Milimo 20

Lweendo lwaku Masedoniya aku Akeya

1Lino naakamana manyongwe, Paulu wakabunganya basyomi akubaambila majwi aakubayumya-yumya. Mpawo wakabalaya wakainka ku Masedoniya. 2Wakaandulula muzisi eezyo kuya buyumya-yumya basyomi amajwi manji. Waakusika ku Akeya, 3akukkala ooko myezi yotatwe. Wakali kulibambila kuya kucisi ca Siliya, pele naakaziba kuti Bajuda bakali kumukanza, wakayeeya buyo kubweeda kwiinda mu Masedoniya. 4Sopatee, mwanaa Pilusi, uuzwa ka Beleya, wakainka aawe, aba Alisitakosi a Sekundusi bazwa ku Tesalonika, a Gayosi uuzwa ku Deebe, Timoti, aba Tikikasi a Tulofimosi bazwa kucisi ca Asiya. 5Aaba bakatusaangunina akuyootulindilila kumunzi wa Tilowasi. 6Mbulyakamanina buyo pobwe lya Cinkwa Citakwe Mimena, aswebo twakeenda abwato kuzwa kumunzi wa Filipi. Lino naakamana mazuba osanwe, twakaakubajana ku Tilowasi, nkabela twakaakukkala mvwiki yomwe ooko.

Paulu mbwaakabusya Yutikosi ku Tilowasi

7Mubuzuba butaanzi bwamvwiki twakabungana antoomwe kulya mulalilo wa Mwami. Nitwakamana Paulu wakatalika kwaambaula makani abantu. Nkaambo kakuti wakali kuyanda kuunka mubuzuba butobela wakaambaula mane kusika akati kamasiku. 8Kwakali malambe manji muŋanda yamujulu motwakabungene. 9Alimwi mwakali mulombe uutegwa Yutikosi wakakkede ampulungwido yaŋanda. Nkaambo kakuti Paulu wakatola ciindi cilamfu kaambaula, Yutikosi wakatalika kufukula mane limwi wakoona. Eelyo naakali koona wakatesuka akuwida ansi kuzwida ampulungwido yaŋanda yatatu mujulu. Nibakaakumujana, wakalifwide. 10Paulu wakaselukila ansi, waakuliwaala amubili wamulombe akumufukatila. Mpoonya wakaambila bantu kuti, “Mutapengi pe, ulapona!” 11Lino Paulu wakatanta akubweeda alimwi muŋanda yamujulu. Wakakomona cinkwa walya. Wakaambaula ambabo kwaciindi cilamfu, limwi bwaca, amane wakalaya. 12Eelyo bantu bakamutola kuŋanda yokwabo mulombe ooyo kali muumi, alimwi kabakondedwe kapati.

Lweendo lwakuzwa ku Tilowasi kuya ku Miletusi

13Lino twakasaanguna kuunka abwato kuya ku Asosi, ooko nkutwakaakutansikila Paulu mubwato. Wakatwaambilide kucita oobo nkaambo walo wakeenda amaulu kuya nkuko. 14Eelyo naakaswaangana andiswe ku Asosi, twakamutansika mubwato akuya kumunzi wa Mitiline. 15Bucica buyo twakeenda abwato kuzwa ooko, twakaakusika ku munzi wa Kiyosi. Mubuzuba bwakatobela twakaakusika kumunzi wa Samosi, eelyo bukace alimwi twakaakusika ku Miletusi. 16Pele Paulu wakayeeya kuti akainde munsi amunzi wa Efesusi mukuti atasowi ciindi mucisi ca Asiya. Nkaambo wakali kuyanda kufwambaana kusika ku Jelusalemu, kuti naa kacikonzeka kanooli nkuko bwaakusika buzuba bwa Pentekosite.

Paulu mbwaakalaya bapati bambungano yaku Efesusi

17Lino kali ku Miletusi Paulu wakatumya mulumbe ku Efesusi, akukumbila bapati bambungano kuti bazooswaangane anguwe. 18Nibakasika, Paulu wakati kulimbabo, “Mulizi mbwindakakkala andinywe kuzwa mubuzuba butaanzi mbondakasika mucisi ca Asiya. 19Ndakabelekela Mwami cakulitesya akati kamapenzi amause nkaambo kazyakandicita Bajuda. 20Mulizi kuti taakwe acomwe cintu ncindakamusisila cakali kunoomugwasya nywebo, pele ndakali kumukambaukila akumwiisya antangalala alimwi amumaanda aanu. 21Nkabela ku Bajuda abamasi mbubonya buyo, ndakali kubakumbila kuti beelede kusandukila kuli Leza, akusyoma mu Mwami wesu Jesu.

22“Lino amubone ndiya ku Jelusalemu, nkaambo Muuya Uusalala mbwaandilailila. Nsizi citikacitike kulindime ooko. 23Pele ncendizi buyo ncakuti Muuya Uusalala wakandicenjezya muminzi mipati yoonse kuti ntolongo amapenzi zilandilindila. 24Pele nsiyeeyeli kuti buumi bwangu mbuyandisi kulindime, pele cipati nkuti ndimanizye mulimo wangu, abutumwa bwakandipa Mwami Jesu, bwakwaambilizya Makani Mabotu aaluse lwa Leza.

25“Lino ndizi kuti nywebo nyoonse mbindakeendela akukambaukila zyabwami bwa Leza tamukandiboni limbi pe. 26Aboobo ndaamba cakusinizya sunu obuno buzuba, kuti naa bamwi banu basweeke, ndulwabo beni, mebo nyina mulandu pe. 27Nkaambo taakwe ncindakamusisa, pele ndakamukambaukila zyoonse Leza nzyayanda. 28Nkaako kamulibamba lwanu nobeni, alimwi kamububamba butanga boonse oobo Muuya Uusalala mbwamupede kuti mubulange. Amweembele bambungano ya Leza eeyo njaakanununa alufu lwa Mwanaakwe mwini. 29Ndizi kuti ndazwa, baumpe babutambo, bayoosika akati kanu, nkabela tabakooyomuleka pe. 30Nikuba akati kanu nobeni, kuyooboola bamwi bayoooamba zyakubeja mukuti ambweni inga balakwela basyomi kulimbabo. 31Aboobo muleelede kulangisisya. Amuyeeye kuti kwamyaka yotatwe ndakaiisya umwi aumwi wanu sikati amasiku amisozi minji.

32“Lino ndamusiya mumaanza aa Leza amumakani aaluse lwakwe. Alo alakonzya kumuyaka akumupa zileleko eezyo nzyabambila bantu bakwe boonse. 33Taakwe nindakalikumbuzya mali niciba cisani camuntu umwi pe. 34Nywebo nobeni mulizi kuti ndakali kubeleka amaanza aangu aaya kulijanina zyoonse nzindakalikubula anzibakali kubula beenzuma mbotwakali limwi. 35Ndakamutondezya muzintu zyoonse kuti mukubeleka anguzu tweelede kugwasya aabo batakwe nguzu. Nitucita boobu katuyeeya majwi ngaakaamba Mwami Jesu lwakwe mwini naakati, ‘Kupa kuletela cileleko cipati kwiinda kutambula.’”

36Eelyo Paulu naakamana kwaamba, wakavuntama ambabo boonse akukomba. 37Boonse bakali kulila aawo nibakali kumufumbata akumumyonta kukumulaya. 38Cakabausisya kapati mmajwi ngaakaamba kuti tabaciyoomuboni limbi pe. Nkabela bakamusindikila kuya kubwato.

Currently Selected:

Milimo 20: Tonga96

Highlight

Copy