Milimo 21

Paulu mbwaakainka ku Jelusalemu

1Nkabela twakabalaya akweenda. Nitwakeenda abwato kuzubuka lwizi, twakasika ku Kosi, eelyo mubuzuba bwakatobela twakasika ku Lodisi. Nitwakazwa ooko twakainka ku Patala. 2Ooko twakajana bwato bwakali kuya ku Fenesiya, mpoonya twakanjila mulimbubo akuunka. 3Lino twakaakusika kubusena nkotwakali kukonzya kubona nsumbu ya Saipulasi, aboobo bwato bwakainda nkoili kulumwensi nsumbu eeyo, mane limwi twaakusika kucisi ca Siliya. Twakaakuzubukila kucito ca Taya, ooko bwato nkobwakaakulongolwedwa zintu. 4Ooko twakajana basyomi mbotwakakkala aabo mvwiki yomwe. Nkabela Muuya Uusalala wakabayubunwida cakali kuyoocitika, eelyo balo bakaambila Paulu kuti atainki ku Jelusalemu. 5Pele ciindi cesu nicakamana, twakalaya akuunka mulweendo lwesu. Nkabela boonse, baalumi, bakaintu abana, bakatusindikila kuzwa mumunzi, nitwakasika kunkomwe yalwizi, twakavuntama akukomba. 6Mpoonya twakalayana akunjila mubwato, nkabela balo bakabweeda kumunzi.

7Alimwi twakatalika lweendo lwesu, twakeenda abwato kuzwa ku Taya kuyoosika ku Pitolemaisi nkutwakaakujuzya bakwesu, akukkala ambabo buzuba bomwe. 8Mubuzuba bwakatobela twakanyamuka akuyoosika kumunzi wa Sizaliya. Lino ooko twakaakuunka kuŋanda yamukambausi uutegwa Filipo, twakaakukkala awe. Wakali umwi wabaalumi bakali ciloba bakasalidwe mu Jelusalemu. 9Wakajisi bana basimbi bone batakanakwatwa, bakali basinsimi. 10Nikwakainda mazuba-azuba kwakasika musinsimi uutegwa Agabusi kuzwa kucisi ca Judiya. 11Nkabela wakaza kulindiswe, wakabweza lutambo lwa Paulu, walyaanga kumaanza akumaulu, eelyo wakaamba kuti, “Mboobu mbwaamba Muuya Uusalala, ‘Mukamwini lutambo oolu uyooangwa munzila iili boobu a Bajuda mu Jelusalemu, bayoomupa mumaanza aabamasi.’”

12Nitwakamvwa makani aaya, swebo antoomwe abantu bakooko, twakakombelezya Paulu kuti atainki ku Jelusalemu. 13Pele walo wakatwiingula kuti, “Ino ninzi ncomucita nimulilauka boobu, akutyompya moyo wangu? Ime ndililibambilide kale, kutali buyo kwaangwa mu Jelusalemu, pele akufwa akaambo ka Mwami Jesu.”

14Twakakacilwa kumukombelezya kuti atainki. Aboobo twakaleka buyo twakati, “Luyando lwa Mwami alucitwe.”

15Nitwakakkala mazuba amwi ooko twakaangaanga twesu akuya ku Jelusalemu. 16Basyomi bamwi bazwa mu Sizaliya bakainka aswebo, baakututola kuŋanda yamuntu, nkutwakeelede kusikila, uutegwa Munasoni uuzwa ku Saipulasi. Wakali musyomi kuzwa kaindi.

Paulu mbwaakaswaya Jemusi

17Nitwakasika mu Jelusalemu basyomi bakatutambula amaanza obilo. 18Nkabela mubuzuba bwakatobela Paulu antoomwe aswebo twakainka kukubona Jemusi, twakaakujana kuti abalo bapati bambungano boonse bakaliwo. 19Eelyo Paulu wakabajuzya alimwi wakaambilizya zintu zyoonse buzwide Leza nzyaakacita akati kabamasi mulinguwe. 20Nibakamana kumuswiilila, boonse bakalumbaizya Leza. Mpoonya bakaambila Paulu kuti, “Ulakonzya kubona, mukwesu, kuti kuli zyuulu-zyuulu zya Bajuda basyoma, aabo balipede cakumaninina mukutobela Milawo. 21Bantu aaba bakaambilwa zyamakani aako kuti wakali kwiisya Bajuda boonse bakkala mumasi abamasi antoomwe, kuti baleke kutobela Milawo ya Mozesi. Alimwi wakali kubaambila kuti batanoopaluli bana babo nikuba kutobela ziyanza zyesu. 22Lino bantu aaba balamvwa kuti wakasika, ino tucite buti? 23Uleelede kucita ncotutikwaambile. Kuli baalumi bone okuno bakakonkezya kuli Leza. 24Koya ayebo ukalisalazye aabo. Wamana ubabbadelele zyakupa kuŋanda ya Leza, eelyo nobati kalinyoole. Munzila eeyi bantu boonse bayooziba kuti nzibakali kukwaamba tazili zyakasimpe akuti ulabamba ncobeni Milawo ya Mozesi. 25Lino kumakani aabamasi aabo basyoma, twakabatumina lugwalo lwakubaambila kuti twakaciyeeya kuti tabeelede kulya cilyo cakapaizigwa kumizimo, nikuba kulya bulowa, naa banyama basinwa, alimwi akuti balintantamune kubumambe.”

26Mpoonya buzuba bwakatobela Paulu wakatola baalumi aabo bone, waakulisalazya antoomwe ambabo. Kuzwa aawo wakanjila muŋanda ya Leza akuzibya bantu zya buzuba bwamamanino mumazuba aakulisalazya, ciindi omwe-omwe wabaalumi aabo nayoopa cipaizyo cakwe.

Paulu mbwaakajatwa muŋanda ya Leza

27Lino mazuba aali ciloba naakali afwiifwi kumana, bamwi Bajuda bazwa kucisi ca Asiya bakabona Paulu muŋanda ya Leza. Bakakopanya bantu banji akujata Paulu. 28Bakapozomoka akuti, “No Baisilayeli, amutugwasye! Ooyu ngomuntu uuya buya koonse-koonse kwiisya bantu kuti basampule bantu ba Isilayeli, a Milawo ya Mozesi, alimwi aŋanda ya Leza eeyi. Lino ngooyu waleta bamasi muŋanda ya Leza akusofwaazya busena busalala!” 29Bakaamba makani aaya nkaambo bakabona umwi mwaalumi uutegwa Tulofimosi uuzwa ku Efesusi, wakali a Paulu mumunzi, bakayeeya kuti Paulu wamutolede muŋanda ya Leza.

30Nkabela kunyongana kwakamwaika mumunzi oonse, bantu bakazuzaana boonse, bavumpa Paulu akumukwelela aanze lyaŋanda ya Leza. Mpoonya aawo bakajala milyango yayo. 31Bantu aabo bakayanda kujaya Paulu, kwakatuminwa kwaambilizya kumweendelezi wabasilumamba wa Baloma kwaamba kuti muli manyongwe mapati mumunzi oonse. 32Mpoonya-mpoonya mweendelezi wabasilumamba wakatola basilumamba alimwi abapati babo, wafwambaanina kuunka kubantu baya. Lino bantu nibakamubona uleza abasilumamba, bakaleka kuuma Paulu. 33Mpoonya mweendelezi walumamba wakaya kuli Paulu, wamujata, eelyo wakalailila kuti aangwe anketani zyobilo. Mpoonya wakabuzya kuti, “Ino nguni ooyu muntu, alimwi ninzi ncaacita?” 34Bamwi bakaamba eeci bamwi eeci. Nkaambo kamanyongwe aayo mweendelezi taakaziba cini-cini cakacitika. Aboobo wakalailila basilumamba bakwe kuti batole Paulu kulimbabo. 35Bakeenda aawe mane kusika azitantilo zyamulyango waŋanda, aawo basilumamba bakanyamuna Paulu nkaambo bantu bakaubingana kapati. 36Boonse bantu bakali kuya bumutobela akupozomoka kuti, “Jaya!”

Paulu mbwaakalyaambilila

37Lino kabayanda kumunjizya mukati, Paulu wakaambila mweendelezi walumamba kuti, “Ndikumbila kuti ndikwaambile cimwi cintu yebo.”

Mweendelezi wakati, “Sena ulaamba Cigiliki? 38Nkokuti toli Muijipiti uulya wakabusizye lupyopyongano mazuba aainda, akusololela zyuulu zyone zyabazangi munkanda?”

39Paulu wakaingula kuti, “Peepe, mebo ndili Mujuda, ndakazyalilwa mumunzi wa Taasosi, mucisi ca Silisiya. Ndili muzyale wamunzi mupati wabulemu. Akaka ndikumbila kukanana kubantu.”

40Mpoonya mweendelezi wakamuzumizya kwaamba. Eelyo Paulu wakaima amatantilo akutambika janza lyakwe kubantu. Nkabela nibakaumuna, Paulu wakaamba kulimbabo mu Cihibulu,

Currently Selected:

Milimo 21: Tonga96

Highlight

Copy