Luka 10
10
Yesu wibatuma baana babwanga makumi atanu na abiji
1Pakupita bibye aye Nkambo watongwele banabalume bakwabo makumi atanu na abiji #10:1 Amo mabuku a mu kingiliki mujitu 70 kechi 72 ne ne kwibatuma babiji babiji, kutangilapo kulutwe yanji ku mizhi yonse ne ku mapunzha onse koasakile kufika aye mwine. 2#Mat 9:37,38 Ne aye wibambijile amba, “Bujimi bwa kunowa bwabayisha, pakuba bamingilo bakepa. Onkao mambo lombai ku mwina bujimi atume bakwingila mu bujimi bwanji. 3#Mat 10:16Yainga! Talai, mbena kwimutuma nobe baana ba mikooko mukachi ka misuka. 4Kechi musende kikwama kya mali ne, nangwa fukuta ne, nangwa makwabilo ne; kabiji kechi mwimune nangwa umo pa jishinda ne. 5Kimye kyonse inge mwatwela mu nzubo, mukambe amba, ‘Mutende ekale mu ino nzubo!’ 6Kabiji inge mwana wa mutende mo aji, mutende wenu ukekala po aji. Bino inge ufwamo, mutende ukemubwelela anweba bene. 7#1 Ko 9:14; 1 Timo 5:18Kabiji mukekale monka mu yoya nzubo na kuja ne kutoma byo bakemumwena, mambo wamwingilo wafwainwa mfweto yanji. Kechi mutantauke ma nzubo ne. 8Kabiji bimye byonse umvwe mwatwela mu muzhi kabiji bemutambwila, mukajenga byonkabya byo bemuletela. 9Kabukai bakolwa baji mu yewa muzhi ne kwibambila amba, ‘Bufumu bwa Lesa bwafwenya pepi ne anweba.’ 10#Byu 13:51 Bino bimye byonse byo mukatwela mu muzhi kana ne kwimutambula ne, mukaye mu mikwakwa yayo ne kwamba amba, 11#Mat 10:7-14; Mako 6:8-11; Lu 9:3-5 ‘Nangwa lukungu lwa mu muzhi mwenu lwa kakachila ku maulu etu twimukunchilalo. Nangwa byonkabyo yukai kino amba, Bufumu bwa Lesa bwa fwenya pepi.’ 12#Nte 19:24-28; Mat 11:24; Mat 10:15 Nemwambila namba, bya malwa bya Sodoma pa joja juba bikakepako kukila bya yewa muzhi!
Mizhi yabujile kulapila
(Mateo 11:20-24)
13 #
Isa 23:1-18; Ezi 26:1—28:26; Yoe 3:4-8; Amo 1:9,10; Zeka 9:2-4 “Malwa obe, Kolazeni! Malwa obe, Betesaida! Mambo umvwe mingilo ya bulume yaingijilwe mwenu, inge yamwekele mu Tila ne mu Shidona, umvwe balapijile kala, ne kuvwala bisapi bya majilo ne kwipukula buto. 14Pakuba bya malwa bya Shidona ne Tila bikakepako kechi bikesakana na byenu mu juba ja kije ne. 15#Isa 14:13-15 Ne obewa, Kapenama! Ukasuntulwa kufika mwiulu nyi? Bakakwikizha panshi.”
16 #
Mat 10:40; Mako 9:37; Lu 9:48; Yoa 13:20 “Aye wimumvwa anweba waumvwa amiwa, ne aye wimukana anweba wakana ne amiwa, ne aye wankana amiwa wakana ne wantumine.”
Kubwela kwa makumi atanu na abiji
17Kabiji aba makumi atanu na abiji babwelele na lusekelo amba, “Nkambo, ne bademona betukookela atweba mu jizhina jenu!”
18Ne aye wibambijile amba, “Namwene Satana byo aponene kufuma mwiulu nobe kubeesha kwa mvula. 19#Sala 91:13 Talai, nemupa luusa lwa kunyanta milolo ne tuminye, ne kushinda bulume bonse bwa mulwanyi, kabiji kafwako kikemukozha ne. 20Nangwa byonkabyo kechi musekele mambo bademona bemukookela ne, sekelai mambo mazhina enu anembwa mwiulu.”
Kusekela kwa Yesu
(Mateo 11:25-27; 13:16-17)
21Pa kyonkakya kimye Yesu wasekejile mu Mupashi Wazhila #10:21 Mu Mupashi Wazhila: amo mabuku a Kigiliki muji amba, “Na Mupashi,” akwabo nao amba,“Mu mupashi wanji.” ne kwamba amba, “Nemutota anweba Taata, Nkambo wa mwiulu ne pano panshi, mambo mwibifiile bino bintu ku bamaana ne ku bamilangwe ne kwibisolola ku baana ba bacheche; mo monka, Taata, mo kimuwamina anweba bene.
22 #
Yoa 3:35;
Yoa 10:15
“Bataata bampele amiwa bintu byonse, kabiji kafwako nangwa umo wamuyuka Mwana byo aji ne, kanatu bonka Bataata, nangwa wayuka Bataata byo baji ne, kana yenka Mwana, ne boba bantu bo aswa Mwana kwibasolwelaye.”
23Ponkapo Yesu waalulukijile ku baana babwanga ne kwamba bufyamfya amba, “Atokwa meso amona byo mubena kumona! 24Mambo ne mwambila namba bangauzhi bavula ne ba mfumu basakile kwibimona byo mubena kumona, bino kechi bebimwene ne, ne kumvwa byo mubena kumvwa, bino kechi bebyumvwine ne.”
Kishimpi kya mwina Samaliya wawama
25 #
Mat 22:35-40; Mako 12:28-34 Kabiji ponkapo umo mufunjishi wa mizhilo waimene, na kumweseka amba, “Mufunjishi, nanchi ikika kyo nafwainwa kuuba namba ntambule bumi bwa myaka?”
26Ne aye wamwambijile amba, “Kyanembwa amba ka mu Buku wa Mizhilo? Nanchi mutanga byepi?”
27 #
Mpitu 6:5;
Levi 19:18
Kumvwa aye amba, “Ukamutemwa Nkambo Lesa wobe na muchima wobe yense, ne na mweo wobe yense, ne na bulume bobe bonse, ne na maana obe onse; ne mukwenu byonka byowitemwa obewa mwine.”
28 #
Levi 18:5
Kumvwa aye amba, “Mwa amba bulongo; ubai bibye ne bumi mukebumona.”
29Pakuba aye, mambo a kusaka kwibingisha mwine, wamwambijile Yesu amba, “Nanchi mukwetu ye ng'anyi?”
30Yesu wakumbwile amba, “Umo muntu wakunkulukile kufuma ku Yelusalema kuya ku Yeliko; ne aye bamubelamijile ku batupondo, bamuvujile bivwalo ne kumupuma ke baye, bamushiile pepi kufwa. 31Kabiji ng'anga umo wa Lesa wakunkulukilenga mu jonkaja jishinda; ne byo a mumwene wapichile kunsa ya jishinda. 32Byonkabyo ne mwina Levi, naye byo afikile ponka ne kumumona, wapichile kunsa ya jishinda. 33#2 Moba 28:15Pakuba mwina Samaliya umo, wajinga pa lwendo, wamutaine uno muntu. Ne byo a mumwene wamubijile lusa. 34Kabiji wayile ko ajinga, wamupombele pa bilonda byanji, waichijilepo ne manyi ne binyu; wamubikile ne panyama wanji mwine, ne kumuleeta ku nzubo ya bwenyi na kumulama. 35Ne juba jalondejilepo wasolwele mali ne kupana ku mwina nzubo amba, mu mulame, byonse bikwabo byo ake mujiila, amiwa pa kubwela nkemulubwilabyo.”
36“Mwalanguluka amba, ng'anyi wa mu bano basatu wamwesheshe amba wa kwanji awa ye bapumine ku batupondo?”
37Mufunjishi wa Mizhilo wakumbwile amba, “Yenkawa wamubijile lusa.”
Yesu kepo a mwambijile amba, “Nanchi yainga mubenga byonkabyo.”
Maata ne Maliya
38 #
Yoa 11:1
Byo bayilenga, aye watwelele mu muzhi umo, ne mwanamukazhi umo jizhina janji Maata, wamutambwijile mu nzubo yanji. 39Ne aye wajinga na mulongo wanji, jizhina janji Maliya, ye waikajile ku maulu a Nkambo na kumvwa byambo byanji, 40pakuba Maata watabankene na mingilo; kabiji waishile kwamba amba “Nkambo, kechi mwatako muchima aye mulongo wami byo andekela mingilo bunke bwami nenyi! Mwambilai eye ankwasheko.”
41Aye Nkambo wamukumbwile amba, “Maata, Maata! Obewa wabambisha muchima ne kutabankana na byavula, 42bino kujitu kimo kyafwainwa. Pakuba Maliya wasalulula akya kyawama, kabiji kechi kikamwangatwa ne.”
Currently Selected:
Luka 10: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
