Mako 8

Yesu byo ajishishe bantu biumbi bina

(Mateo 15:32-39)

1Mu oa moba, kwajinga jibumba jikwabo jikatampe. Kabiji kechi bajinga na bya kuja ne, aye waichile baana banji babwanga ne kwibambila amba, 2“Nejumvwina lusa jibumba, mambo baikala pamo ne amiwa ke moba asatu, kabiji kechi baji na bya kuja ne. 3Pakuba umvwe ne bemanya kuya kwabo na nzala, bakatembukila pa jishinda, mambo bamo ko bafuma kwalepa.”

4Kumvwa baana banji babwanga bamwambijile amba, “Kwepi ko akonsha kutaana muntu kajo ka kujiisha bano bantu muno mungye?” 5Ne aye wibepwizhe amba, “Muji na bashinkwa banga?”

Abo amba “Batanu na babiji.”

6Ponkapo aye wijikambiizhe jibumba kwikala panshi. Kabiji watambwile bashinkwa batanu na babiji, ne pa kusanta wibatebawile ne kupana ku baana banji babwanga amba, bapane ku bantu; ne abo batujilenga bashinkwa mu byenyi bya mabumba. 7Kabiji bajinga na tumasabi tumo tucheche. Ne aye pa kwitupesha nato wibambijile baana banji babwanga amba bebatujile bantu mu byenyi byabo. 8Kabiji bajiile ne kwikuta, kepo batolawile bibese byashajilepo, mitaasa itanu na ibiji. 9Bantu bajinga pepi biumbi bina. Ponkapo wibemenye. 10Kepo a kanjijile mu bwato na baana banji babwanga, ne kuya ku Ndalamanuta.

Bafaliseo byo basakile kiyukilo

(Mateo 12:38-42; 16:1-4)

11 # Mat 12:38; Lu 11:16 Ba Faliseo baishile ne kutatula kupachika naji, ne kumwipuzha amba, tusaka kiyukilo kya mwiulu, mambo a kumweseka. 12#Mat 12:39; Lu 11:29Ne aye waikizhe kyefu mu muchima wanji ne kwamba amba, “Mambo ka kino kisemi kikeba kiyukilo? Kine ne mwambila namba, kafwako kiyukilo kikapanwa ku kyo kino kisemi ne.”

13Ponkapo wibashiile, wankajijile jibiji mu bwato ne kwabukila ku bushiya bwa kizhiba.

Mbizho ya Bafaliseo ne Heloda

14Kabiji balubileko kusenda kajo, bino bajingatu na shinkwa umo mu bwato. 15#Lu 12:1Ne aye wibambijile amba, “Tekanyai, kabiji jimukai ku mbizho ya Bafaliseo ne mbizho ya kwa Heloda.” 16Kabiji batatwile kwisamba abo bene na bene, mambo kechi bajinga na shinkwa ne. 17Ne Yesu byo ayukile, wibambijile amba, “Mambo ka o mubena kwisambila na mambo a kubula shinkwa? Nanchi kechi mwayuka nenyi nangwa kumvwisha nenyi? Michima yenu yakosa nyi? 18#Yele 5:21; Ezi 12:2; Mako 4:12Muji na meso ne kumona nenyi? Kabiji muji na matwi ne kumvwa nenyi? Kabiji kechi mwavuluka 19byo natebawile bashinkwa batanu pa bantu biumbi bitanu, mwatolawile bilukwa binga bya bashinkwa bashajilepo?”

Bamukumbwile amba, “jikumi na bibiji.”

20“Ne batanu na babiji pa biumbi bina, mwatolawile bilukwa byayujile na bashinkwa ba shajilepo binga”?

Ne abo bamukumbwile amba, “bitanu na bibiji.”

21Ne aye wibepwizhe amba, “Nanchi mukyangye kumvwisha nyi?”

Kubukwa kwa muntu mpofu ku Betesaida

22Kabiji baishile ku Betesaida, ne bamo bantu bamuletejile muntu mpofu ne kumusashijila amba, Yesu a mukwate maboko. 23Ne kumukwata wa mukwachile mpofu pa kuboko ne kumutwala pangye ya muzhi; ne byo a mushipijile mu meso ne kumubika maboko anji, wa mwipwizhe amba, “Wamona kintu nyi?” 24Kabiji aye wainwine kilungi ne kwamba amba, “Namona bantu ba bena kwenda, bino babena kumweka nobe bichi.” 25Ponkapo Yesu wamukwachile maboko anji jibiji pa meso. Ne meso anji alabile, aikajile ke atuntulu, ne aye kamone byonse bulongo. 26Kabiji wamutumine ku nzubo yanji amba, “Kechi utwele mu muzhi ne.”

Petelo byo asolwele lwitabilo lwanji

(Mateo 16:13-20; Luka 9:18-21)

27Ne Yesu wayile na baana banji babwanga mu mizhi ya mu Kesalea Filipai. Ne byo bayilenga mu jishinda waipwizhe baana banji babwanga amba, “Lelo nanchi bantu bantela amba, ne ng'anyi?” 28#Mako 6:14,15; Lu 9:7,8Ne abo bamukumbwile amba, “Yoano Mubatishi, bino bakwabo amba, Elaija, ne bakwabo amba, umo wa mu bangauzhi.”

29 # Yoa 6:68,69 Ne aye wibepwizhe amba, pakuba anweba muntela amba ne ng'anyi?

Kumvwa Petelo amba, “Yenu Kilishitu.”

30Ne aye wibajimwine amba, kechi babuule muntu nangwa umo mambo a aye ne.

Yesu byo a ambijile jimo mambo a lufu ne lusanguko lwanji

(Mateo 16:21-28; Luka 9:22-27)

31Kabiji watatwile kwibafunjisha amba, “Kyamufwainwa Mwana Muntu kumanama byavula ne kumukana ku bakulumpe ne ku bang'anga bakatampe ne ku banembeshi ne kumwipaya, kabiji pakupita moba asatu ukasanguka.” 32Ne aye wi kyambiletu bulongo. Ne Petelo wamutwajile kumbaji ne kutatula kumukanya. 33Pakuba aye pa kwaluluka ne kwibatala baana banji babwanga wamukainye Petelo amba, “Fuma kwi amiwa Satana! Mambo obewa milanguluko yobe kechi yaimana pa bintu bya Lesa ne, poso ku bya bantu.”

34 # Mat 10:38; Lu 14:27 Ponkapo waichile jibumba pamo ne baana banji babwanga ko aji. Ne kwibambila amba, “Umvwe muntu usaka kundondela, ekane mwine, ashikule musalabu wanji ne kundondela. 35#Mat 10:39; Lu 17:33; Yoa 12:25 Mambo awa usaka kupulusha mweo wanji, ukamutaya, ne aye ukantayila mweo wanji amiwa ne ano Mambo Awama ukamupulusha. 36Lelo muntu nangwa wanonka ntanda yonse, umvwe wataya mweo wanji, ukamwenamo ka? 37Kabiji namba, ikika kyo akapana muntu kya kupimpula na mweo wanji? 38Mambo aye ukangubila bumvu amiwa ne mambo ami mu kino kisemi kya bukende ne kya bundengamambo, ne Mwana Muntu naye ukamubila bumvu byo akeya mu lukumo lwa Shanji na bamalaika bazhila.”

Currently Selected:

Mako 8: KNTP

Highlight

Copy