Yoano BYA KULUMBULULA
BYA KULUMBULULA
Mambo Awama anembele Yoano etubuula aye Yesu Kilishitu byo aji Mambo a Lesa, “Aalukile ke muntu ne kwikala waikajilenga muno mwetu.” (1:14) Monka mwa ambila buku mwine, ano Mambo Awama anembelwe amba aba bakeatanga baketabile amba Yesu iye Mupulushi walayilwe, kabiji amba ye Mwana Lesa, aba baitabila mwi aye bakamona bumi bwa myaka (20:31.)
Pa kupwisha kulumbulula byambo bya bumi bwa myaka kupichila mwi Yesu, kibese kitanshi kya uno buku mwanembwa misango ya biyukilo bya kukumya mu kumwesha amba kine Yesu iye Mupulushi Mwana Lesa walayilwe. Akino kibese kya uno buku bantu byo bamwitabijile Yesu ne kwikala ke bakumulondela, bino bamo naabo bakaine kumwitabila. Mu ma kyapitala 13 kufika ne ku 17 mwanembwa Yesu byo atayile kimye kyanji kyabaya na baana banji babwanga mu bobwa bufuku bobamukwachile, ne byambo bya kwibatundaika kasa akyangye kupopwa pa musalabu. Ma kyapitala apelaako etubula na mambo a kukwatwa ne bintu byamwekele mu bije, ne kupopwa kwanji pa musalabu, ne lusanguko lwanji.
Yoano mukunemba kwanji wakosesha bingi na mambo a bupe bwa bumi bwa myaka kupichila mwi Kilishitu, buno bupe bwa bumi bwa myaka bwiya ku bonse bamwitabila Yesu amba ye jishinda, bukine ne bumi, biji mu 14:6. Kabiji Yoano waingijisha bintu bimwekana mubwikalo bwa bantu moba onse mu kukwasha kulumbulula bintu bya bumupashi biji nobe; mema, shinkwa, kyeya, kafunga ne mikooko yanji, mung'anzang'anza ne bipangwa byanji.
Mutanchi wa bintu biji mu uno buku
Bya kutendekelako 1:1-18
Yoano Mubatishi ne baana babwanga batanshi ba Yesu 1:19-51
Mingilo yoaingijile Yesu patoka 2:1—12:50
Mulungu wa peleleko mu Yelusalema ne mizhi ya kubwipi 13:1—19:42
Lusanguko ne kumwekana kwa Nkambo 20:1-31
Bya kupezhako, ne byo amwekele jibiji mu Ngalilea 21:1-25
Currently Selected:
Yoano BYA KULUMBULULA: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.