Yoano 2

Masongola a ku Kena

1Kabiji mu juba ja busatu kwajinga kijiilo kya masongola mu muzhi wa Kena wa mu Ngalilea. Ne inanji Yesu wajinga konka, 2ne Yesu naye bamwichile konka ku kijiilo, pamo ne baana banji babwanga. 3Byo byapwile binyu, inanji Yesu wamwambijile amba, “Kechi baji na binyu ne.”

4Kumvwa Yesu amba, “Tuube byepi ne anweba mama? Kimye kyami kikyangye kufika.”

5Inanji wa ambijile bamwingilo amba, “Byonse byo asa kwimwambila mwibyube.”

6 Kwajinga ne milondo ya mabwe itanu na umo yo batujile konka, mwayila kisho kya Bayudea kya kwiovwa, yabaya ya kwitulwilamo mu umo bandundundu nangwa babiji, nangwa basatu. 7Yesu wibambijile amba, “Yuzhai mema mu milondo.” Ne abo bayuzhizhe ne pa kanwa, 8kabiji aye wibambijile amba, “Pano tapulaimo mema mutwale ku mukulumpe wa kijiilo.” Ponkapo batwajile, 9kabiji mukulumpe wa kijiilo byo a tompele pa oa mema a aluka kala ke binyu, ne kuyuka ko byafuma ne, (bino bamwingilo batapwile aa mema bayukile), mukulumpe wa kijiilo waichile musongoshi, 10ne kumwambila amba, “Bantu bonse batendekelapo kusolola binyu byawamisha, kabiji kana bantu baubatu tomee, bino kepo basolola byawamako kacheche. Pakuba anweba mwaji kutuula byawamisha, pano po po mwibileta!”

11Ino ntendekelo ya biyukilo byanji Yesu wiyubile mu Kena wa mu Ngalilea, ne kumwesha lukumo lwanji, kepo baana banji babwanga bamwitabijile.

12 # Mat 4:13 Pakupwa bino, Yesu ne bainanji ne balongo banji, ne baana banji babwanga bayile ku Kapenama, bino kechi baikajileko moba avula ne.

Kutokesha kwa nzubo ya Lesa

(Mateo 21:12-13; Mako 11:15-17; Luka 19:45-46)

13 # Lupu 12:1-27 Kijiilo kya Bayudea kya Lupitailo kyajinga pepi, Yesu kepo ayile ku Yelusalema. 14Kabiji mu kipango kya nzubo ya Lesa watainemo bapoteshenga bang'ombe ne mikooko ne ba nkunda, ne bapimpula mali kasa baikala monka. 15Ne aye walengele kamama ka mizhinge, wibapangilemo bonse mu kipango kya nzubo ya Lesa, ne mikooko ne bang'ombe. Ponkapo waichijile ne mali a bapimpwilenga ne kwalumuna matebulu abo. 16Kabiji wa ambijile bapoteshenga ba nkunda amba, “Bifumyaimo bino, kechi mwalule nzubo ya Bataata ke ya busulu ne!”

17 # Sala 69:9 Ne baana banji babwanga bavulukile byo kyanembwa amba, “Lupata lwa ku nzubo yenu lukanja ku muchima.”

18Kepo Bayudea ba mwambijile amba, “Lelo ng'anyi kiyukilo kyo mwitumwesha, byo mwibyuba bino?”

19 # Mat 26:61; 27:40; Mako 14:58; 15:29 Kumvwa Yesu amba, “Onaunai ino nzubo yazhila, bino mu moba asatu nkeishimukulula.”

20Ponkapo Bayudea amba, “Mama! Myaka makumi ana ne myaka itanu na umo yapwile na kushimika ino nzubo yazhila, ne anweba mukeishimukulula mu moba asatu nyi?”

21Nanchi aye watongwelenga nzubo yazhila ya mubiji wanji. 22Kabiji byo a sangwilwe mu bafu, baana banji babwanga bavulukile kino kyo a ambile, ne kwitaba baitabijile kyokya kinembelo, ne kyokya kyambo kyo a ambile Yesu.

Yesu wibayuka bantu bonse

23Kabiji byo ajinga mu Yelusalema mu moba a kijiilo kya Lupitailo, bavula baitabijile mu jizhina janji byo bamwene biyukilo byo aubilenga. 24Bino Yesu kechi wibaketekejile ne, mambo wibayukile bonse. 25Kabiji kechi wasakile nangwa umo kumubuula bya muntu ne, mambo aye mwine wayukijile jimo biji mu michima yabo.

Currently Selected:

Yoano 2: KNTP

Highlight

Copy