Mateo 24

Yesu byo a ambile na mambo a konaika kwa Nzubo ya Lesa

(Mako 13:1-2; Luka 21:5-6)

1Kabiji Yesu walupukile mu nzubo ya Lesa kaye ne kuya, kabiji baana banji babwanga baishile ko aji amba, tumumweshe byashimikwa nzubo ya Lesa. 2Kumvwa aye wibambijile amba, “Mubena kwibimona bino byonse, kine nemwambila namba, kechi pakashaala nangwa jibwe jikatentakana pa jikwabo jo bakabula kupalang'anya ne.”

Mambo a kumanyikwa ne byamalwa

(Mako 13:3-27; Luka 21:5-28)

3Kabiji byo aikajile pa Mutumba wa olivi, baana babwanga baishile kwi aye kumbaji amba, “Tubuulai bino bintu bikamweka ng'anyi mwaka? Kabiji ng'anyi kayukilo ka kwiya kwenu, ne ka juba jikapelaako?”

4Kumvwa Yesu amba, “Jimukai kuchiina amba nangwa umo wakemutwala mungi. 5Mambo bavula bakeya mu jizhina jami amba, ‘Amiwa yami Kilishitu!’ Kabiji bakebatwala mungi bavula. 6Kabiji byo mukomvwa makondo ne nkuwa ya makondo, kechi mukakamwe ne. Mambo bino byafwainwa kumweka, mpelo kasa ikyangye kufika. 7Mambo mukoka ukemeena mukoka mukwabo, ne bufumu bukemeena bufumu bukwabo, kabiji kukekala bipowe bya nzala ne bitentanshi kwavula. 8Nanchi bino byonse ko kuntatwilo ya bisanso.

9 # Mat 10:22 “Ponkapo bakemufikizha mu malwa ne kwimwipaya. Kabiji bakemushikwa ku mikoka yonse ya bantu pa jizhina jami. 10Ne bavula baketuntula, bakesolola bene na bene, ne kwishikwa bene na bene. 11Kabiji bangauzhi ba bubela bavula bakeya, ne kwibatwala mungi bavula, 12Kabiji na mambo a bubi bukavula, butemwe bwa bavula bukayanga na kukepa. 13#Mat 10:22Bino awa ukakoselamo kufika ne kumpelo ye ukapuluka. 14Kabiji ano Mambo Awama a bufumu aka sapwilwa pano pantanda ponse mwa kwibashiina ba mu mikoka yonse ya bantu, bino mpelo ikafike.”

Malwa akatampe

15 # Dan 9:27; 11:31; 12:11 “Kabiji pa kwikimona akya kya bunya kileeta lonaiko kya ambile Danyela ngauzhi, kasa kyaimana mwazhila” (awa utanga, muleke omvwe!) 16“Ponkapo aba baji mu Yudea bakanyemene ku mitumba. 17#Lu 17:31Aye uji pa mutenge kechi akekile amba, akasende biji mu nzubo yanji ne. 18Ne yewa uji mu bujimi, naye kechi akabwele na kushikula munkukumba wanji ne. 19Kabiji malwa kuboba bakekala na memi ne boba bakamwishanga baana mu oa moba! 20Lombai amba, po mukanyemanga kechi kikekale mu bang'ondo ba mashika ne, nangwa mu juba ja Sabado ne! 21#Dan 12:1; Lum 7:14Mambo mu oa moba kukekala malwa akatampe, a kuuba kala kechi kwajingapo akwabo a byonkabyo ne, nangwa kufuma ku ntendekelo ya pano pantanda kufika ne pano, ne myaka yonsetu kechi akekalako a byonkabyo ne. 22Kabiji aa moba inge ne kwiachibako ne, kafwako muntu nangwa umo ukapuluka ne. Pakuba na mambo a basalululwa bakeachibako aa moba.”

23“Pa kyokya kimye umvwe muntu akemwambile amba, ‘Talai! Kilishitu uji kuno,’ nangwa amba, ‘Kuno!’ Kechi muketabe ne. 24Mambo kukamweka ba kilishitu ba bubela, ne bangauzhi ba bubela, kabiji bakamwesha biyukilo bikatampe ne bya kukumya, mu kwibatwala mungi basalululwa, umvwe kyakonsheka kuubiwa. 25Umvwai! Nemubuujila jimo.”

26 # Lu 17:23,24 “Kabiji umvwe bakemwambila amba, ‘Talai, uji mungye!’ Kechi mukayeko ne, nangwa kwamba amba, ‘Talai, uji mu mazubo a mukachi!’ Kechi muketabe ne. 27Mambo byonka byuba kubeesha kwa mvula kufuma ku musela ne kumweka ku muzhika, byo kikekala ne pa kwiya Mwana Muntu.

28 # Lu 17:37 “Kuji mubiji wafwa ko kukapwilakena makubi.

Kwiya kwa Mwana Muntu

(Mako 13:24-27; Luka 21:25-28)

29 # Isa 13:10; Yoe 2:10,31; 3:15; Lum 6:12; Isa 13:10; Ezi 32:7; Yoe 2:10; 3:15; Isa 34:4; Lum 6:13 “Kabiji ponkapotu pakupita aa malwa, juba jikaaluka ke mfishi, ne ng'ondo naye kechi ukakema ne, ne tubangabanga twa mwiulu tukaponanga, ne bya bulume bya mwiulu bikasunkeena. 30#Dan 7:13; Zeka 12:10-14; Lum 1:7Kabiji ponkapo kikamweka kiyukilo kya Mwana Muntu mwiulu, kabiji mikoka yonse ya pano panshi ikajila miteto, bakamumona Mwana Muntu kasa eya mu makumbi a mwiulu na bulume ne na lukumo lukatampe. 31Kabiji ukebatuma bamalaika banji na jiwi jikatampe ja ntolompita, ne abo bakebapwizha pamo basalululwa banji kwibafumya ku makonka ana a panopantanda, ne monse mwapela jiulu.

Byakufunda ku kichi kya mukuyu

(Mako 13:28-37; Luka 21:29-33)

32“Kabiji pano fundai kishimpi ku kichi kya mukuyu. Misampi yakyo byo inekena ne kusapuka mabuula, ke kayukilo amba pano mayoo aji pepi. 33Byonkabyo ne anweba byo mukamona bino bintu byonse yukai amba kaaji pepi, ponka pa kibelo. 34Kine nemwambila namba, kino kisemi kechi kikapite ne, poso bino byonse bikafike. 35Jiulu ne ntanda bikapita, pakuba byambo byami kechi bikapite nangwa pachechetu ne.

Kafwako wayuka kimye nangwa Juba ne

36“Pakuba aja juba nangwa kimye kafwako wayuka ne, nangwa bamalaika ba mwiulu, nangwa Mwana ne posotu bonka Bataata. 37#Nte 6:5-8Kabiji byonka byo kyajinga mu moba a Nowa, byo kikekala ne pa kwiya Mwana Muntu. 38Mambo aa moba kasa akyangye kwiya muyuulo, bajiilenga ne kutoma, basongwelenga ne kusongolwa, kufika ne ku joja juba joatwelele mu bwato Nowa, 39#Nte 7:6-24nanchi kechi bayukile ne poso byo aishile muyulo, ne kwibasenda bonse shata! Byonkabyo byo bikekala ne pa kwiya Mwana Muntu. 40Mu akya kimye kukekala baana balume babiji mu bujimi bumo; umo bakamusenda, ne mukwabo bakamusha. 41Banabakazhi babiji bakapelanga pamo, umo bakamusenda, ne mukwabo bakamusha.

42“Onkao mambo ne anweba mulabenga ne kukenkenta mambo kechi mwayuka juba jo akeshilamo Nkambo yenu ne. 43#Lu 12:39,40Kabiji yukai kino amba umvwe mwina nzubo wayukijile jimo pakeshila ngivi, inge walabilenga ne kukenkenta ne kuleka nzubo yanji amba beisabe ne. 44Ne anweba mwikale ba kutengela jimo, mambo Mwana Muntu ukeya pa kimye kyo mwabula kuketekela.

Kalume wa kishinka ne wabula wa kishinka

(Luka 12:41-48)

45“Lelo awa kalume wa kishinka ne wa maana ye ng'anyi, ye apa nkambo yanji bukulumpe bwa bantu ba ku nzubo yanji, amba apanenga kajo pa kimye kyafwainwa? 46Watokwa awa kalume uba, nkambo yanji pa kwiya wamutaana kasa oba byonkabyo. 47Kine, nemwambila namba ukamupa bukulumpe bwa bintu byanji byonsetu. 48Bino umvwe kalume watama walanguluka mu muchima wanji amba, ‘Nkambo yami wabanda kwiya,’ 49ne kutatula kupuma bakalume bakwabo, kaje ne kutoma pamo na bapendwa, 50nkambo ya yewa kalume ukeya mu juba jo abula kuketekela ne mu kimye kyo abula kuyuka. 51Kabiji ukamututaula bingi, ne kumutongwela kumanyikwa pamo naba kamfutumfutu, po pakekala kujila ne kwisuma ku meno.”

Currently Selected:

Mateo 24: KNTP

Highlight

Copy