nya ide nidimig sutti bipai biyok gima ne Allah nidimig sutti nya ri.’
8Jiba jingha bak Allah nicukti nya leu api jikrau kep tungwatu nya ide nidimig sutti nya.”
9Lene Yesus pai biyok bu “Jiba jingon di tek birok Allah nihyet ei jitta leu binhyepo jinyohou jide ningginausi nya. 10#Kel. 20:12, 21:17; Im. 20:9; Ul. 5:16 Lewo Musa pai ‘Ma jibou cut bak jicig jipmem nya bijibit ighyet.’ Gima cem pai binye ‘No di sigion nicig nipmem nya ne suar jikes hukum nimai ei noni dip.’ 11Noro jingginau tungwatu nya bipia gino tungwagom nyeng tut mun di binyohou nicig nipmem nya noro pai biyok ‘Diyai mun di dinyeng tut dima nok nimui bak Allah leu su.’ 12Lene tut gi nyohou nicig nipmem nya lene nna ug. 13Nok gima lene jiba jide ningginausi di jitri bak tungwatu nya bico kep Allah nihyet. Jiyai kepti dima mang bibor bu nonaha yo.”
Map di bindei ba, tungwatu nya ingon kwes bi
(Mat. 15:10-20)
14Lene Yesus nduk tungwatu nya imang bibor kwei bipai biyok “Ma jintu kep dihyet leu binhyepo jingon dor niti! 15Mun di coi ug ei tungwatu nya insi bindei ba, map kui yok bi noro mun di tibim kwei leu yuhui him he bindei ba, map kui yok.” [16Gino jitingou dile lene ma jiyok ngon kep dihyet!]
17Tirigi Yesus kes tungwatu ningot ndig dima yok leu ba, coi ug ei ig bei lene yo di igya kui Noni ihig ser Noni tut nihyet nibiti nindati dima ningginausi. 18Gima rino Noni buhup “Jeni cem jingon dorti bi e? Jikan tut bipia mun di coi ug ei tungwagom ninsi bindei ba, map kui noti bi, bi e? 19Lewo mun dima coi ug ei ningonti bi noro coi ug ei ninghopti ba, jei bi lene oi sut hanyen.” Tug hon nipaisi dima lene Yesus sindui sut tungwatu nya igyem kep njita kin mikwau hagom apino map kui yokti drek dip bi.
20Lene Yesus pai “Nihyet di tibim ei tungwagom nuhui him dima kwei leu ningonti lene gima bindei ba, map kui noti. 21Lewo ningon di rom rinok nitriti mem ingon kanti di kinei nya hagom di bindei ba, tungwatu nya icut tut yam cem inggimang mun cem ihwen yam cem, 22icut tut hi nitnem cem iris yam cem iba yoho rok mun di mipror yon cem imbuk tut yam cem ikrar kep yam cem ingon kinei sut yam cem ikucang yam cem ingon jei cem ingon tindur cem hagom. 23Mun di kinei dima yok hagom ntun tungwatu nya ingon him lene gima bindei ba, map kui yokti.”
Sop Kanaan gom nide niba ningon com Yesusti
(Mat. 15:21-28)
24Leu api Yesus jo leu mpia ttou nsi dima ba, ug ei hanjop nsi di jo dideu minu ndig Tirus. Noni coi ug ei ig bei gom binding leu tungwatu nya igyai him leu binhyepo hi kan tut nikweisi bi. Noro bit bon ku Nonti nyahan kan bi. 25Sindig gom di yai nipmisop di ninnei rom ya ningonti miap tut Yesus ninghapti lene bisau kwei bikuk no ei nimig him, 26bahara Noni leu binhyepo jji ninnei rom leu nipmisop ningonti. Sindig dini ntun mben Yahudi him bi lo, nitimieisi leu hanjop Fenisia ei minu Siria. 27Yesus buhup “Suar nikwas njita tut munggwom nya bibie ug e. Gino niteu njita leu nimunggwom bat nya binicom bak nsien nya lene dem tut bi.”
28Sindig dima buhup “Andigpoi e, nsien nya di ingat rin ei meja nibehei igyem njita di munggwom nya ibindei cut ei bi e?”
29Lene Yesus buhup “Bit Leu abuhup dihyetti dima lene dikes na ba, angkwei hanyen ug ei ade ig lewo ninnei rom pren hanyen leu apmisop ningonti drek dip abuhupti dima tu!”
30Tirigi sindig ngkwei hanyen ug ei ig bei lene ngat lo, nipmisop bong nibongti ba, ninnei rom pren hanyen leu ningonti tu.
Yesus bindei no di nitingou nam di niji nggicai cem bikei hanyen
31Leu api Yesus jo leu hanjop Tirus bimbut kikau ug ei minu ndig Sidon kin Minu Ndig Ttou Nsi Simnai buug krau Igpong Galilea hanyen. 32Tirigi kwei krau lene tungwatu nya ibou poi ibuwak tungwagom di nitingou nam kin niji nggicai ser gi mbrap kwei bak Yesus lene yahara Noni mem gima kes ninda ei no dima dip. 33Gima rino Yesus buwak noni ter leu tungwatu ningot ndig dima lene ba ninda pijum bidat kep ser nitingou nsi binduk nirai bingget nidweba. 34Gima ngwig leu lene Yesus tou kep ginyo kuug ba, hi ninnei leu api pai bak no dima “Efata.” Nikiek nihyet dimati pai “Tu tu!”
35Hammi tirigi pai bak nok rino nitingou tu ba, niji cem nggriu leu api krop kei mem noni mbrap. 36Lene Yesus sok kep tungwatu yahagom ngkiem ser “Ma jitri tut mindur dima au.” Mbro nok gino Noni sok kep yok ngkiem ser ninyen lo, iji nggan tut bitri tut ninyen. 37Yo di imiap tut mindur dima yahagom inggap leu tut nindig bibor. Ipai “No dini bon mun di hagom mungkun kei. Noni bindei ba, yo di itingou nam nya itingou tu hanyen ba, yo di iji nggicai nya iji nggriu bimbrap hanyen cem.”
Currently Selected:
MARKUS 7: HAD
Highlight
Share
Copy
Want to have your highlights saved across all your devices? Sign up or sign in
