Milimo 16

Timoti mbwaakainka a Paulu a Sailasi

1Paulu wakaakusika ku Deebe aku Lisitula. Ooko kwakali kukkala musyomi umwi uutegwa Timoti. Banyina bakali Bajuda alimwi basyomi. Pele wisi wakali Mugiliki. 2Boonse basyomi bakali kukkala muminzi ya Lisitula awa Ikoniyumu bakali kwaamba kuti Timoti mmuntu mubotu. 3Nkabela Paulu wakayanda kutolelezya Timoti. Aboobo wakamupalula nkaambo boonse Bajuda bakakkede mumasena aayo bakalizi kuti wisi Timoti wakali Mugiliki. 4Nibakali kuya bwiinda muminzi bakali kuya bwaambila basyomi milawo eeyo yakapegwa akuzuminanwa abatumwa antoomwe abapati mu Jelusalemu, akubalailila kuti baibambe. 5Aboobo bambungano eezyo bakayuma mulusyomo, alimwi bakali buya buvula buzuba abuzuba.

Paulu mbwaakabona cilengaano mu Tilowasi

6Lino bakainda mucisi ca Fuligiya aca Galatiya, nkaambo Muuya Uusalala taakwe naakabazumizya kukambauka Mulumbe mucisi ca Asiya. 7Nibakasika kumunyinza wa Misiya, bakasoleka kuti baye mucisi ca Bitiniya, pele Muuya wa Jesu wakabakasya. 8Aboobo bakainda cisi ca Misiya akuyoosika kumunzi wa Tilowasi. 9Masiku aayo Paulu wakabona mucilengaano, mwaalumi waku Masedoniya wakaima kuli nguwe akumukombelezya kuti, “Amuboole ku Masedoniya muzootugwasye!” 10Paulu mbwaakabonena buyo cilengaano eeci, twakalibambila kuya ku Masedoniya. Twakaziba kuti ngu Leza wakatwiita kuti tukakambauke Makani Mabotu akwalo ooko.

Lidiya waku Filipi mbwaakasanduka

11Nitwakazwa ku Tilowasi, twakainka abwato kululama kunsumbu ya Samotulasi, nkabela nibwakaca twakaya kumunzi wa Niyapolisi. 12Nitwakazwa ooko twakaya ku Filipi, uuli ngomunzi mupati mucisi ca Masedoniya, cisi cakali kulelwa a Baloma. Twakakkala mazuba manji mumunzi ooyo. 13Nkabela mubuzuba bwa Sabata twakazwa mumunzi akuya kunselelo lyalwizi nkotwakali kuyeeya kuti ambweni ooko kuli-kuli busena nkobakombela Bajuda. Twakaakukkala akwaambaula kubakaintu mbotwakaakujana. 14Umwi wabaabo bakatumvwa wakali Lidiya, uuzwa ku Tiyatila. Wakali muuzyi wamasani aacisombo aadula kapati, alimwi wakali mukaintu uukomba Leza. Lino Mwami wakajalula moyo wakwe kuti amvwisye zyakali kwaamba Paulu. 15Eelyo Lidiya abamukwasyi wakwe bakabbapatizigwa. Amane wakatutamba wati, “Amuboole kuŋanda yangu anooli mwabona kuti ndimusyomi ncobeni mu Mwami.” Nkabela wakatukombelezya kuunka kwakwe.

Ba Paulu a Sailasi mbubakabikkwa muntolongo ku Filipi

16Bumwi buzuba nitwakali kuya kubusena bwakukombela, twakaswaanwa amusimbi muzike, wakanjidwe muuya mubi. Wakali kukonzya kusinsima. Munzila eeyi wakali kubajanina mali manji basimalelaakwe. 17Musimbi wakatobela Paulu aswebo, uya bukwiila kati, “Aaba baalumi mbabelesi ba Leza Sijulu lyamajulu! Baya bwaambilizya makani kulindinywe, kumutondezya mbuli mbomukonzya kufutuka!” 18Wakali kucita boobu kwamazuba manji mane limwi cakasika ciindi nicakamucima Paulu. Wakaceba musule akwaambila muuya mubi kuti, “Muzina lya Jesu Kilisito, ndakulailila kuti uzwe mumusimbi ooyu!” Mpoonya muuya mubi wakazwa mumusimbi ooyo ciindi eeco nciconya. 19Basimalelaakwe nibakabona kuti nzila yakujana mali yabamanina, bakajata Paulu a Sailasi akubakwelela kubaleli bankuta yabuleya. 20Bakabaleta kubabetesi akwaamba kuti, “Baalumi aaba Mbajuda, nkabela batuletela mapenzi mumunzi. 21Baiisya ziyanza ziteendelani amilawo yesu. Swebo to Baloma tatukonzyi kutobela ziyanza eezyo pe!” 22Nkamu yabantu niyakamvwa boobo yakalwana batumwa, eelyo babetesi bakati zisani zya Paulu a Sailasi zizapaulwe, bamane bakati bakwabbaulwe. 23Nibakamana kubakwabbaula, bakababikka muntolongo, akulailila mulindizi wantolongo kuti abajatisye kapati. 24Lino mulindizi naakamana kulaililwa boobu, wakanjizya Paulu a Sailasi mukati mwini mwantolongo. Wakaangilila maulu aabo kuzisamu zyobilo zilemu kapati.

25Lino akati kamasiku Paulu a Sailasi bakali kukomba akwiimba nyimbo kuli Leza, basintolongonyina bakaliswiilide. 26Mpoonya aawo nyika yakazungaana kapati, nkabela ntolongo yoonse yakateketa mane kusikila kuntalisyo yayo. Nkaako milyango yantolongo yakajaluka, azyalo nsimbi zyakatebunuka akuloka kuzwa kubaange boonse. 27Lino mulindizi wantolongo naakasinsimuka akubona kuti milyango yantolongo yoonse ilijalukide, wakayeeya kuti basintolongo boonse bazwa akutija. Aboobo wakabweza panga lyakwe kuti alijaye. 28Mpawo Paulu wakoongolola ajwi pati wakati, “Peepe! Utalijayi omwini. Toonse mpotuli!”

29Mulindizi ooyo wakati, “Kuletwe munzenge!” Eelyo wakanjila kufwambaana, waakuliwaala kumaulu aa Paulu a Sailasi, kumwi ulazyangama. 30Amane wakabatola anze akubabuzya kuti, “Nobasimalelaangu, ino ndeelede kucita buti kuti ndifutulwe?”

31Bakamwiingula kuti, “Usyome mu Mwami Jesu, eelyo ulafutulwa, yebo abaŋanda yako boonse.” 32Nkabela bakakambauka majwi aa Mwami kulinguwe abamukwasyi bamwi boonse. 33Masiku aayo ngoonya, mulindizi wantolongo, wakabatola waakubasanzya akukanda zilonda zyabo. Nkabela walo abamukwasyi wakwe boonse bakabbapatizigwa mpoonya aawo. 34Eelyo wakatola Paulu a Sailasi kuŋanda yakwe waakubapa cakulya. Nkabela walo antoomwe abamukwasyi wakwe bakabotelwa kapati nkaambo lino bakasyoma muli Leza.

35Nibwakaca, babetesi bakatuma bantu kuti baambe kuti, “Amubaleke baalumi aabo abainke.”

36Mulindizi wakaambila Paulu makani aayo wati, “Babetesi batumya majwi aakuti nywebo a Sailasi mwaangununwe. Aboobo mulakonzya kuzwa lino kuunka muluumuno.”

37Pele Paulu wakati, “Tiitwakajaninwa mulandu pe. Kumane bakatukwabbaula antangalala, nikuba kuti tuli Baloma! Kuzwa aawo bakatubikka muntolongo, pele lino bayanda kuti batugwisye kumbali! Peepe, takubi! Baleelede kuti baboole lwabo beni babetesi, bazootugwisye mbabo!”

38Bantu bakatola makani aaya kubabetesi. Nkabela nibakamvwa kuti Paulu a Sailasi bakali Baloma, bakayoowa kapati. 39Eelyo bakainka akuyoolilekelela kulimbabo, nkabela bakabagwisya muntolongo akubakumbila kuti bazwe mumunzi. 40Aboobo Paulu a Sailasi bakazwa muntolongo akuya kuŋanda ya Lidiya. Ooko bakaakuswaangana abasyomi, eelyo nibakamana kubayumya-yumya bakainka.

Currently Selected:

Milimo 16: Tonga96

Highlight

Copy