Kulonga 13

Kupegwa kwamwana wakusaanguna ku Mwami Leza

1Lino Mwami Leza wakati kuli Mozesi, 2“Amundipe bana boonse bakusaanguna. Kufumbwa mwana wa Muisilayeli wakusaanguna, naba wamunyama, boonse mbibangu.”

Pobwe lyacinkwa citakwe mimena

3Mozesi wakati kubantu, “Amubuyeeye buzuba oobo mbumwakazwa mu Ijipiti mubuzike, nkaambo Mwami Leza wakamugwisya anguzu mpati. Taakwe cinkwa cilaamimena ceelede kuligwa mubuzuba oobu. 4Mulazwa mu Ijipiti sunu buno buzuba mumwezi wakusaanguna wa Abibu. 5Mwami Leza wakalisinizizye naakapa cisyomezyo kuli basikale banu cakuti uyoomupa nyika ya Bakenani, Bahiti, Baamoli, Bahivi, a Bajebusi. Ninyika iikunka mukupa abuci. Muleelede kunoobamba cilengwa eeci mumwezi ooyu ngoonya. 6Kwamazuba aali ciloba kunoocitwa pobwe lya Mwami Leza. Cinkwa citakwe mimena cikaligwe mumazuba aali ciloba, 7takweelede kuyooba cinkwa cilaamimena niiba mimena iini munyika yanu yoonse. 8Mubuzuba oobu mukabapandulwide bana banu balombe kuti, ‘Coonse eeci cilacitika akaambo kaceeco ncaakatucitila Mwami Leza nitwakazwa mu Ijipiti.’ 9Eeci cilengwa cilaba mbuli lubata ajanza lyanu naa ciibalusyo ankumo zyanu, cinoomwiibalusya kwaamba akwiisya milawo ya Mwami Leza, nkaambo ngonguwe wakamugwisya mu Ijipiti ajanza lyakwe lyanguzu. 10Nkaako muleelede kwiibamba milawo eeyo muciindi ceelede mwaka amwaka.

Zyakunununa mwana wakusaanguna

11“Mwami Leza uyoomusisya akumupa nyika ya Bakenani njaakakonkezya kulindinywe akuli basikale banu. 12Aakumupa buyo mweelede kunoopa coonse cisaanguna kuzyalwa ku Mwami Leza. Kufumbwa banyama bakusomona beenze mba Mwami Leza. 13Pele mwanaa mbongolo wakusomona muleelede kumunununa kwiindila mukutuuzya kabelele. Kuti naa tamuyandi kumunununa, mweelede kumutyola nsingo. Abana banu balombe bakusaanguna boonse mweelede kubanununa. 14Kuti kumbele amazuba akamubuzye mwanaanu mulombe kuti, ‘Ino eeci caamba nzi?’ Mukamwiingule kuti, ‘Mwami Leza wakatugwisya anguzu mpati mu Ijipiti mubuzike. 15Nkabela Falo naakatikake, cagama, kuti atuleke tuzwe, Mwami Leza wakajaya oonse mwana wakusaanguna mu Ijipiti, wabantu abanyama. Nkankakaako ncotupaizya bana bakusomona babanyama ku Mwami Leza, pele bana besu balombe bakusaanguna tulabanununa.’ 16Eeci cilengwa ciyooba ciibalusyo cilimbuli lubata ajanza lyanu naa citondezyo ankumo zyanu, nkaambo Mwami Leza wakatugwisya mu Ijipiti ajanza lyakwe lyanguzu.”

Musumpuululu wakkumbi awamulilo

17Lino Falo naakazumizya bantu kuti bainke, Leza taakabainzya mugwagwa wiinda mucisi ca Filisiti, nikuba kuti eeyi yakali nzila iikosola kwiinda zyoonse. Leza wakati, “Nsiyandi kuti bantu aaba basandule mizeezo yabo, akuyoobweeda ku Ijipiti baakubona kuti balwanwa.” 18Aboobo wakabainzya nzila iizinguluka iiinda munkanda ku Lwizi Lusalala. Nkabela Baisilayeli bakazwa mucisi ca Ijipiti kabajisi zilwanyo. 19Mozesi wakatolelezya mafuwa aa Josefa, mbubonya mbuli Josefa mbwaakabalaililide cakukonkezya kuti bakaatolelezye. Josefa wakaambide kuti, “Leza uyoomugwasya ncobeni, nkabela mukaayumune mafuwa aangu kuzwa kubusena obuno.”

20Bakazwa kubusena butegwa Sukkoti akuyoosika kucilawo citegwa Etamu nkubakaakuyaka zivuka zyakulyookezezya, kumagolelo aankanda. 21Nkabela sikati Mwami Leza wakali kubasolweda amusumpuululu wakkumbi kubasolweda nzila, ciindi camasiku wakali kubasolweda amusumpuululu wamulilo kubamunikila. Nkaako bakali kukonzya kweenda sikati amasiku. 22Musumpuululu wakkumbi wakali kumbele lyabantu lyoonse sikati, amusumpuululu wamulilo wakalikumbele lyabo lyoonse masiku.

Currently Selected:

Kulonga 13: Tonga96

Highlight

Compare

Copy