Kulonga 10
10
Cikwikwi mbucakavumpa mu Ijipiti
1Lino Mwami Leza wakati kuli Mozesi, “Koya kuli Falo.
“Nkaambo ndakacita kuti abe sicinguni walo abalupati-pati bakwe kutegwa ndikonzye kucita zitondezyo amaleele aangu akati kabo. 2Kuti mukakonzye kwaambila bana abazyukulu banu mbuli mbwendakabafubaazya Baijipiti nindakacita maleele akati kabo. Eelyo nyoonse muyooziba kuti ndime Mwami Leza.”
3Lino Mozesi a Aloni bakainka kuli Falo, baakuti kulinguwe. “Mboobu mbwaamba Mwami Leza, Leza wa Bahibulu, ‘Ino uyoolibombya lili kulindime akuzumina nzendaamba? Ubaleke bantu bangu bainke kuti bakandikombe. 4Kuti naa kocikaka kubaleka kuti bainke, juunza mabala ndiyooleta cikwikwi mucisi cako. 5Ciyoovumpa nyika yoonse kuti kiitacilibonyi. Ciyoolya zyoonse zyatakanyonyoonwa acivulamabwe, ciyoolya misamu yanu yoonse. 6Ciyoozula mumaanda aako aabwami oonse amaanda abalupati-pati bako, alimwi aabantu bako boonse. Ciyoobija kwiinda zyoonse zintu nzibakabona kale bamauso abasikale banu mbubakali kusikila munyika eeyi!’” Mpoonya Mozesi wakazwa akusiya Falo.
7Lino balupati-pati ba Falo, bakati kulinguwe, “Nciindi cilamfu cili buti ooyu muntu ncanootupenzya? Baleke buyo bantu aaba kabaya kutegwa bakakombe Mwami Leza wabo. Sena yebo tobwene kuti Ijipiti yanyonyooka?”
8Lino Mozesi a Aloni bakaletwa kuli Falo, mpoonya wakati kulimbabo, “Mulakonzya kuunka kuyookomba Mwami Leza wanu. Pele ino mbaani batuunke?”
9Mozesi wakaingula kuti, “Toonse tulainka, tobapati abana antoomwe. Tulainka abana besu balombe, basimbi, mbelele ampongo zyesu, nkaambo tweelede kuyoocita pobwe ku Mwami Leza.”
10Lino Falo wakati, “Ncoolwe canu kuti ndimuzumizye kutola bakaintu abana banu. Calibonya buya kuti muyanda kweeta mapenzi amwi. 11Peepe! Kuti naa eeco ncomuyanda akuunke buyo ndinywe nobaalumi, mukakombe Mwami Leza. Mbubonya mbuli mbomwalikukomba.” Mpoonya ba Mozesi a Aloni bakatandwa.
12Lino Mwami Leza wakati kuli Mozesi, “Nyamuna janza lyako ulitandabike atala anyika ya Ijipiti kuti cikwikwi ciboole, cilye zyoonse zikomena, zyoonse zyakasiigwa acivulamabwe.” 13Aboobo Mozesi wakatandabika musako wakwe, mpoonya Mwami Leza wakacita kuti kubbubule guwo kuzwa kujwe sikati lyoonse amasiku. Nibwakaca cifumo-fumo, lyakeeta cikwikwi. 14Cakazula nyika yoonse, akukkala kacinyawita. Eeco cikwikwi cakakkala cakali cinji kapati kwiinda coonse cakabwenwe kale mucisi, alimwi takuciyoobonwi cimbi cili boobo. 15Cakavumba nyika yoonse cakuti yakasiya ncico. Cakalya zyoonse zyakamenede anyika, akulya yoonse micelo yamisamu eeyo yatakanyonyoonwa acivulamabwe. Tiikwakacili kubonwa kateyo katete niliba tu tete limenede kumusamu munyika yoonse ya Ijipiti.
16Mpoonya Falo cakubindaana, wakaita Mozesi a Aloni akuti kulimbabo, “Ndabisizya Mwami Leza wanu akubisizya ndinywe. 17Lino akaka alimwi amundilekelele, akukomba ku Mwami Leza wanu kuti agwisye cisubulo eeci ciyoosya.” 18Mpoonya Mozesi wakazwa akuyookomba ku Mwami Leza. 19Eelyo Mwami Leza wakasandula guwo akucita kuti lizwe kumbo akubbubbulisya. Nkabela cikwikwi coonse cakayumbilwa mu Lwizi Lusalala. Taakwe acomwe cikwikwi cakasyaala mu Ijipiti. 20Pele Mwami Leza wakacita kuti Falo kacili sicinguni, taakwe naakabaleka Baisilayeli kuti bainke.
Baijipiti mbubakapenzegwa amudima uusiya mbi
21Mwami Leza wakati kuli Mozesi, “Tambika janza lyako mujulu kuti kuboole munyika ya Ijipiti mudima mulemu uusiya mbi uukonzya kumvwigwa.” 22Mpoonya Mozesi wakatambika janza lyakwe kujulu, eelyo kwakaba mudima uusiya mbi munyika yoonse ya Ijipiti kwamazuba otatwe. 23Baijipiti tiibakali kukonzya kubona pe alimwi taakwe amuntu wakazwa aŋanda yakwe kwamazuba otatwe. Pele balo Baisilayeli boonse bakali amumuni ooko nkubakali kukkala.
24Mpoonya Falo wakaita Mozesi akuti, “Kamuya mukakombe Mwami Leza abalo bakaintu abana banu balakonzya kuunka anywebo. Pele mbelele, mpongo, aŋombe zyanu muzisiye kuno.” 25Mozesi wakaingula kuti, “Weelede kutuzumizya kutolelezya banyama bakuyoopaizya akutenta azipaililo, kutegwa tukapaizye ku Mwami Leza wesu. 26Abalo banyama besu tuleelede kuti tubatolelezye, taakwe citisyaale pe. Tuleelede kusala banyama bakupaizya ku Mwami Leza wesu, nkaambo katutana sika ooko, kunyina mbotunga twaziba zyeelede kupaizya ku Mwami Leza.”
27Pele Mwami Leza wakacita kuti Falo kacili sicinguni taakabazumizya kuunka. 28Falo wakati kuli Mozesi, “Kozwa aawa! Intacikuboni kabili. Naa ukaboole alimwi uzoojaigwa buzuba mbubonya oobo.” 29Mozesi wakati, “Mbubonya mbuli mbooamba, nsicikabooli limbi pe.”
Currently Selected:
Kulonga 10: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
