Mako 3
3
Muntu wajinga na kuboko kwapapa
(Mateo 12:9-14; Luka 6:6-11)
1Ponkapo Yesu watwelele jibiji mu shinagoga, mwaji muntu wajinga na kuboko kwapapa. 2Ne abo kebamutale amba bamone kana usa kumubuka mu juba ja Sabado, amba bamone mwa kumushiina. 3Ponkapo Yesu wamwambijile muntu wajinga na kuboko kwapapa amba, “Iya kuno.” 4Kabiji wibambijile amba, “Lelo nanchi kizhila kuuba kyawama pa juba ja Sabado nyi, inyi kyatama? Kupulusha mweo nyi, inyi kwipaya?” Bino abo bazhindaminetu nzoo. 5Kepo aye wibatajile na bukaji, kasa afichishiwa ku muchima na mambo a kukosa kwa michima yabo, wamwambijile muntu amba, “Tanyika kuboko kobe.” Ponkapo wikutanyikile, ne kuboko kwanji kwabwelele ke kutuntulu. 6Kabiji Bafaliseo balupukile pangye ne ponkapotu bamumvwang'ejile na bena Heloda mwa kumonawina.
Jibumba jikatampe ku kizhiba kya Ngalilea
7Kabiji Yesu wafumineko ne baana banji babwanga bayile ku kizhiba, ne jibumba jikatampe ja ku Ngalilea ne ku Yudea ja mulondejile. 8Ne ba ku Yelusalema, ne ba ku Idumea, ne ba ku bushiya bwa Yodano, ne ba kubwipi na Tila ne Shidona. Jibumba jikatampe byo jaumvwine byonse byo aubilenga jaishile ko aji. 9#Mako 4:1; Lu 5:1-3Mambo jibumba jajinga jikatampe bingi aye wabuujile baana banji babwanga amba bamunengezhezhe bwato bucheche, kuchiina amba ba kamufinankanya. 10Ne aye wabukile bantu bavula, onkao mambo mobavujila bajinga na myalo bamufinankenye amba tumukwate pa mubiji. 11Ne boba bajinga na bapashi babipa byo bamumwenenga, baponenenga panshi mu kyenyi kyanji, kasa babijika amba, “Yenu Mwana Lesa!” 12Ne aye wibajimwine javula amba kechi babuule bantu amba ye Mwana Lesa ne.
Kusalwa kwa batumwa jikumi na babiji
(Mateo 10:1-4; Luka 6:12-16)
13Ponkapo wakanjijile ku mutumba ne kwibeta ko aji abo bo asakile mwine. Kabiji baishile ko aji. 14Ne aye watongwele jikumi ne babiji, boatumbile amba batumwa, bakwikala nanji, ne ba kutuma kuya na kusapwila, 15ne kwikala na luusa lwa kupangamo bademona.
16Watongwele jikumi na babiji, Shimona ye atumbile jizhina amba Petelo; 17Ne Yakoba mwana Zebede, ne Yoano mulongo wanji, boatumbile jizhina, ja Boaneje, ja lumbulula amba, kutatauka nobe mvula; 18ne Andeleo, ne Filipa, ne Batolomo, ne Mateo, ne Tomase, ne Yakoba mwana Alefesa, ne Tadeusa, ne Shimona mwina Kenana, 19ne Yudasa Isakaliota, yenka wamusolwele Yesu.
Yesu ne Belezebuba
(Mateo 12:22-32; Luka 11:14-23; 12:10)
20Kabiji watwelele mu nzubo. Ne jibumba japwijile pamo jibiji, kyakuuba amba bakankelwe ne kuja. 21Ne balongo banji byo bekyumvwine, balupukile amba bakamukwate, mambo ba ambilenga amba, “wakonya.”
22 #
Mat 9:34; 10:25 Kabiji banembeshi bafumine ku Yelusalema ba ambilenga amba, “Wanonkwa kwi Belezebuba,” kabiji amba “Upangamo bademona na mfumu wa bademona.”
23Kabiji wibechile ko aji ne kwibambila mu bishimpi amba, “Nanchi Satana wakonsha ku pangamo byepi Satana?” 24Umvwe bufumu bwialukila bwine abwa bufumu kechi bwakonsha kwikala ne. 25Kabiji umvwe nzubo yialukila iine, aya nzubo kechi yakonsha kwikala ne. 26Kabiji umvwe Satana wibuukila mwine wiabanya, kechi wakonsha kwikala ne, nanchi wafika kumpelo. 27Bino kafwako muntu wakonsha kutwela mu nzubo ya kilobo ne kupukula bintu byanji ne, poso patanshi wamukasa kilobo. Bino akonshe kupukula bya mu nzubo yanji. 28#3:28 Bya mwenga byonse byo bamba: nangwa amba bibi byonse byo bamuneena aye Lesa. “Kine ne mwambila namba, mambo aabo onse ake balekelwa baana ba bantu ne bya mwenga byonse byo bamba. 29#Lu 12:10Pakuba awa umunena mwenga Mupashi Wazhila, mambo anji kechi akalekelwa myaka yonse ne, mambo wazhatwa nao a myaka yonse.” 30Mambo ba ambile amba, “Uji na mupashi wabiipa.”
Inanji ne balongo banji Yesu
(Mateo 12:46-50; Luka 8:19-21)
31Kabiji inanji ne balongo banji baishile. Byo baimene pangye, batumine muntu kwi aye na kumwita. 32Jibumba jaikele kasa ja muzhokoloka, ba mwambijile amba, “Umvwai bainenu ne balongo benu ba bena kwimusaka pangye.”
33Kumvwa aye wibakumbwile amba, “Lelo bamama ne balongo bami bo bang'anyi?” 34Kabiji pa kwibatalatala aba baikele kasa bamuzhokoloka, wa ambile amba, “Bano bo bamama ne balongo bami! 35Aye uba kyaswa muchima wa Lesa ye mulongo wami, ye nyenga yami, kabiji ye mama.”
Currently Selected:
Mako 3: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
