Mako 6

Yesu byo bamulengulwile ku Nazala

(Mateo 13:53-58; Luka 4:16-30)

1Aye wafumineko kabiji wayile ku muzhi wanji, ne baana banji babwanga bamulondejile. 2Ne byo jafikile juba ja Sabado watatwile kufunjisha mu shinagoga. Ne bavula pa kumumvwa bakuminye bingi ne kwipuzha amba, “Lelo bino bintu wibifumya pi? Kabiji wapewa byepi ano maana? Ne ino mingilo ya bulume yoabena kwingila na maboko anji yayila muka? 3Nanchi uno kechi ye sendwe wa mbao, mwana Maliya, koloja ba Yakoba, ne Yosesa, ne Yudasa, ne Shimona? Ne banyenga yanji ke tuji naabo monka muno nenyi? Kabiji betuntwile na mambo a aye.”

4 # Yoa 4:44 Kumvwa Yesu wibambijile amba, “Ngauzhi kechi wabulwa buneme ne, poso monka mu muzhi wanji, ne mu balongo banji, ne mu nzubo yanji.”

5Kabiji akwa kechi wakonsheshe kuuba mwingilo wa bulume ne, poso kubika maboko anji pa bamo bakolwa ne kwibabuka. 6Ne aye wa kuminye, mambo a milengulwila yabo. Kabiji wapitang'enenga mu mizhi yonse na kufunjisha.

Yesu byo atumine baana babwanga jikumi ne babiji

(Mateo 10:5-15; Luka 9:1-6)

7Ponkapo wibechile ba jikumi ne babiji, ne kwibatuma babiji, babiji. Kabiji wibapele luusa pa bapashi babipa 8kabiji wi bakayinye amba, “Kusenda nangwa kimo pa lwendo ne, poso mukombo yenka, nangwa kusenda shinkwa ne, nangwa fukuta ne, nangwa mali mu bikwama byenu ne. 9Pakuba mukavwale makwabilo, kechi muvwale minkukumba ibiji ne.” 10Kabiji wibambijile amba, “Monse mu nzubo mo mukatwela mukekale monka poso byo mukafuma mu yewa muzhi. 11#Byu 13:51#Lu 10:4-11Kabiji konse konse ko bakabula kwimutambula, nangwa kwimumvwa, mukafumeko kabiji mukakunte lukungu lwa ku maulu enu, kya kwibashiina.”

12Ponkapo bayile na kusapwila amba, bantu balapile. 13#Yako 5:14Kabiji bapangile bademona bavula mu bantu, ne kwibashinga manyi bavula bakolwa ne kwibabuka.

Lufu lwa Yoano Mubatishi

(Mateo 14:1-12; Luka 9:7-9)

14 # Mat 16:14; Mako 8:28; Lu 9:19 Ne mfumu Heloda#6:14Ne Mfumu Heloda: Heloda Antipasa, ndamakyalo wa mu Ngalileya. wikyumvwine, mambo jizhina ja Yesu jakumbene konse. Bamo ba ambile amba, “Yoano Mubatishi wasanguka mu bafu, kyo kyo aikeela na buno bulume bubena kwingila mwi aye.”

15Pakuba bakwabo ba ambile amba, “Ye Elaija.”

Kabiji bakwabo ba ambile amba, ye ngauzhi, byonka byajinga bangauzhi bakala.

16Pakuba Heloda byo aumvwine wa ambile amba, “Ye Yoano Mubatishi ye natapile wasanguka.” 17#Lu 3:19,20Mambo Heloda mwine watumine miluwe amba bamukwate Yoano, kabiji wamukashile mu kaleya. Mambo Heloda wasongwele Helodiasa muka Filipa mulongo wanji. 18Mambo Yoano wamwambijile Heloda amba, “Kizhila anweba kusongola muka mulongo wenu.”

19Kabiji Helodiasa wamubijile mfika, kabiji wasakile kumwipaya, bino wakankelwe. 20Aye Heloda wamuchiinenga Yoano, byo ayukile amba wajinga muntu waoloka ne wazhila, wa mulamine bulongo. Kabiji Heloda watemenwe kuteleka byambo bya kwa Yoano na lusekelo nangwa wakatazhiwe bingi mu muchima wanji, pa kumumvwa.

21Bino pa juba ja kusemwa kwanji Heloda, Helodiasa wamwene jishuko. Heloda watekele kijiilo kya ba bilolo banji, ne bakulumpe ba nzhita, ne bakulumpe bamu Ngalilea. 22Kabiji mwana wamukazhi wa kwa Helodiasa byo atwelele na kuzha, ne kumutokesha pa muchima Heloda ne benyi banji. Ne mfumu wamwambijile awa kamwale amba, “Ndombe byonse byo usaka, ne amiwa nsakukupa.” 23Kabiji wachipile amba “Byonse byo usa kundomba, nsa kukakupa kufika ku lubaji lumo lwa bufumu bwami.”

24Ne aye walupukile ne kwipuzha bainanji amba, “Lelo ikika kyonsa kulomba?”

Kumvwa aye amba, “Mutwe wa kwa Yoano Mubatishi.”

25Ponkapotu watwelele lubilo mwi mfumu, ne kwamba amba, “Bampe ponka pano mutwe wa Yoano Mubatishi pa muchiba” 26Ne mfumu kyamubile bingi bulanda, byonkabyo kechi wakaine kumupa mutwe wakwa Yoano ne, mambo a luchipo ne boba bo aikajile naabo ku tebulu. 27Ponkapotu mfumu watumine mushilikale wa mu bakalama banji ne kumukambizha amba, a kalete mutwe wakwa Yoano. Kabiji wayile na kumuchiba mutwe monka mu kaleya, 28kabiji waletele mutwe wanji pa muchiba ne kumupa awa kamwale, ne aye wapaine kwi inanji. 29Kabiji baana banji babwanga byo baumvwine, baishile na kusenda mubiji wanji ne kumuzhiika mu kilende.

Yesu byo a jishishe bantu biumbi bitanu

(Mateo 14:13-21; Luka 9:10-17; Yoano 6:1-14)

30Kabiji batumwa byo bepwizhizhe pamo konka kwi Yesu, bamubujile byonse byo baubilenga ne byo bafunjishenga. 31Kabiji aye wibambijile amba, “Twayai kwa bunke bwetu mukokoloke.” Mambo kwajinga bantu bavula baishilenga ne kuya, kabiji bakankelwe ne kimye kya kuja. 32Kabiji bayile na bwato kwa bunke bwabo.

33Bino bavula bebamwene byo bayilenga, kabiji bebayukile, ne abo bonse bapichile lubilo kungye kuya konka, bafumine mu mizhi yonse, kabiji bafikile bukiji Yesu ne baana banji babwanga kasa bakyangye kufika. 34#Bala 27:17; 1 Mfu 22:17; 2 Moba 18:16; Ezi 34:5; Mat 9:36Ne aye pa kutuntuka wamwene jibumba jikatampe, wibobijile lusa, mambo bajinga pamo nobe mikooko yabula kafunga. Ponkapo watatwile kwibafunjisha byavula. 35Kabiji juba byo jaji pepi kuzhika, baana banji babwanga baishile ko aji amba, “Muno mungyetu kabiji bwaila kala. 36Mwibambile bantu baye mu majimi ne mu mizhi iji kwipi, bakepotele bene bya kuja.”

37Bino aye wibakumbwile amba, “Yenka anweba mwibape bya kuja baje.”

Kumvwa abo amba, “Tuye tukapote bashinkwa naba ndenali bitoota bibiji twibape baje nyi?”

38Kumvwa aye amba, “Nanchi bashinkwa bo muji naabo, baji banga? Kamonai.” Kabiji byo bayukile bamubujile amba “Baji batanu ne masabi abiji.”

39Kabiji aye wibakambizhe amba, ikalai panshi mu bilumbiji, bilumbiji pa nsono ya munyemvu. 40Ponkapo baikele mu bilumbiji bya bitoota, ne bya makumi atanu, atanu. 41Ne aye watambwile bashinkwa batanu ne masabi abiji, ne pakutala mwiulu wapesheshe, kabiji watebawile bashinkwa, ne kupana ku baana banji babwanga amba, bapane ku bantu, kabiji ne masabi abiji nao wibabenye bonse. 42Kabiji bajiile bonse ne kwikuta. 43Kepo batolawile bilukwa byayula bibese, jikumi na bibiji ne masabi pamo. 44Bantu bajiile bashinkwa bajinga biumbi bitanu bya banabalume.

Yesu byo a endele pa mema

(Mateo 14:22-33; Yoano 6:15-21)

45Ponkapo Yesu wa ambijile baana banji babwanga amba, bakanjile mu bwato, babukile ku bushiya batangilepo ku Betesaida, aye mwine washajile na kwimanya mabumba. 46Ne pa kwabana naabo, wayile ku mutumba na kulomba. 47Kabiji byo jafikile ke mabanga, bwato bwafikile pakachi ka kizhiba, aye Yesu kasa aji kumutunta bunke bwanji. 48Kabiji byo ebamwene amba bakatazhiwa pa kuvuwa bwato mambo mwela wibakatezhe, pepi mu kilo kya buna kya kumakya #6:48 Kilo kya buna kya kumakya: bufuku bebwabenye mu bibese bina. Kilo kya buna ke pakachi ka 03 kufika ku 06 ya lukeelo.aye waishile kwi abo kasa enda pa mema. Kabiji washi ake bapitaile, 49pakuba abo byo bamumwene kasa enda pa mema, balangulukile amba, kipuku, ne kwitamina miteto. 50Mambo bonse bamumwene ne michima yabo keilukute.

Ponkapotu Yesu wibambijile amba, “Kechi mube moyo ne, ye amiwa bano. Kuchiina ne!” 51Ponkapo wakanjijile mu bwato mo bajinga, ne luvula lwalekele ne abo bakuminye bingi mu michima yabo, 52mambo kechi bayukile mwayijile kuvuzha kwa banshikwa ne, mambo michima yabo yakosele.

Kubukwa kwa bakolwa mu Ngenesaleta

(Mateo 14:34-36)

53Byo ba abukile ku bushiya bayile ku ntanda ya Ngenesaleta, kabiji bakashile bwato ku kitulu. 54Ne pa kufuma mu bwato, ponkapotu bantu bamuyukile, 55kabiji bayile lubilo monse mumande aji kwipi, ne kusenda bakolwa pa makila, ne kwibatwala ko bamumvwine amba, koko aji. 56Ne monse mo atwelele mu mizhi icheche ne ikatampe, ne mu majimi, batujilenga bakolwa pa bisankanyi, ne kumusashijila amba, bakwatengatu nangwa kunsa ya kivwalo kyanji; kabiji bonse mobavujila bakwachileeko babukilwe ke batuntulu.

Currently Selected:

Mako 6: KNTP

Highlight

Copy