ROMA 4
4
Abraham ndo bindo tug hon nide niba ningon com Allahti
1Gi nok lene dipai notou sut ide pung Abraham di mben Yahudi intun him pima i? Mindei rino pek kep mem noni i? 2Gino noni ba niyai munti nya biyai ningon di kwes kin Allah hanyen ne gima biyai ningon di jei sut. Noro bit bon ningon jei sut niyai munti nya ei Allah Noho bei kan bi. 3#Kej. 15:6; Gal. 3:6 Lewo Allah Nihyet pai “Abraham ba ningon com Allah. Gima rino Allah joi sut noni nok no di pwoi Allah ningona.” 4No di yai midyai tug ndei nimuhup. Noni tug ndei nimuhup nok munkwas he bi noro drek dip nide nicom nahanggwap tutti. 5Noro ma nyeni iba ingon srip huk bipia no di ba ningon com Allah noro ba ningon com niyai munti nya bi. Allah kwop kep no dima niba ningon comti lene ba ningon di ngun biluei ningon di mui hanyen. Tug hon nisinati dima ne Allah biyai no dima ningon kwes kin Noni hanyen. 6Bit leu nok Daud nihyet tirigi noni tri tut no di yai ningon nggei-hi-nggei drek dip Allah di biyai no dima ningon kwes kin Noni noro drek dip nide niba ningon com niyai munti nyati bi. Daud pai sut no dima,
7 #
Mzm. 32:1-2
“Bikwop yo di ipigau hanjop lo, Allah kos ser ide sisar tu ne yo dima ingon nggei-hi-nggei lewo Noni ji kep ide sisar tu!
8Bikwop yo di ibon sisar lo, Allah yok ngon kep ide sisar bu bi ne yo dima ingon nggei-hi-nggei!”
9Yo di Daud pai sut bipia ingon nggei-hi-nggei pima ne yo di igyai midut sunat he rin e? E bi! Yo di igyai midut sunat bi nya cem ingon nggei-hi-nggei. Dindat kep nipou su bipia Allah joi sut Abraham di pwoi Allah ningon lewo ba ningon com Allah. 10Apig rino mun dini yok pek kep mem Abraham i? Nipou tirigi noni yai midut sunat bigyo e? He niabiati noni yai midut sunat tu e? Mun dini yok pek kep mem noni nipou su. 11#Kej. 17:10 Leu api noni yai midut sunat ei niabiati bu. Midut sunat ne mun di bindo bipia Allah joi sut Abraham nok no di pwoi Allah ningon drek dip niba ningon com Allahti nipou bibie tirigi noni yai midut sunat bigyo ri. Gima rino Abraham ne ide pung di bitut innei mem yo di iba ingon com Allah yahagom intun him ri. Mbro nok gino igyai midut sunat bi lo, iba ingon com Allah lene Noni joi sut yok nok yo di ipwoi ningona. 12Noni ne ide pung di bitut innei mem yo di igyai midut sunat cem intun him ri. Lewo yo dima igyai midut sunat he bi noro igyai niyaijo drek dip ide niba ningon com Allahti bit leu nok Abraham di ba ningon com Allah nipou tirigi noni yai midut sunat bigyo.
Allah preu ei mem yo di iba ingon com Noni
13 #
Kej. 17:4-6, 22:17-18; Gal. 3:29 Allah preu ei mem Abraham kin yo di intun noni him bipia imbun dihyeisi dini. Noni preu ei nok gima lewo Abraham bit Puig Yahudi nicuk noti nya bi noro lewo noni ba ningon com Allah apino Allah joi sut noni nok no di pwoi ningona. 14#Gal. 3:18 Leu gino tungwatu nya itug ndei mun di Allah preu ei mem yok tug hon nibit Puig Yahudi niggai serti ne ide niba ningon com Allahti kin nipreu ei mem yokti nya hacem bon ninyeng bi. 15Puig Yahudi nicukti nya bindei ba, Allah kes hukum ei tungwatu nya dip. Noro gino nicukti hi jo bi ne nipigau hanjopti cem jo bi.
16 #
Gal. 3:7
Gima rino Allah nipreusi dima tug hon ide niba ningon com Noniti. Allah ba ningon di singat tut yok bibindei nipreu ei mem yo di intun Abraham himti dima ngkiem-kiau mem ngkiai nya he bi noro mem yo di iba ingon com Allah bit leu nok Abraham ba ningon com Noniti. Lewo Abraham nok ide pung di bitut innei mem yo di iba ingon com Allah intun him yahagom. 17#Kej. 17:5 Lewo Allah pai bak Abraham “Dibindei ba, anok pung di mben mang bibor intun him.” Gima ne Allah nipreu ei mem noti. Apino Abraham ba ningon com Noni. Noni ne Allah di kon tungwatu hanyen leu imai eisi rin lene ba nihyet bipai tes mun di jo bi sren bibindei ba, jo nijoti. 18#Kej. 15:5 Mbro nok gino bit bon Allah nipreu ei mem Abrahamti pek kep mem noni kan bi lo, noni ba ningon com Allah. Gima rino Allah bindei ba, noni nok pung di mben mang bibor intun him. Lewo Allah Nihyet pai “Yo di imang bibor mintun nani him.” 19#Kej. 17:17 Mbro nok gino Abraham kan tut bipia niyati nddong ba, nide njap ug ei dideu ari bingwam sratus gom tu ba, bit bon nitnem Sara srek tut nimunggwom hi bu kan bi lo, noni ba ningon gom bicom Allah. 20Noni kes nide niba ningon com Allahti ei ba, ningon nggre tut mun di Allah preu ei mem noni bi. Noro nide niba ningon com Allahti bindei kum ei nide nisindemti apino noni nggei sut Allah. 21Abraham ba ningon com bipia Allah sindem bibor mem gima yai igbit leu nok nipreu ei mem Abrahamti. 22Gima rino Allah joi sut Abraham lewo noni pwoi Allah ningon tug hon niba ningon com Allahti. 23Nipas kepti “Allah joi sut noni nok no di pwoi Allah ningon” dima mem Abraham nongkom he bi, 24noro mem nyeni cem. Lewo Allah joi sut nye di ipwoi Allah ningon lewo iba ingon com No di kon ide Tuhan Yesus hanyen leu nimai eisi tu. 25#Yes. 53:4-5 Allah sindui sut Kristus yai nimai drek dip ide sisar. Lene Allah kon Kristus hanyen leu nimai eisi bibon nituti mem nyeni ingon kwes kin Allah hanyen.
Currently Selected:
ROMA 4: HAD
Highlight
Share
Copy
Want to have your highlights saved across all your devices? Sign up or sign in
