Mako 11
11
Yesu byo atwelele mu Yelusalema kasa bamutota
(Mateo 21:1-11; Luka 19:28-40; Yoano 12:12-19)
1Kabiji byo bafikile kwipi na Yelusalema, ku Betefaji ne Betani, bayile ku Mutumba wa olivi. Yesu watumine baana banji babwanga babiji, 2ne kwibambila amba, “Yainga mu yewa muzhi ye mwatazhapo bilungi byenu. Ne ponkapotu pa kutwelamo musa kutaana mwana mbongolo ye bakasa, ye bakyangye kukanjilapo ku muntu. Mukamukasulule ne kumuleeta kuno. 3Kabiji umvwe muntu wimwipuzha amba, mambo ka o mubena kubila bibye? Mukamwambile amba, Nkambo wamusaka, kabiji ukamubwezha kuno bukiji.”
4Kabiji bayile bakataine mwana mbongolo ye bakasa pangye ya kibelo pa mukwakwa, ne kumukasulula bamukasulwile, 5kabiji bamo baimene konka be bepwizhe amba, “Mubena kuubaka byo mubena kukasulula mwana mbongolo?”
6Ne abo bebakumbwile monka mo ebambijile Yesu, kabiji bebalekele amba bayenga. 7Kabiji bamuletele mwana mbongolo kwi Yesu, ne kumukupika bivwalo byabo, ne Yesu waikelepo. 8Ne bavula ba anshikile bivwalo byabo mu jishinda, ne bakwabo ba anshikile mabuula a bichi byo bachimwinenga mu majimi. 9#Sala 118:25,26Ne abo batangijileko, ne balondejilenga panyuma babijikilenga amba, “Hosana! Atotwe awa wiya mu jizhina ja Nkambo! 10Butootwe abwa bufumu bwiya bwa mushakulu wetu Davida! Hosana mwiulu mwine!”
11Kabiji byo atwelele mu Yelusalema, wapitaijiletu kutwela mu nzubo ya Lesa. Byo atajiletajile pa bintu byonse, ne kimye kyaubile ke mabanga, walupukile ne kuya ku Betani naba jikumi ne babiji.
Mukuyu wabujile kupanga bipangwa
(Mateo 21:18,19)
12Pa juba jalondejilepo byo babwelelenga kufuma ku Betani, Yesu waumvwine nzala. 13Ne pa kumona kichi kya mukuyu kwalepa kasa kiji na mabuula, wapichile konka amba, kana nsakutaanako bipangwa. Kabiji byo afikileko watainekotu mabuula onka, mambo kechi kyajinga kimye kya makuyu ne. 14Ponkapo aye wikyambijile amba, “Kafwako muntu nangwa umo ukajako bipangwa kwi obewa myaka yonse ne.”
Ne baana banji babwanga bekyumvwine.
Yesu byo atokesheshe nzubo ya Lesa
(Mateo 21:12-17; Luka 19:45-48; Yoano 2:13-22)
15Kabiji bafikile ku Yelusalema, ne kutwela mu nzubo ya Lesa watatwile kwibapangamo bapoteshenga ne bapotelenga mu nzubo ya Lesa, ne kwalumuna matebulu a bapimpwilenga mali ne bipona bya boba bapoteshenga ba nkunda. 16Kabiji kechi waswishishe nangwa muntu umo kupisha kijiilo mu nzubo ya Lesa ne. 17#Isa 56:7; Yele 7:11Kabiji wibafujishenga ne kwibambila amba, “Nanchi kechi kyanembwa amba, nzubo yami ikatelwa amba, nzubo ya milombelo ya mikoka yonse ya bantu nenyi? Pakuba anweba mwiyalula ke jiyengo ja ba tupondo!”
18Kabiji bang'anga bakatampe ne banembeshi bekyumvwine, bakebelenga mwa kumonawina. Bino bamuchiine mambo jibumba jonse ja kuminye kufunjisha kwanji.
19Kabiji pakufika mabanga balupukile mu muzhi.
Byakufunda ku kichi kya mukuyu
(Mateo 21:20-22)
20Kabiji lukeelo byo bapichilenga, bamwene akya kichi kya mukuyu kyauma kufika ne ku mizhazhi. 21Ne Petelo wavulukile ne kumwambila amba, “Laabi, talai! Akya kichi kya mukuyu kyo mwafingile kyauma!”
22Ne Yesu wibakumbwile amba, “Ikalai na lwitabilo mwi Lesa. 23#Mat 17:20; 1 Ko 13:2Kine nemwambila namba, awa ukamwambila uno mutumba amba, ushikulwe ne kutayiwa mu kalunga ka mema, ne kuzhinauka mu muchima wanji ne, kasa aitaba amba, akya kyo naamba kikamweka, kikamubilwa. 24Onkao mambo amiwa nemwambila namba, bintu byonse byo musaka, pa kulomba kasa mwitaba amba, twibitambula, kabiji bikekala ke byenu. 25#Mat 6:14,15 Kabiji mu bimye byonse byo mwimana na kulomba, sa mulekela mambo umvwe muji na mambo na mukwenu, namba shenu wa mwiulu emulekele mambo enu.” 26Pakuba umvwe anweba ne kulekela mambo ne, aye shenu wa mwiulu naye kechi akemulekele mambo enu ne.#11:26 Ma buuku amo a mu kigiliki kechi aji ne veleshi 26 ne Umvwe anweba ne kulekela mambo ne, aye shenu wa mwiulu naye kechi akemulekele mambo enu ne.
Byo baipwizhe Yesu mambo a luusa lwanji
(Mateo 21:23-27; Luka 20:1-8)
27Kabiji baishile jibiji ku Yelusalema. Ne byo apitang'enenga mu nzubo ya Lesa, bang'anga bakatampe ne banembeshi, ne bakulumpe baishile ko aji, 28ne kumwipuzha amba, “Na ng'anyi luusa mo ubena kuubila bino bintu, kabiji ng'anyi wakupa luno luusa lwakuuba bino?”
29Kumvwa Yesu wibambijile amba, “Ne amiwa nsa kwimwipuzha jipuzho jimotu, kana mumbuule, ne amiwa nsa kwimubuula luusa mo ngubila bino. 30Nanchi lubatizhilo lwa kwa Yoano lwafumine kwiulu nyi, inyi lwafumine ku bantu? Mbulai.”
31Ponkapo baambang'ene abo bene na bene amba, “Umvwe twambe namba lwa mwiulu, aye usa kwamba amba, mambo ka o mwabujile kumwitabila? 32Pakuba umvwe twambe namba, lwa bantu,” (bachiine bantu mambo bonse bayukile amba Yoano wajinga ngauzhi wa kine.) 33Ponkapo bamukumbwile Yesu amba, “Kechi twayuka ne.”
Kumvwa Yesu naye wibambijile amba, “Nanchi ne amiwa kechi nemubuule luusa lo ngubilamo bibye ne.”
Currently Selected:
Mako 11: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
