Luka 8

Banabakazhi ba endelenga ne Yesu

1Kabiji pakupitapo ka kimye kacheche wayile na kupitang'ana mu mizhi ikatampe ne icheche, kasa asapwila Mambo Awama a bufumu bwa Lesa. Ne ba jikumi na babiji bajinga naji, 2#Mat 27:55,56; Mako 15:40,41; Lu 23:49 kabiji ne banabakazhi boapangilemo bapashi babipa ne kubukwa ku bikola; Maliya yebateela amba Magadalena, ye bapangilemo bademona batanu na babiji, 3ne Yoana, muka Kyusa, wajinga kalama wa Heloda, ne Suzana, ne bakwabo bavula, bebakwashishenga kufuma mu bya bunonshi bwabo.

Kishimpi kya njimi wakushilenga nkunwa

(Mateo 13:1-9; Mako 4:1-9)

4Ne jibumba jikatampe byo japwijilenga ne bantu bamu mizhi yonse byo baishile koaji, wa ambile mu kishimpi amba.

5“Njimi umo wayile na kukusa nkunwa yanji. Kabiji byo akushilenga, imo yaponejile kunsa ya jishinda kabiji beinyantawile, ne bang'onyi ba mwiulu beijiile. 6Ne ikwabo yaponejile pa kibangabwe, ne byo yakomene, yaumine mambo kechi yaji na mema ne. 7Ne ikwabo yaponejile mu miba, ne miba yakomene nayo pamo ne kwiitatankanya. 8Ne ikwabo yaponejile mu mushiji wawama ne kukoma yakomene ne kupanga imo kitota kimo.”

Byo a ambile bino, ne aye wabijikile amba, “Awa uji na matwi a kumvwa, omvwe!”

Kyaikelako bishimpi

(Mateo 13:10-17; Mako 4:10-12)

9Ne baana banji babwanga bamwipwizhe mwayijile kino kishimpi, 10#Isa 6:9 Aye wa ambile amba, “Kwi anweba kimupewa kuyuka byafyamika bya mu bufumu bwa Lesa, bino ku bakwabo biji mu bishimpi, pakuba amba, byobamona kechi bamone ne, ne byobomvwa kechi bomvwishe ne.”

Kulumbulula kishimpi kya njimi

(Mateo 13:18-23; Mako 4:13-20)

11“Pano kishimpi kyo kyo kino, nkunwa o mambo a Lesa. 12Aya ya kunsa ya jishinda bo boba baumvwa; bino Diabola wiya ne kwibangatao aa mambo mu michima yabo, amba babule kwitabila ne kupuluka. 13Ne yoya ya pa kibangabwe bo boba, pa kwiomvwa mambo, beatambula na lusekelo. Bino abo kechi baji na mizhazhi ne; betabila ka kimye kacheche, ne mu bimye bya lweseko babwela mu nyuma. 14Pakuba aya yaponejile mu miba, bo boba bomvwa, bino pa kuya mu jishinda jabo be batatankanya na bya kusakasaka ne bya bunonshi ne bya lusekelo bya mu buno bumi, ne bipangwa byabo kechi bikoma ne. 15Ne yoya ya mu mushiji wawama, bo boba, pa kwiomvwa mambo, beakwachisha na muchima wawama wa lukookelo, ne abo bapanga bipangwa na butekanye.

Byakufunda ku lampi

(Mako 4:21-25)

16 # Mat 5:15; Lu 11:33 “Kafwako muntu wambula lampi kabiji wazhikapo kintu nangwa kumutuula munshi ya mwanya ne, poso wamubiika pa kitulwapo lampi, amba aba batwelamo bamone kyeya.”

17 # Mat 10:26; Lu 12:2 “Mambo kafwako kintu kyafyamika kikabulwa kusololwa ne, nangwa kintu kyafyamika kikabulwa kuyukanyikwa ne kwiya patoka ne.”

18 # Mat 25:29; Lu 19:26 “Jimukai byo mumvwa, mambo kwiyewa uji naabyo, ukapewa ne bikwabo, kabiji kwiyewa wabulabyo, bakamwangata ne byobya byo alanguluka amba uji naabyo.”

Inanji ne balongo banji Yesu

(Mateo 12:46-50; Mako 3:31-35)

19Bainanji ne balongo banji Yesu baishile ko aji, bino bakankelwe kufika pepi na mambo a jibumba. 20Ne aye bamubujile amba, “Bainenu ne balongo benu baimana pangye, babena kusaka kwimumona.”

21Kumvwa Yesu wibakumbwile amba, “Bamama ne balongo bami bo boba bomvwa byambo bya Lesa ne kwibyuba.”

Yesu byo a zhindamikile kipuupu

(Mateo 8:23-27; Mako 4:35-41)

22Juba jimo Yesu wakanjijile mu bwato na baana banji babwanga, ne aye wibambijile amba, “Twayai twabukile ku bushiya bwa kizhiba.” Kepo bakanjijile mu bwato. 23Kabiji byo bayilenga aye waponejile mutulo. Ne kipuupu kikatampe kyaishile pa kizhiba, ne bwato bwayilenga na kuyuula mema ne abo bajinga pepi kufwa. 24Kepo baishile ko aji ne kumubusha amba, “Nkambo, nkambo, twafwa!”

Ne aye wabuukile ne kukanya kipupu ne bukaji bwa manyaki, ne kuleka byalekele, pazhindaminetu nzo. 25Kabiji wibambijile amba, “Lwitabilo lwenu lujipi?”

Ne abo baubile moyo ne kukumya, ne kwiambila bene na bene amba, “Nanchi uno ye ng'anyi, ukambizha kipupu ne mema, ne abyo byamukookela?”

Kubukwa kwa wanonkelwe ku bademona

(Mateo 8:28-34; Mako 5:1-20)

26Ponkapo bayile na bwato ku kyalo kya Ngalasene,#8:26 Ngalasene: amo ma buku muji Ngadalene (Monai Mt 8.28); akwabo muji Gelegesa Ku musela kwa Yondano, pakachi ka kizhiba kya Ngalilea ne kizhiba kya kalunga ka mukele kyatalang'ene na kizhiba kya Ngalilea. 27Byo afikile kumutunta, wasambakene na muntu wa mu muzhi wajinga na bademona. Ne moba onse waikalanga kwakubula kuvwala bivwalo, ne kwikala kechi waikelenga mu nzubo ne, kana mu bilende. 28Byo a mumwene Yesu, wabijikile ne kuponena panshi mu kyenyi kyanji ne kubijika na jiwi jikatampe amba, “Lelo nanchi ikika kyo musaka kwi amiwa, Yesu Mwana Lesa Mwine Wakila? Ne musashijila namba, kechi mu mmanyike ne!” 29Mambo aye wamukambizhe mupashi wabiipa kufumamo mu muntu. Mambo bimye byavula byo kya mukwachilenga, bamulaminenga kasa bamukasa mu minyololo ne mu bikulu ku maulu anji, bino aye wachibawilenga minyololo kabiji watwajilwenga mungye ku mudemona.

30Ponkapo Yesu wamwipwizhe amba, “Jizhina jobe wi ng'anyi?”

Ne aye wa ambile amba, “Ne nzhita,” Mambo wajinga na bademona bavula. 31Ne abo bamusashijile amba, kechi eba kambizhe kuya mu kalengwa kabula mpelo ne.#8:31 Mu kalengwa kabula mpelo ne: munshi ya ntanda kupembelela juba ja kije.

32Kabiji kwajinga ne jitanga jikatampe ja bankumba bajilenga konkakwa ku mutumba, kabiji bamusashijile kwibaleka kutwela mwi abo. Ne aye wibaswishishe. 33Bademona bafumine mu muntu ne kutwela mu bankumba, ne jitanga jonse jakunkulukile lubilo mukolo ne kwitaya mumema ne kufwa bafwile.

34Bajishishenga bankumba byo bamwene kyamwekele, banyemene lubilo kasa babulang'ana mu muzhi ne mu majimi. 35Ne bantu bavula bayile na kumona kyamwekele, ne kwiya baishile kwi Yesu ne kumumona awa muntu mwafumine bademona, kasa aikala ku maulu a Yesu, wavwala ne muchima wanji kasa alubuluka bulongo, kabiji abo baubile moyo. 36Ne boba bekimwene bebabujile byo a bukilwe awa wajinga na bademona. 37Ponkapo bonse bantu bazhokolokele kyalo kya Ngalasene bamulombele amba afume mwabo, mambo bakwachilwe na moyo mukatampe. Onkao mambo watwelele mu bwato ne kuya. 38Ne yewa muntu mwafumine bademona wamusashijile amba ekalenga nanji.

Pakuba Yesu wamutumine amba, 39“Bwelai ku nzubo yenu, mukebabuule byonse byo emubila Lesa.”

Ne aye wayile, ne ku kumbanya muzhi yense na kwibabuula abya bintu bikatampe byo amubijile Yesu.

Mwana Yelusa ne mwanamukazhi wakwachile ku kivwalo kya Yesu

(Mateo 9:18-26; Mako 5:21-43)

40Pano Yesu byo a bwelele ku bushiya bwa kizhiba, jibumba ja mutambulwijile, mambo bonse bamupembelejilenga. 41Ne kwiya kwaishile mwanamulume jizhina jaji Yelusa, wajinga ntangi wa shinagoga. Ne pa kuponena ku maulu a Yesu, wamusashijile amba aye ku nzubo kwanji, 42mambo aye wajingatu na yenka uno mwana wamukazhi, wajinga pepi na myaka jikumi na ibiji, ne aye waji pepi na kufwa.

Kabiji Yesu wayilenga, ne bantu kasa bamubumba. 43Kwajinga ne mwanamukazhi wajinga na kikola kya kupita mashi myaka jikumi na ibiji, nangwa watayile byonse bya mubwikalo bwanji ku bang'anga, kechi wabukilwe nangwa ku umo ne. 44Waishile kunyuma yanji ne kukwata kwapela kivwalo kyanji, ne ponkapotu mashi alekele kupita. 45Ne Yesu wa ambile amba, “Ng'anyi waji kunkwata?”

Bonse byo bakaine, Petelo wa ambile amba, “Nkambo, mabumba emubumba ne kwimufina!”

46Bino Yesu wa ambile amba, “Koaji umo waji kunkwata, mambo naumvwa bulume bwafumamo mwi amiwa.” 47Ne mwanamukazhi byo ayukile amba kechi wafyamika ne, waishile kasa abena kuzakama, ne pa kuponena panshi koaji ne kwamba ku meso a bantu bonse ene mambo o aji kumukwachila, ne byo a bukiwa ponkapotu. 48Ne Yesu wamwambijile amba, “Mwanami, lwitabilo lobe lwa kupulusha, yanga mu mutende.”

49Bino Yesu byo akyambilenga bino, muluwe waishile kufuma ku nzubo ya mukulumpe wa shinagoga amba. “Mwanenu wafwa, kechi mumukabishetu mufunjishi ne.”

50Bino Yesu pa kwikyumvwa kino wamukumbwile amba, “Kuuba moyo ne; itabilaitu, ne aye usa kwikalatu bulongo.”

51Ne byo afikile ku nzubo, kechi waswishishe nangwa umo kutwela nanji ne, kana ba Petelo ne Yoano ne Yakoba, ne ba shanji ne inanji mwana. 52Ne bonse bajijilenga mabingo, bino aye wa ambile amba, “Kujila ne, mambo kechi wafwa ne, bino walaalatu.”

53Ne abo kebamuseke, byo bayukile amba wafwa. 54Bino aye wa mukwachile pa kuboko ne kumwita amba, “Obewa mwana buuka!” 55Ne mupashi wanji wabwelele, ne kubuuka wabuukile ponkapotu. Ne kukambizha wakambiizhe amba bamupe bya kuja. 56Ne ba nsemi yanji bakuminye, bino wibakambizhe amba, kechi babulepo nangwa muntu umo byamweka ne.

Currently Selected:

Luka 8: KNTP

Highlight

Copy