Mako 14
14
Kupingila mwa kumwipayila Yesu
(Mateo 26:1-5; Luka 22:1,2; Yoano 11:45-53)
1 #
Lupu 12:1-27
Pano kwashajile moba abiji ke Kijiilo kya Lupitailo ne Kijiilo kya Bashinkwa ba kubula Mbizho. Ne bang'anga bakatampe ne banembeshi baumvwang'enenga bya kumukwata mu bufyamfya ne kumwipaya. 2Mambo ba ambile amba, “Kechi kimye kya kijiilo ne, kuchiina kwakekala kiwowo mu bantu.”
Yesu byo bamushingile manyi ku Betani
(Mateo 26:6-13; Yoano 12:1-8)
3 #
Lu 7:37,38 Kabiji byo ajinga mu Betani mu nzubo ya kwa Shimona wa mbumba, kasa aikala na kuja, kwaishile mwanamukazhi na musashi wa alabasita wa manyi a naada, a mutengo mukatampe, ponkapo walajile musashi ne kumwitulwila Yesu pa mutwe wanji. 4Kabiji kwajinga bamo bazhingijile mu michima yabo ne kwamba amba, “Mambo ka kyo a onawina ano manyi byonkabye? 5Mambo ano manyi inge apoteshiwe na mali kukila bitota bisatu bya denali ne kupanwa ku balanda!” Kabiji bamunene bingi.
6Pakuba Yesu wa ambile amba, “Mulekai! Mwamukatezha ka? Aye wangubila mwingilo wawaama. 7#Mpitu 15:11Pakuba balanda mukekala naabo moba onse, ne kimye kyonse kyo musaka mwakonsha kwibobila byawama. Pakuba amiwa kechi nkekalanga nenu moba onse ne. 8Aye wauba kyo akonsha kuuba, wanshingila jimo manyi mubiji wami mambo a kunengezhezha jimo kwa kuzhiikwa kwami. 9Kine, nemwambila namba, konse konse ko bakasapwila Mambo Awama pano pantanda ponse, ne kino kyo auba uno mwanamukazhi nakyo kikambiwanga ke kya kumuvulukilako.”
Bukamfutumfutu bwa Yudasa
(Mateo 26:14-16; Luka 22:3-6)
10Ne Yudasa Isakaliota, umo wa mu ba jikumi ne babiji, wayile ku bang'anga bakatampe amba a kamusolole Yesu kwi abo. 11Ne abo byo bekyumvwine, basekejile kabiji bamulayile kumupa mali. Ne aye wakebelenga mwa kumusolwela bulongo.
Yesu waja Kijiilo kya Lupitailo na baana banji babwanga
(Mateo 26:17-25; Luka 22:7-14,21-23; Yoano 13:21-30)
12Kabiji pa juba jitanshi ja Kijiilo kya Bashinkwa ba kubula Mbizho, byo batapishishe mwana mukooko wa lupitailo, baana banji babwanga bamwipwizhe amba, “Kwepi ko mwasaka atweba tukanengezhezhe jimo po musa kujiila Kijiilo kya Lupitailo?”
13Ponkapo aye watumine baana banji babwanga babiji ne kwibambila amba, “Yainga mu muzhi, mukasambakana mwanamulume wasenda mulondo wa mema. Kamulondelainga 14monse mo akatwela, mukamwambile mwina nzubo amba, ‘Mufunjishi wa amba amba, nzubo yami ya bwenyi iji pi, mo nkajiila Kijiilo kya Lupitailo na baana bami babwanga?’ 15Ne aye ukemumwesha nzubo ikatampe ya peulu yo banengezhezha jimo bulongo monkamwa momo mu ketunengezhezha.”
16Ne baana babwanga bayile, bakafikile mu muzhi, bakataine byonka byo ebabujile, kabiji banengezhezhe jimo kijiilo kya Lupitailo.
17Ne byo kyafikile ke mabanga, waishile naba jikumi na babiji. 18#Sala 41:9 Kabiji byo baikele na kuja, Yesu wa ambile amba, “Kine, ne mwambila namba umo wa mwi anweba ukansolola, yenka ubena kuja ne amiwa.”
19Ne abo batatwile kuuba bulanda ne bonse ke bamwipuzhe umo umo amba, “Lelo amiwa nyi?”
20Kepo aye ebambijile amba, “Umo wa mu ba jikumi na babiji, yenka ye ntanta nanji shinkwa mu nsanyi. 21Pakuba Mwana Muntu uya monka mo kyamunembelwa, bino malwa kwiyewa umusolola Mwana Muntu! Kyamuwamina awa muntu inge kechi wasemekelwe ne.”
Kijiilo kya Nkambo
(Mateo 26:26-30; Luka 22:14-20; 1 Kolinda 11:23-25)
22Byo bajilenga, washikwile shinkwa, ne pa kumupesha wamutebwile ne kwibapa baana banji babwanga, ne kwamba amba, “Tambulai, uno ye mubiji wami.” 23Kabiji washikwile katomeno ne pa kusanta wibapele, ne bonse batomenemo. 24#Lupu 24:8; Yele 31:31-34 Kabiji wibambijile amba, “Ano o mashi ami a lulayang'ano, ebechikila bavula. 25Kine amiwa nemwambila namba, kechi nkatomapo jibiji bino bipangwa bya mung'anzang'anza ne, poso mu jonkaja juba jo nkatoma angi apya mu bufumu bwa Lesa.”
26Kabiji byo baimbile lwimbo, balupukile ke baye ku Mutumba wa olivi.
Yesu byo a ambijile jimo mambo a kumukana kwi Petelo
(Mateo 26:31-35; Luka 22:31-34; Yoano 13:36-38)
27 #
Zeka 13:7
Ne Yesu wibambijile amba, “Anweba bonse muketuntula, mambo kyanembwa amba, ‘Nkamwipaya kafunga ne mikooko ikapalang'enamo.’ 28#Mat 28:16Nangwa byonkabyo pa kusangulwa amiwa nkatangilako ku Ngalilea.”
29Pakuba Petelo wamwambijile amba, “Nangwa bonse baketuntula, amiwa ne.” 30Kumvwa Yesu wamwambijile amba, “Kine nemwambila namba, buno bufuku bwa leelo, shikombwe kasa akyangye kukookola jibiji, anweba musakunkana jisatu.”
31Pakuba Petelo wa ambishetu na lupata amba, “Amiwa nangwa mfwe nenu, kechi nsa kwimukaana nangwa pachechetu ne.”
Kabiji ne bakwabo nabo ba ambile byonkabyo.
Yesu byo alombele mu Ngesemani
(Mateo 26:36-46; Luka 22:39-46)
32Kabiji baishile ku mpunzha iteelwa jizhina amba Ngesemani. Kabiji wa ambijile baana banji babwanga amba, “Ikalai pano, byo naya na kulomba.” 33Wasendele ba Petelo, ne Yakoba, ne Yoano, watatwile kukaakilwa, ne kunemenwa mu muchima wanji, 34ne aye wibambijile amba, “Muchima wami waubisha bulanda usaka ne kufwa. Ikalai pano, mulabenga.”
35Ponkapo waendeleko pacheche, waponene panshi, ne kulomba kalombe amba, “Umvwe kyakonsheka kubiwa, kino kimye kimpitaile.” 36Kabiji wa ambile amba, “Abba, Taata! Bintu byonse byakonsheka kubiwa kwi anweba. Fumyai kano katomeno kwi amiwa nangwa byonkabyo kechi byo nsaka amiwa ne. Poso kyo mwasaka anweba.”
37Kabiji wabwelele ne kwibataana kasa balaala mutulo, wamwambijile Petelo amba, “Shimona walalaanyi?” Kechi wakonsha kulaba awala umo nenyi? 38“Labainga ne kulomba, kuchiina amba mwakatwela mu lweseko. Kine muchima waswa, pakuba mubiji wanekena.”
39Ne aye wayile jibiji, wakalombele kasa a bweluluka mu byambo bimotu. 40Kabiji wa bwelele jibiji ne kwibataana kasa balaala; mambo meso abo anemene natulo, ne abo kechi bayukile kya kumukumbula ne.
41Kabiji waishile jabusatu, ne kwibambila amba, “Ne pano mwakilaala na kukokoloka nyi? Kyawama! Kimye kyafikila! Talai, Mwana Muntu ubena kusololwa mu maboko a bandengamambo. 42Imanai, tuyenga, talai! Wa kunsolola kaji pepi.”
Kusololwa ne kukwatwa kwa Yesu
(Mateo 26:47-56; Luka 22:47-53; Yoano 18:3-12)
43Kabiji ponkapotu, byo akyambilenga, Yudasa waishile, umo wa ba jikumi na babiji, waishile na kiombe, kasa basenda mapanga ne tukonkolo, bafumine ku bang'anga bakatampe ne banembeshi ne bakulumpe. 44Kabiji awa wamusolwele wibabujiile jimo kayukilo amba, “Yenkawa ye nkafyompa i ye, mumukwate. Mumutwale ne kumulama bulongo.”
45Ponkapotu byo afikile waishile kwi aye, ne kumwambila amba, “Laabi!” Kabiji wamufyompele. 46Bamupimpukijile ne kumukwata. 47Bino umo waimene kwipi wasomwene mupanga wanji wa mukapile kalume wa ng'anga mukatampe, ne kumukopola kutwi. 48Ne Yesu wibambijile amba, “Anweba mwaiya na mapoko ne na tukonkolo na kunkwata nobe kapondo nyi? 49#Lu 19:47; 21:37 Amiwa na kelelwenga nenu moba onse mu nzubo ya Lesa kasa mfunjisha, ne anweba ne kunkwata ne. Bino kino kyamweka amba, binembelo bifike.”
50Kabiji bonse bo ajinga naabo bamushiile ne kunyema.
51Nsongwalume umo wamulondejilenga, kasa ekumbakanyatu kisapi kya linenyi kyonka pa mubiji ne aye naye basakile kumukwata, 52pakuba aye wibaposomokele, washiile kisapi kya linenyi, ne kunyematu bwamba.
Yesu byo aimene mukije
(Mateo 26:57-68; Luka 22:54-55,63-71; Yoano 18:13-14,19-24)
53Ponkapo Yesu bamutwajile ku nzubo ya ng'anga mukatampe. Ne bonse bang'anga bakatampe ne bakulumpe ne banembeshi bapwijile pamo. 54Ne Petelo walondejilenga katwezhimina kufika ne mu kipango kya ng'anga mukatampe. Waikele na bakalama nakoota mujilo. 55Kabiji bang'anga bakatampe ne bena kije bonse bakebele kya kumushiina Yesu amba, bamwipaye, kabiji kechi bekimwene ne. 56Mambo bavula bamushinawijilenga bya bubela, bino byambo byabo kechi byaijilenga mumo ne.
57Ne bamo baimene ne kumubepela bubela amba, 58#Yoa 2:19 “Twamumvwine kasa amba amba, ‘Nakonsha ku kundula ino nzubo ya Lesa ya shimikwa na maboko, ne mu moba asatu nkashimika ikwabo, ya kubula kushimika na maboko.’ ” 59Kabiji nangwa byonkabyo bukamonyi bwabo kechi bwaijile mumo ne.
60Ponkapo ng'anga mukatampe waimene mukachi kabo, ne kumwipuzha Yesu amba, “Lelo obewa ne kukumbulapo pa bino bintu byo bakushiina nenyi?”
61Pakuba aye wazhindaminetu ne kumukumbula ne. Ne ng'anga mukatampe wa mwipwizhe jibiji amba, “Yobe Kilishitu Mwana Lesa Utotwa nyi?”
62 #
Dan 7:13
Kumvwa Yesu amba, “Ye amiwa bano, kabiji mukamona Mwana Muntu kasa aikala ku kuboko kwa kilujo kwa Bulume, kasa eya mu makumbi a mwiulu!”
63Ponkapo ng'anga mukatampe watabawile bivwalo byanji, ne kwamba amba, “Tukisakilaka bakamonyi! 64#Levi 24:16 Mwaumvwa mwenga wanji. Pano mwalanguluka, amba ka?”
Ne bonse bamufwishishe nao, amba wafwainwa kufwa.
65Ponkapo bamo batatwile kumushipila mate, ne kumuvweta pa meso, ne kumupuma binkonyi, kabiji ne kumwambila amba, “Aulanga!” Ne bakalama bamusendele ne kumupuma mapi.
Petelo byo amukaine Yesu
(Mateo 26:69-75; Luka 22:56-62; Yoano 18:15-18,25-27)
66Kabiji Petelo byo ajinga munshi mu kipango, kwaishile kamwale muzha wa ng'anga mukatampe, 67ne pa kumumona Petelo kasa ota mujilo, wamutajile ne kwamba amba, “Ne anweba mwajinga nanji awe Yesu mwina Nazala.”
68Pakuba aye wa kaine amba, “Amiwa kechi nayuka, nangwa kumvwisha byo wa amba ne.” Ponkapo walupukile mu bukonde ne shikombwe wakokweele.#14:68 Ma buuku amo a mu kigiliki kechi muji byambo bya Ne shikombwe wakokweele ne.
69Ne awa kamwale wamumwene kabiji watatwile kwibambila aba baimene konka amba, “Uno ye umo wabo.”
70Pakuba aye wakaine jibiji. Kabiji pakupita kimye kicheche kikwabo, aba baimene konka ba mwambijile Petelo amba, “Kine obewa wi mwina Ngalilea.”
71Pakuba aye watatwile kwifinga ne kuchipa amba, kechi namuyuka uno muntu ye mubena kuteela ne.
72Ponkapotu shikombwe wakokweele ke jibiji. Ne Petelo wavulukile kyambo kya mwambijile Yesu amba, “Shikombwe kasa akyangye kukookola jibiji usakunkana jisatu.” Ne pa kwikilanguluka wajijile bingi.
Currently Selected:
Mako 14: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
Mako 14
14
Kupingila mwa kumwipayila Yesu
(Mateo 26:1-5; Luka 22:1,2; Yoano 11:45-53)
1 #
Lupu 12:1-27
Pano kwashajile moba abiji ke Kijiilo kya Lupitailo ne Kijiilo kya Bashinkwa ba kubula Mbizho. Ne bang'anga bakatampe ne banembeshi baumvwang'enenga bya kumukwata mu bufyamfya ne kumwipaya. 2Mambo ba ambile amba, “Kechi kimye kya kijiilo ne, kuchiina kwakekala kiwowo mu bantu.”
Yesu byo bamushingile manyi ku Betani
(Mateo 26:6-13; Yoano 12:1-8)
3 #
Lu 7:37,38 Kabiji byo ajinga mu Betani mu nzubo ya kwa Shimona wa mbumba, kasa aikala na kuja, kwaishile mwanamukazhi na musashi wa alabasita wa manyi a naada, a mutengo mukatampe, ponkapo walajile musashi ne kumwitulwila Yesu pa mutwe wanji. 4Kabiji kwajinga bamo bazhingijile mu michima yabo ne kwamba amba, “Mambo ka kyo a onawina ano manyi byonkabye? 5Mambo ano manyi inge apoteshiwe na mali kukila bitota bisatu bya denali ne kupanwa ku balanda!” Kabiji bamunene bingi.
6Pakuba Yesu wa ambile amba, “Mulekai! Mwamukatezha ka? Aye wangubila mwingilo wawaama. 7#Mpitu 15:11Pakuba balanda mukekala naabo moba onse, ne kimye kyonse kyo musaka mwakonsha kwibobila byawama. Pakuba amiwa kechi nkekalanga nenu moba onse ne. 8Aye wauba kyo akonsha kuuba, wanshingila jimo manyi mubiji wami mambo a kunengezhezha jimo kwa kuzhiikwa kwami. 9Kine, nemwambila namba, konse konse ko bakasapwila Mambo Awama pano pantanda ponse, ne kino kyo auba uno mwanamukazhi nakyo kikambiwanga ke kya kumuvulukilako.”
Bukamfutumfutu bwa Yudasa
(Mateo 26:14-16; Luka 22:3-6)
10Ne Yudasa Isakaliota, umo wa mu ba jikumi ne babiji, wayile ku bang'anga bakatampe amba a kamusolole Yesu kwi abo. 11Ne abo byo bekyumvwine, basekejile kabiji bamulayile kumupa mali. Ne aye wakebelenga mwa kumusolwela bulongo.
Yesu waja Kijiilo kya Lupitailo na baana banji babwanga
(Mateo 26:17-25; Luka 22:7-14,21-23; Yoano 13:21-30)
12Kabiji pa juba jitanshi ja Kijiilo kya Bashinkwa ba kubula Mbizho, byo batapishishe mwana mukooko wa lupitailo, baana banji babwanga bamwipwizhe amba, “Kwepi ko mwasaka atweba tukanengezhezhe jimo po musa kujiila Kijiilo kya Lupitailo?”
13Ponkapo aye watumine baana banji babwanga babiji ne kwibambila amba, “Yainga mu muzhi, mukasambakana mwanamulume wasenda mulondo wa mema. Kamulondelainga 14monse mo akatwela, mukamwambile mwina nzubo amba, ‘Mufunjishi wa amba amba, nzubo yami ya bwenyi iji pi, mo nkajiila Kijiilo kya Lupitailo na baana bami babwanga?’ 15Ne aye ukemumwesha nzubo ikatampe ya peulu yo banengezhezha jimo bulongo monkamwa momo mu ketunengezhezha.”
16Ne baana babwanga bayile, bakafikile mu muzhi, bakataine byonka byo ebabujile, kabiji banengezhezhe jimo kijiilo kya Lupitailo.
17Ne byo kyafikile ke mabanga, waishile naba jikumi na babiji. 18#Sala 41:9 Kabiji byo baikele na kuja, Yesu wa ambile amba, “Kine, ne mwambila namba umo wa mwi anweba ukansolola, yenka ubena kuja ne amiwa.”
19Ne abo batatwile kuuba bulanda ne bonse ke bamwipuzhe umo umo amba, “Lelo amiwa nyi?”
20Kepo aye ebambijile amba, “Umo wa mu ba jikumi na babiji, yenka ye ntanta nanji shinkwa mu nsanyi. 21Pakuba Mwana Muntu uya monka mo kyamunembelwa, bino malwa kwiyewa umusolola Mwana Muntu! Kyamuwamina awa muntu inge kechi wasemekelwe ne.”
Kijiilo kya Nkambo
(Mateo 26:26-30; Luka 22:14-20; 1 Kolinda 11:23-25)
22Byo bajilenga, washikwile shinkwa, ne pa kumupesha wamutebwile ne kwibapa baana banji babwanga, ne kwamba amba, “Tambulai, uno ye mubiji wami.” 23Kabiji washikwile katomeno ne pa kusanta wibapele, ne bonse batomenemo. 24#Lupu 24:8; Yele 31:31-34 Kabiji wibambijile amba, “Ano o mashi ami a lulayang'ano, ebechikila bavula. 25Kine amiwa nemwambila namba, kechi nkatomapo jibiji bino bipangwa bya mung'anzang'anza ne, poso mu jonkaja juba jo nkatoma angi apya mu bufumu bwa Lesa.”
26Kabiji byo baimbile lwimbo, balupukile ke baye ku Mutumba wa olivi.
Yesu byo a ambijile jimo mambo a kumukana kwi Petelo
(Mateo 26:31-35; Luka 22:31-34; Yoano 13:36-38)
27 #
Zeka 13:7
Ne Yesu wibambijile amba, “Anweba bonse muketuntula, mambo kyanembwa amba, ‘Nkamwipaya kafunga ne mikooko ikapalang'enamo.’ 28#Mat 28:16Nangwa byonkabyo pa kusangulwa amiwa nkatangilako ku Ngalilea.”
29Pakuba Petelo wamwambijile amba, “Nangwa bonse baketuntula, amiwa ne.” 30Kumvwa Yesu wamwambijile amba, “Kine nemwambila namba, buno bufuku bwa leelo, shikombwe kasa akyangye kukookola jibiji, anweba musakunkana jisatu.”
31Pakuba Petelo wa ambishetu na lupata amba, “Amiwa nangwa mfwe nenu, kechi nsa kwimukaana nangwa pachechetu ne.”
Kabiji ne bakwabo nabo ba ambile byonkabyo.
Yesu byo alombele mu Ngesemani
(Mateo 26:36-46; Luka 22:39-46)
32Kabiji baishile ku mpunzha iteelwa jizhina amba Ngesemani. Kabiji wa ambijile baana banji babwanga amba, “Ikalai pano, byo naya na kulomba.” 33Wasendele ba Petelo, ne Yakoba, ne Yoano, watatwile kukaakilwa, ne kunemenwa mu muchima wanji, 34ne aye wibambijile amba, “Muchima wami waubisha bulanda usaka ne kufwa. Ikalai pano, mulabenga.”
35Ponkapo waendeleko pacheche, waponene panshi, ne kulomba kalombe amba, “Umvwe kyakonsheka kubiwa, kino kimye kimpitaile.” 36Kabiji wa ambile amba, “Abba, Taata! Bintu byonse byakonsheka kubiwa kwi anweba. Fumyai kano katomeno kwi amiwa nangwa byonkabyo kechi byo nsaka amiwa ne. Poso kyo mwasaka anweba.”
37Kabiji wabwelele ne kwibataana kasa balaala mutulo, wamwambijile Petelo amba, “Shimona walalaanyi?” Kechi wakonsha kulaba awala umo nenyi? 38“Labainga ne kulomba, kuchiina amba mwakatwela mu lweseko. Kine muchima waswa, pakuba mubiji wanekena.”
39Ne aye wayile jibiji, wakalombele kasa a bweluluka mu byambo bimotu. 40Kabiji wa bwelele jibiji ne kwibataana kasa balaala; mambo meso abo anemene natulo, ne abo kechi bayukile kya kumukumbula ne.
41Kabiji waishile jabusatu, ne kwibambila amba, “Ne pano mwakilaala na kukokoloka nyi? Kyawama! Kimye kyafikila! Talai, Mwana Muntu ubena kusololwa mu maboko a bandengamambo. 42Imanai, tuyenga, talai! Wa kunsolola kaji pepi.”
Kusololwa ne kukwatwa kwa Yesu
(Mateo 26:47-56; Luka 22:47-53; Yoano 18:3-12)
43Kabiji ponkapotu, byo akyambilenga, Yudasa waishile, umo wa ba jikumi na babiji, waishile na kiombe, kasa basenda mapanga ne tukonkolo, bafumine ku bang'anga bakatampe ne banembeshi ne bakulumpe. 44Kabiji awa wamusolwele wibabujiile jimo kayukilo amba, “Yenkawa ye nkafyompa i ye, mumukwate. Mumutwale ne kumulama bulongo.”
45Ponkapotu byo afikile waishile kwi aye, ne kumwambila amba, “Laabi!” Kabiji wamufyompele. 46Bamupimpukijile ne kumukwata. 47Bino umo waimene kwipi wasomwene mupanga wanji wa mukapile kalume wa ng'anga mukatampe, ne kumukopola kutwi. 48Ne Yesu wibambijile amba, “Anweba mwaiya na mapoko ne na tukonkolo na kunkwata nobe kapondo nyi? 49#Lu 19:47; 21:37 Amiwa na kelelwenga nenu moba onse mu nzubo ya Lesa kasa mfunjisha, ne anweba ne kunkwata ne. Bino kino kyamweka amba, binembelo bifike.”
50Kabiji bonse bo ajinga naabo bamushiile ne kunyema.
51Nsongwalume umo wamulondejilenga, kasa ekumbakanyatu kisapi kya linenyi kyonka pa mubiji ne aye naye basakile kumukwata, 52pakuba aye wibaposomokele, washiile kisapi kya linenyi, ne kunyematu bwamba.
Yesu byo aimene mukije
(Mateo 26:57-68; Luka 22:54-55,63-71; Yoano 18:13-14,19-24)
53Ponkapo Yesu bamutwajile ku nzubo ya ng'anga mukatampe. Ne bonse bang'anga bakatampe ne bakulumpe ne banembeshi bapwijile pamo. 54Ne Petelo walondejilenga katwezhimina kufika ne mu kipango kya ng'anga mukatampe. Waikele na bakalama nakoota mujilo. 55Kabiji bang'anga bakatampe ne bena kije bonse bakebele kya kumushiina Yesu amba, bamwipaye, kabiji kechi bekimwene ne. 56Mambo bavula bamushinawijilenga bya bubela, bino byambo byabo kechi byaijilenga mumo ne.
57Ne bamo baimene ne kumubepela bubela amba, 58#Yoa 2:19 “Twamumvwine kasa amba amba, ‘Nakonsha ku kundula ino nzubo ya Lesa ya shimikwa na maboko, ne mu moba asatu nkashimika ikwabo, ya kubula kushimika na maboko.’ ” 59Kabiji nangwa byonkabyo bukamonyi bwabo kechi bwaijile mumo ne.
60Ponkapo ng'anga mukatampe waimene mukachi kabo, ne kumwipuzha Yesu amba, “Lelo obewa ne kukumbulapo pa bino bintu byo bakushiina nenyi?”
61Pakuba aye wazhindaminetu ne kumukumbula ne. Ne ng'anga mukatampe wa mwipwizhe jibiji amba, “Yobe Kilishitu Mwana Lesa Utotwa nyi?”
62 #
Dan 7:13
Kumvwa Yesu amba, “Ye amiwa bano, kabiji mukamona Mwana Muntu kasa aikala ku kuboko kwa kilujo kwa Bulume, kasa eya mu makumbi a mwiulu!”
63Ponkapo ng'anga mukatampe watabawile bivwalo byanji, ne kwamba amba, “Tukisakilaka bakamonyi! 64#Levi 24:16 Mwaumvwa mwenga wanji. Pano mwalanguluka, amba ka?”
Ne bonse bamufwishishe nao, amba wafwainwa kufwa.
65Ponkapo bamo batatwile kumushipila mate, ne kumuvweta pa meso, ne kumupuma binkonyi, kabiji ne kumwambila amba, “Aulanga!” Ne bakalama bamusendele ne kumupuma mapi.
Petelo byo amukaine Yesu
(Mateo 26:69-75; Luka 22:56-62; Yoano 18:15-18,25-27)
66Kabiji Petelo byo ajinga munshi mu kipango, kwaishile kamwale muzha wa ng'anga mukatampe, 67ne pa kumumona Petelo kasa ota mujilo, wamutajile ne kwamba amba, “Ne anweba mwajinga nanji awe Yesu mwina Nazala.”
68Pakuba aye wa kaine amba, “Amiwa kechi nayuka, nangwa kumvwisha byo wa amba ne.” Ponkapo walupukile mu bukonde ne shikombwe wakokweele.#14:68 Ma buuku amo a mu kigiliki kechi muji byambo bya Ne shikombwe wakokweele ne.
69Ne awa kamwale wamumwene kabiji watatwile kwibambila aba baimene konka amba, “Uno ye umo wabo.”
70Pakuba aye wakaine jibiji. Kabiji pakupita kimye kicheche kikwabo, aba baimene konka ba mwambijile Petelo amba, “Kine obewa wi mwina Ngalilea.”
71Pakuba aye watatwile kwifinga ne kuchipa amba, kechi namuyuka uno muntu ye mubena kuteela ne.
72Ponkapotu shikombwe wakokweele ke jibiji. Ne Petelo wavulukile kyambo kya mwambijile Yesu amba, “Shikombwe kasa akyangye kukookola jibiji usakunkana jisatu.” Ne pa kwikilanguluka wajijile bingi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.