Milimo 19

Paulu mbwaakacita mu Efesusi

1Kuciindi eeco Apolosi naakali mu Kolinti, Paulu wakaandulula cisi mane wakaakusika ku Efesusi. Ooko wakaakujana basyomi bamwi 2mbaakabuzya kuti, “Sena mwakatambula Muuya Uusalala nimwakasyoma?”

Balo bakaingula kuti, “Peepe, swebo tatunamvwide akuti kuli Muuya Uusalala.”

3Mpoonya Paulu wakababuzya kuti, “Ino kayi mwakabbapatizigwa alubbapatizyo luli buti?”

Balo bakaingula kuti, “Lwa Joni.”

4Eelyo Paulu wakati, “Joni wakabbapatizya aabo beempa akubaambila kuti baleelede kusyoma muli ooyo wakali kuyooza musule lyakwe, nkokuti muli Jesu.”

5Aboobo nibakamvwa oobo, bakabbapatizigwa muzina lya Mwami Jesu. 6Mpoonya Paulu wakababikka maanza aakwe, eelyo Muuya Uusalala wakabasikila, bakatalika kwaamba misyobo iimbi akukambauka Majwi aa Leza. 7Bakali baalumi bakatisike kukkumi abantu bobilo antoomwe.

8Kuzwa aawo Paulu wakanjila mucikombelo ca Bajuda. Myezi yotatwe wakali kwaambaula kubantu cabusicamba, mukuti abakwelele kuti basyome zyabwami bwa Leza. 9Pele bamwi babo bakali basicinguni, bakakaka kusyoma. Nkabela bakatalika kusampaula Nzila ya Leza antangalala. Nkaambo kaako Paulu wakabasiya, wakatolelezya abasyomi baya. Alimwi buzuba abuzuba wakali kwaambilana abantu mucikolo ca Tilenasi. 10Eeci cakacitika kwamyaka yobilo, aboobo bantu boonse bakali kukkala mucisi ca Asiya, Bajuda abamasi, bakaamvwa Majwi aa Mwami.

Bana ba Sikeva

11Lino kwiindila muli Paulu, Leza wakali kucita maleele aagambya. 12Bantu bakali kunga naa batola ntambala nituba tusani tumwi twakali kubelesya Paulu, akututola kubalwazi, malwazi aabo akali kupona, ayalo myuuya mibi yakali kugwisigwa mubantu. 13Abalo Bajuda bamwi bakali kweendeenda akuya bugwisya myuuya mibi, bakasola kubelesya zina lya Mwami Jesu mukucita mulimo ooyu. Bakaambila myuuya mibi kuti, “Ndamulailila muzina lya Jesu ooyo ngwakambauka Paulu kuti muzwe!” 14Bakali kucita oobo, bakali bana bali ciloba bamwaalumi wakali mupaizi mupati umwi wa Bajuda, uutegwa Sikeva.

15Muuya mubi wakati kulimbabo, “Jesu ndimuzi awalo Paulu ndizi zyakwe, pele nywebo, ino ndinywe bani?”

16Mpoonya muntu wakanjidwe muuya mubi wakatalika kubalwana wabasotokela anguzu mpati cakuti wakabazunda. Eelyo bakatija kuzwa muŋanda yakwe acinswe kabalaa zicisa. 17Boonse Bajuda abamasi bakali kukkala mu Efesusi bakaamvwa makani aaya, eelyo bakayoowa kapati. Nkaako bantu bakalumbaizya zina lya Mwami Jesu kwiindilila. 18Nkabela basyomi banji bakali kusika akwaamba antangalala zibi nzibakacita. 19Abalo basimabibo bakaleta mabbuku aabo akwaatenta mumulilo bantu boonse kabalangilila. Nibakasanganya mweelwe wamabbuku aakatentwa, wakasika kuzyuulu zili makumi osanwe zyamali aansiliva. 20Munzila eeyi Majwi aa Mwami akali kuya bumwaika akubeleka canguzu.

Manyongwe aamu Efesusi

21Lino zintu eezi nizyakamana kucitika, Paulu wakayeeya kuunka ku Jelusalemu, kwiinda mu Masedoniya amu Akeya. Wakati, “Ndaakuzwa ooko, ndileelede kuunka ku Loma akwalo.” 22Eelyo wakatuma Timoti a Elasitosi, baalumi bobilo bakali bagwasyi bakwe, ku Masedoniya, walo naakacikkede mucisi ca Asiya.

23Ciindi nciconya eeci kwakabuka mapenzi mapati mu Efesusi akaambo ka Nzila ya Mwami. 24Umwi mufuzi wansiliva uutegwa Demetiliyosi, wakali kubumba tufwanikiso twansiliva twacikombelo caleza mupange mukaintu Aatemisi. Nkabela mulimo ooyu wakucita tufwanikiso ootu wakali kubaletela mpindu mpati babelesi bakwe. 25Aboobo Demetiliyosi wakaita babelesi boonse antoomwe, alimwi abamwi bakajisi mulimo mbuli wakwe, eelyo wakati kulimbabo, “Nobaalumi, mulizi kuti kuvuba kwesu kuzwa kumulimo ooyu ngotujisi. 26Nkabela mulibwene akumvwa nobeni zintu nzyacita muntu ooyu Paulu. Waamba kuti baleza babumbwa amaanza aabantu tabali baleza pe. Aboobo wakwela bantu muno mu Efesusi acisi coonse ca Asiya mbocizulwa. 27Nkaako makani ngaaya. Caboneka kuti mulimo wesu ulasampaulwa abantu. Aboobo aaya taali ngangawo alikke pe, pele penzi limwi ndyakuti eeyi Ŋanda ya Leza wesu Aatemisi taicinooambi cintu pe kubantu. Abwalo bulemu bwaleza ooyu bulamana, kayi ngo leza uukombwa amuntu oonse uukkala mu Asiya mane amunyika yoonse!”

28Eelyo bantu nibakamvwa makani aaya, bakanyema kapati akutalika kupozomoka kuti, “Aatemisi wamu Efesusi ngomupati!” 29Lupyopyongano lwakamwaika mumunzi oonse. Nkabela mpumba yabantu yakajata ba Gayosi a Alisitakosi, baalumi bobilo baku Masedoniya, bakali kweenda a Paulu. Cakufwambaana, bakabatola kubbuwa lyazisobano. 30Paulu wakatilitole kunkamu yabantu eeyo, pele basyomi bakamukasya. 31Abalo bapati bacisi ca Asiya aabo bakali beenzinyina, bakamutumina majwi aakumukumbila kuti atakalibonyi kubbuwa eelyo. 32Mpumba yoonse yabantu yakaliilingene. Bamwi boongolola cimwi abamwi cimwi. Bamwi tiibakazi ancibakeetelwa pe. 33Bamwi bantu bakati Alekizandaa nguubwene makani aaya, nkaambo Bajuda ngubakatonkela kuyooima kumbele lyamuswaangano. Mpoonya Alekizandaa wakatambika maanza mujulu kuti bantu baumune, alivune kabotu. 34Eelyo nibakamuziba kuti wakali Mujuda, boonse bakoongololesya, kabaamba majwi ngoonya kwaciindi cili mbocibede. Bakali kuti, “Aatemisi waku Efesusi ngomupati!”

35Kumamanino mwaalumi umwi wakali ngomulembi wamumunzi wakabaumuzya bantu. Wakati kulimbabo, “Nobaalumi bamunzi wa Efesusi, cilizizilwe kubantu boonse kuti swebo tobantu bamunzi uuno tuli bantu balemeka cikombelo caleza Aatemisi, akuti tulalemeka bbwe lyamalembe aakwe lyakawa kuzwa kujulu. 36Taakwe muntu uukonzya kuzikaka zintu eezi, aboobo muleelede kuumuna, mutaciti cintu cakufwambaana. 37Mwaleta bantu aaba kuno nikuba kuti taakwe umwi wabo wakabba zintu zyamuŋanda yaleza wesu pe, nikuba kumusampaula walo. 38Kuti naa Demetiliyosi abasimilimonyina bajisi kaambo amuntu umwi, balakonzya kutolana kunkuta mumazuba babetesi nobabeteka. 39Pele naa kucili cimwi cintu ncomuciyanda, ceelede kubambwa ambungano yabasicisi. 40Nkaambo inga tulakonzya kupegwa mulandu wakuleta manyongwe akaambo kaceeci cacitika sunu. Tatukonzyi kulitamizya, alimwi taakwe kaambo kabotu nkotunga twapa.” 41Mbwaakamana buyo kwaamba boobu, wakaambila bantu kuti baunke.

Currently Selected:

Milimo 19: Tonga96

Highlight

Copy