Milimo 15

Muswaangano wamu Jelusalemu

1Lino baalumi bakazwide kucisi ca Judiya bakasika kumunzi wa Antiyoki akutalika kwiisya basyomi kuti, “Naa mwatapalulwa mbubuli bwaamba Milawo ya Mozesi, tamukwe kufutulwa pe.” 2Paulu a Banabasi bakakazyanya ambabo munkani eeyi. Limwi bakazuminana kuti Paulu a Banabasi, abamwi bamu Antiyoki bainke ku Jelusalemu kutola kaambo aaka kubatumwa akubapati bambungano.

3Bantu aaba bakatumwa ambungano. Bakainda ku Fenisiya aku Samaliya, baya bwaambilizya kubasyomi makani aakuti abalo bamasi bakasandukila ku Mwami. Aaya makani akabotezya basyomi boonse kapati. 4Nibakasika mu Jelusalemu, bambungano, batumwa abapati bakabatambula. Bakatumidwe aaba bakalungulula zintu zyoonse Leza nzyaakacita kwiindila mulimbabo. 5Pele bamwi babasyomi kaindi bakali balukondo lwa Bafalisi, nkaako bakaima akwaamba kuti, “Bantu aabo beelede kuti bakapalulwe akulaililwa kuti kababamba Milawo ya Mozesi.”

6Lino batumwa abapati bakabungana antoomwe kuti balange nkani eeyi. 7Nibakakanana kwaciindi cilamfu, Pita wakanyamuka akwaamba kuti, “Nobakwesu, mulizi kuti Leza wakandisala kaindi kuti ndikambauke Makani Mabotu kuli bamasi kuti abalo baamvwe akusyoma. 8Nkabela Leza uuzi myoyo yabantu, wakacitondezya kuti bamasi abalo ulabatambula kwiindila mukubapa Muuya Uusalala mbubonya mbwaakapa kulindiswe. 9Taakwe lwaandaano luliwo akati kesu ambabo, wakasalazya myoyo yabo nkaambo bakasyoma. 10Ino kayi nkaambo nzi nomusunka Leza mukubikka amakuko aabo mikuli eeyo basikale besu notuba ndiswe njotutakonzyi kubweza? 11Peepe basa, tee tusyoma kuti tulafutulwa swebo akaambo kaluse lwa Mwami Jesu, mbubonya buyo ambabo.”

12Nkamu yabantu yoonse yakaluumwide kaiswiilila Banabasi a Paulu kabalungulula zitondezyo zyanguzu amaleele nzyaakacita Leza akati kabamasi kwiindila mulimbabo.

13Nibakamana kwaamba, Jemusi wakaima wati, “Amundiswiilile nobakwesu! 14Saimoni wazwaakwaamba mbuli Leza mbwaakatondezya kuti bamasi abalo ulabaleleka kwiindila mukusala bamwi mukati kabo akubacita bantu bakwe mwini. 15Aalo majwi aabasinsimi alazuminana aceeci, mbubonya Mwami Leza mbwaakaamba mu Malembe kuti,

16‘Musule akooku njooboola alimwi,

akubusya bwami bwa Devedi bwakawa.

Njoobukulusya matongo aabo,

njoobuyakulula alimwi.

17Aboobo bantu bamwi bayoolangaula Mwami,

nkokuti bamasi boonse mbindakaita kuti babe bantu bangu.

18Oobo mbwaamba Mwami Leza wakaazibya

makani aaya kaindi.’”

19Alimwi Jemusi wakacili kwaamba akuti, “Mebo muyeeyo wangu ngwakuti, tatweelede kupenzya bamasi aabo basandukila kuli Leza. 20Pele tweelede kubalembela lugwalo lwakuti tabeelede kulya zilyo zitasalali mukuti zyakapaizigwa kumizimo, akuti kabataciti bumambe, akutalya banyama basinwa, alimwi akutalya bulowa. 21Nkaambo kwaciindi cilamfu kapati Milawo ya Mozesi ilabalwa muzikombelo, alimwi majwi aakwe alakambaukwa munzi amunzi Sabata a Sabata.”

Lugwalo lwakalembelwa bamasi basyomi

22Eelyo batumwa abapati, antoomwe ambungano ya Leza yoonse, bakayeeya kusala baalumi bamwi kuzwa mukabunga kabo, kuti babatume ku Antiyoki antoomwe a Paulu a Banabasi. Bakasala Sailasi a Judasi uutegwa Baasabasi. Baalumi aaba bobilo bakali kulemekwa kapati abasyominyina. 23Bakabatumizya alugwalo lwaamba boobu,

“Nobakwesu, swebo batumwa abapati bambungano twamujuzya nyoonse nobasyomi bamasi bakkala mu Antiyoki, Siliya amu Silisiya. 24Twakamvwa kuti bamwi bakabunga kesu bakaza ooko kuzoomupenzya akumunyonganya amakani ngobakaamba. Pele taakwe nibakapegwa milawo andiswe kuti bazooambe makani aali boobo pe. 25Nkaako twabungana antoomwe akuzuminana kuti tusale bamwi bantu akubatuma kulindinywe. Balaboola abayandwi besu beenzuma ba Banabasi a Paulu. 26Aaba mbantu bakaaba buumi bwabo mumulimo wa Mwami wesu Jesu Kilisito. 27Alimwi twamutumina Judasi a Sailasi kuti bazoomwaambile amulomo mpande makani aaya ngonya ngotwalemba mulugwalo oolu. 28Nkaambo Muuya Uusalala nguwakatusolweda kuti tuzuminane kuti kutabikkwi mikuli iimbi alindinywe pele buyo eeyi milawo yeelede. 29Mutanoolyi nyama iipaizigwa kumizimo, mutanoolyi bulowa pe, mutanoolyi banyama basinwa, alimwi mutanoociti bumambe. Kuti kamuzibamba eezi mulacita kabotu. Amusyaale kabotu.”

30Mpoonya aabo bakatumwa bakainka ku Antiyoki. Ooko bakaakubunganya nkamu yoonse yabasyomi akubapa lugwalo. 31Lino bantu nibakabala, bakabotelwa kapati nibakamvwa makani aakubayumya. 32Nkabela Judasi a Sailasi aabo bakali mbakambausi bakayumya basyomi amajwi manji aakkazika myoyo. 33Eelyo nibakakkala ooko kwaciindi cili mbocibede, bakalayana abasyomi kuti babweede muluumuno kuli baabo bakabatumide. [ 34Pele Sailasi wakayanda kuti akkalilile ooko.]

35Paulu a Banabasi bakasyaala mu Antiyoki, kabaiisya akukambauka majwi aa Mwami, antoomwe abamwi banji.

Paulu a Banabasi mbobakaandaana

36Lino cimwi ciindi kazimanide eezi, Paulu wakaambila Banabasi kuti, “Atubweede alimwi tukaswaye basyomi bali muminzi yoonse motwakakambauka majwi aa Mwami kuti tukababone.” 37Banabasi wakayanda kuti batolelele a Joni Maako. 38Lino Paulu taakayeeya kuti cililuleme kumutola nkaambo kakuti lweendo lwabo lutaanzi taakwe naakalumana ambabo, wakaloboka akubasiya nibakali mu Pamfiliya. 39Bakakazyanya kapati mulicabo bobilo, limwi bakaandaana buyo. Banabasi wakatola Maako, mpoonya bakeenda abwato kuya kucisi ca Saipulasi. 40Paulu wakasala Sailasi, lino basyomi nibakamana kubakombela kuti Mwami abaleleke, bakanyamuka. 41Eelyo bakainda mucisi ca Silisiya kabaya buyumya-yumya mbungano.

Currently Selected:

Milimo 15: Tonga96

Highlight

Copy