Mateo 21

Yesu byo atwelele mu Yelusalema kasa bamutota

(Mako 11:1-11; Luka 19:28-40; Yoano 12:12-19)

1Kabiji byo bafikile kwipi na Yelusalema, pakufika ku Betefaji, ku Mutumba wa olivi. Ponkapo Yesu watumine baana babwanga babiji, 2ne kwibambila amba, “Yainga mu yewa muzhi ye mwatazhapo bilungi byenu, ne ponkapotu pa kutwelamo musa kutaana mbongolo ye bakasa, pamo na mwananji. Mwi bakasulule mwibandetele kuno. 3Kabiji umvwe muntu wimwipuzha, mukamwambile amba, Nkambo wibasaka, ponkapotu ukebatuma kuno.” 4Kino kyamweka amba kifike akya kya ambile ngauzhi amba,

5 # Zeka 9:9 “Buulai mwana wa Ziona wamukazhi amba,

tala, Mfumu wobe byo abena kwiya ko uji!

Wakooka muchima, kabiji waikala pa mbongolo,

kabiji pa kituubala, mwana nyama wamwingilo.”

6Ponkapo baana babwanga bayile bakobile monka mo ebambijile Yesu. 7Baletele mbongolo ne mwananji, bebakupikile ne bivwalo byabo, kepo aikajilepo. 8Ponkapo ne bakwabo bavula bamu jibumba ke baye na kwanshika bivwalo byabo mu jishinda, kabiji bakwabo nabo kasa bakosola misampi ya bichi ne kwiyanshika mu jishinda. 9#Sala 118:25,26Ne mabumba atangijileko ne ajinga panyuma, kasa abijika amba, “Hosana kwi Mwana Davida! Atotwe awa wiya mu jizhina ja Nkambo! Hosana ne mwiulu mwine!”

10Kabiji byo atwelele mu Yelusalema, muzhi yense wabuukile amba, “Ing'anyi wo?” 11Kumvwa mabumba amba, “Uno ye ngauzhi, Yesu wa ku Nazala wa mu Ngalilea.”

Yesu byo atokesheshe nzubo ya Lesa

(Mako 11:15-19; Luka 19:45-48; Yoano 2:13-22)

12Kabiji Yesu wayile mu nzubo ya Lesa, wibapangilemo bonse bapoteshenga ne bapotelenga mu nzubo ya Lesa. Waalumwine ne matebulu a bapimpwilenga mali ne bipona bya boba bapoteshenga ba nkunda, 13#Isa 56:7; Yele 7:11ne kwibambila amba, “Kyanembwa amba, Nzubo yami ikatelwa amba nzubo ya milombelo. Pakuba anweba mwiyalula ke jiyengo ja ba tupondo bapukula bintu.”

14Kabiji bampofu ne balemana bamunangile mu nzubo ya Lesa, ne aye wibabukile. 15Ponkapo bang'anga bakatampe ne banembeshi, pa kwibimona bya kukumya byo aubilenga, ne banyike kasa babijika monka mu nzubo ya Lesa amba, “Hosana kwi mwana Davida!” Ponkapo bazhingijile. 16#Sala 8:2Ba mwambijile amba, “Mwaumvwa byo babena kwamba nyi?”

Kumvwa Yesu amba, “Ee, nanchi mukyangye kutangapo nyi? Amba, mutunwa twa twanyike ne twana twa lukeke mo mwanengezhiwe kutota?”

17Ponkapo wibashiile wafumine mu muzhi kaye ku Betani, wakekajile konkakwa.

Mukuyu wabujile kupanga bipangwa

(Mako 11:12-14,20-24)

18Bino lukeelo, pa kubwela mu muzhi, waumvwine nzala. 19Ne pa kumona mukuyu kunsa ya jishinda, wayileko kutaana kafwako makuyu, kwajingatu mabuula onka. Wikyambijile amba, “Kechi ukapangepo kipangwa nangwa kimotu ne, myaka yonse!” Ponkapotu kichi kyaumine. 20Ne baana babwanga pa kwikimona bakuminye amba, “Mukuyu wauma byepi ponkapatu?”

21 # Mat 17:20; 1 Ko 13:2 Kumvwa Yesu wibambijile amba, “Kine ne mwambila namba, kana muji na lwitabilo ne kuzhinauka ne, kechi mukooba kyonkakye kyaubiwapo ku mukuyu ne, mukambila nangwa uno mutumba amba ushikulwe, utayiwe mu kalunga ka mema, kikobiwa byonkabyo. 22Kabiji byonse byo mukasakanga mu lulombelo na lwitabilo, mukebitambula.”

Byo baipwizhe Yesu na mambo a luusa lwanji

(Mako 11:27-33; Luka 20:1-8)

23Kabiji byo atwelele mu nzubo ya Lesa, bang'anga bakatampe ne bakulumpe ba bantu baishile ko aji ne kumwipuzha amba, “Ng'anyi luusa mo ubena kuubila bino bintu? Kabiji ng'anyi wakupa luno luusa?”

24Kumvwa Yesu wibambijile amba, “Ne amiwa nsa kwimwipuzha jipuzho, kana mumbuule, ne amiwa nsa kwimubuula luusa mo ngubila bino. 25Nanchi lubatizhilo lwa kwa Yoano lwafumine pi? Lwafumine kwiulu nyi, inyi lwafumine ku bantu?”

Ponkapo baambang'ene abo bene na bene amba, “Umvwe twambe namba lwa mwiulu aye usa kwamba amba mambo ka o mwabujile kumwitabila? 26Kabiji umvwe twambe namba lwa ku bantu, twachiina jibumba, mambo bonse bamwitabila Yoano amba wajinga ngauzhi.” 27Ponkapo bamukumbwile Yesu amba, “Kechi twayuka ne.”

Kumvwa Yesu naye amba, “Nanchi ne amiwa kechi nemubuule luusa lo ngubilamo bibye ne.”

Kishimpi kya baana babiji

28“Pano anweba mulanguluka amba ka? Muntu umo wajinga na baana babiji babalume, waishile ku mubeji amba mwanami yanga ukengile mu bujimi bwa ming'anzang'anza leelo. 29Aye mwananji wakaine amba amiwa ne mwane. Kabiji panyuma walapila, kaye. 30Kabiji waishile ku wa bubiji, wamwambijile muntu mumotu. Aye waitabile amba ee mwane nkambo ngya, bino kuya ne. 31Pabano babiji, ng'anyi waubile kyaswa muchima wa shabo?”

Kumvwa abo amba, “Mutanshi.”

Kumvwa Yesu amba, “Kine nemwambila namba, basonkeshi ne bankende bakemukilaila kukatwela mu bufumu bwa Lesa. 32#Lu 3:12; 7:29,30Mambo Yoano waishile kwi anweba mu jishinda ja bololoke kabiji anweba kechi mwamwitabijile ne; pakuba basonkeshi ne bankende bamwitabijile, kabiji anweba pa kwikimona, kechi mwalapijile panyuma amba tumwitabile ne.”

Kishimpi kya bujimi bwa ming'anzang'anza

(Mako 12:1-12; Luka 20:9-19)

33 # Isa 5:1,2 “Umvwai kikwabo kishimpi. Kwajinga muntu mwina nzubo wajimine bujimi bwa ming'anzang'anza, wabikileko ne luvimba, wapoyileko ne kya kufiinamo binyu, ne kutungilapo kyamba. Ne kwibusha ku bakalama, kabiji wayile ku ntanda ingi. 34Mwaka pakufika pepi papiila bipangwa, watumineko bakalume banji ku bakalama ba bujimi amba kaletai bipangwa byami. 35Ponkapo bakalama bebakwachile bakalume banji, umo bamupumine, mukwabo bamwipayile, kabiji ne mukwabo naye bamwashile mabwe. 36Kabiji watumineko bakalume bakwabo bakijile batanshi mu kuvula, kabiji abo nabo bebobile pamotu. 37Kabiji kyapeleleeko watumineko mwananji amba, bakamunemeka mwanami. 38Pakuba bakalama pa kumona mwana, ba ambile amba au ye nswanyi, twayai tumwipaye, twangate buswanyi bwanji! 39Ne pa kumukwata bamutayile pangye ya bujimi bwa ming'anzang'anza ne kumwipaya bamwipayile. 40Nanchi pa kwiya aye mwina bujimi bwa ming'anzang'anza, bakalama ukeboba byepi?”

41Abo bamukumbwile amba, “Aba batama ukebonauna kyatama pelu! Ne bujimi bwa ming'anzang'anza ukebushiila bakwabo bakalama, abo bakamupanga bipangwa pa mwaka wabyo.”

42 # Sala 118:22,23 Yesu wibambijile amba, “Nanchi kechi mwatangilepo biji mu binembelo nenyi? Amba.”

“Jibwe jo basujile bashimika

jo jonka jaalukile ke mutwe wa jikonka.

Kino kyafumine kwi Nkambo

kabiji kyokya kukumya ku meso etu!”

43“Onkao mambo nemwambila namba, Bufumu bwa Lesa bakemwangatabo, bakebupana ku mukoka ukapanga bipangwa byabo.” 44#21:44 Ma buku a kala a mu kigiliki kechi aji na uno veleshi 44 ne. Monai Luka 20:18“Awa ukaponena pa jo jino jibwe ukachimauka, pakuba awa ye jikaponena ukavingakanatu.”

45Kabiji bang'anga bakatampe ne Bafaliseo pakumvwa bishimpi byanji, ponkapo bayukile amba, yetu abena kwambila. 46Basakile kumukwata, bino bachiinenga mabumba mambo bamutelele amba Ngauzhi wa Lesa.

Currently Selected:

Mateo 21: KNTP

Highlight

Copy