Kulonga 11

Zyalufu lwabana bakusaanguna

1Lino Mwami Leza wakati kuli Mozesi, “Lino kwasyaala buyo cisubulo comwe ncetiletele Falo a Baijipiti. Camana eeco uyoomuleka muunke. Aakumuleka uyoomutandila limwi. 2Baambile bantu, baalumi abakaintu boonse kuti bakumbile, zyakulibotezya zyansiliva azyangolida ku Baijipiti mbobabambene limwi.” 3Eelyo Mwami Leza wakacita Baijipiti kuti babede Baisilayeli nkumbu. Nkaako balupati-pati ba Falo alimwi abantu buyo bakalemeka Mozesi kapati.

4Lino Mozesi wakaambila Falo kuti, “Mboobu mbwaamba Mwami Leza, ‘Akati kamasiku ndileendeenda akati ka Baijipiti, 5nkabela mwana wakusaanguna mulombe ulafwa.’ Kuzwida kumwanaa Falo, ooyo weelede kunjila bwami kusika kumwana wamukaintu muzike uuziya. Abalo bana baŋombe bakusomona balafwa. 6Kuyooba mibila mipati mu Ijipiti, iitanakubede, alimwi tiikooyooba limbi pe. 7Pele mwalo mu Baisilayeli taakwe naba mubwa uutikakuwe bantu nibaba banyama pe, oobo mbomuyooziba kuti Mwami Leza ulaandaanya Baijipiti a Baisilayeli.” 8Nkabela Mozesi wakamanizya akuti, “Boonse aaba balupati-pati bako bazoondizida akundivuntamina akuti, ‘Kamuzwa, yebo abantu bako boonse!’ Musule akooku ndiyooinka.” Mpawo kanyemede kapati Mozesi, wakazwa, wasiya Falo.

9Lino Mwami Leza wakaambide kuli Mozesi kuti, “Falo takooyookuswiilila pe, kutegwa nkacite azimbi zigambya mu Ijipiti.” 10Eelyo Mozesi a Aloni bakazicita zyoonse eezi kumbele lya Falo, pele Mwami Leza wakacita kuti Falo abe sicinguni, nkaako taakwe naakabaleka Baisilayeli kuti basiye nyika yakwe.

Currently Selected:

Kulonga 11: Tonga96

Highlight

Compare

Copy