Kulonga 14
14
Baisilayeli mbubakazubuka Lwizi Lusalala
1Lino Mwami Leza wakati kuli Mozesi, 2“Baambile Baisilayeli kuti bapiluke musule akuyoolyookezya kufwiifwi aku Pihahiloti, akati kamunzi wa Migidolu alwizi, kumbali a Baalazefoni. 3Abona boobo Falo ulayeeya kuti, ‘Mbaabo Baisilayeli baide kwiingaila mucisi, nkokuti nkanda yabasinkila.’ 4Ndiyoocita kuti Falo mugama lyakwe abatobele. Eelyo ndiyoomuzunda Falo abasilumamba bakwe boonse. Kuzunda ooku kuyoondiletela bulemu. Baijipiti bayooziba kuti ndime Mwami Leza.” Lino Baisilayeli bakacita mbuli mbubakaambilwa.
5Lino mwami waku Ijipiti naakaambilwa kuti bantu batija, walo abalupati-pati bakwe bakasandula myoyo yabo, eelyo bakati, “Ino twakaba aa nzi swebo? Twakaleka buti Baisilayeli kuti bazwe mubuzike?” 6Mpoonya Falo wakabamba nkalaki zyalumamba, wakainka abasinkondo bakwe. 7Wakatola nkalaki zyakwe zibotu kwiindilila zili myaanda iili cisambomwe, alimwi kwakainka azimwi nkalaki, kwakali abasilutwe mulinzizyo zyoonse. 8Mbombubo oobu Mwami Leza mbwaakacita kuti Falo mwami wa Ijipiti mugama lyakwe, atobele Baisilayeli balo bakazwa cabusicamba. 9Eelyo Baijipiti, amabbiza aabo oonse, ankalaki zya Falo, abasimabbiza aalumamba lwakwe, bakatobela Baisilayeli baakubeenzya ooko nkubakalyookezezya kumbali alwizi, kufwiifwi aku Pihahiloti kumbele lya Baalazefoni.
10Lino naakaswena aafwiifwi Falo, Baisilayeli bakabona Baijipiti kabazabuza kulimbabo, nkaako bakayoowa kapati, akutalika kulilila Mwami Leza. 11Alimwi bakati kuli Mozesi, “Sena caamba kuti kwakabula azyuumbwe mu Ijipiti ncookatweeta omuno munkanda kuti tuzoofwe? Ino wakatugwisizya nzi mu Ijipiti? 12Sena tiitwakakwaambila katutanazwa mu Ijipiti kuti eeci ciyoocitika? Twakaamba kuti, ‘Tuleke buyo, katuli bazike ba Baijipiti. Cali kunooinda kubota kuti katuli buyo bazike kwiinda kuzoofwida munkanda.’”
13Lino Mozesi wakabaingula kuti, “Mutayoowi pe! Amwiime nji, mubone Mwami Leza mbwatimuvune sunu. Baijipiti aaba mbomubwene, tamuciyoobaboni limbi pe. 14Mwami Leza ulamulwanina nywebo amuumune buyo.”
15Lino Mwami Leza wakati kuli Mozesi, “Nkaambo nzi ncomulilila ndime? Baambile Baisilayeli beende buyo kabaya kumbele. 16Bweza musako wako, utandabike janza lyako atala aalwizi kuti waandaanye maanzi, kutegwa Baisilayeli bakosole lwizi kabaya bweenda anyika njumu. 17Ndilapa Baijipiti cinguni, nkabela kuzunda kwentizunde Falo abasinkondo bakwe boonse, ankalaki zyakwe, alimwi abasimabbiza bakwe akusweekelwa nkwatisweekelwe kuyoondiletela bulemu. 18Ndaakujana bulemu mukuzunda Falo ankalaki zyakwe abasimabbiza bakwe ndendilyo Baijipiti nibayooziba kuti ndime Mwami Leza.”
19Lino mungelo wa Mwami Leza, ooyo wakali kubasolweda Baisilayeli, wakazwa kumbele waza musule. Awalo musumpuululu wakkumbi wakali kumbele lyabo, wakazwa kumbele wazooba musule. 20Wakaba akati kabasinkondo ba Baijipiti a Baisilayeli. Musumpuululu ooyo wakaleta mudima ku Baijipiti akupa mumuni ku Baisilayeli, eelyo makamu aaya taakaswenana aafwiifwi masiku oonse pe.
21Lino Mozesi wakatandabika janza lyakwe atala aalwizi, mpoonya Mwami Leza wakayumba maanzi alwizi aguwo lyakali kuzwida kujwe lyakabbubbula masiku oonse akuyuminizya maanzi aawo yaba nyika njumu. Maanzi akaandaana akati, 22mpoonya Baisilayeli bakazubuka lwizi kabaya bweenda anyika njumu, maanzi akaliimvwi mbuli bwaanda kululyo akulumwensi lwabo. 23Eelyo abalo Baijipiti bakaccilila mulwizi, amabbiza aa Falo oonse, ankalaki zyakwe, abasimabbiza bakwe. 24Kubucedo, Mwami Leza wakalanga ansi kuli basinkondo Babaijipiti kuzwida mumusumpuululu wakkumbi lyamulilo akunyonganya Baijipiti. 25Wakaanga mavili aankalaki zyabo kwaacita kuti kaatacizinguluki kabotu naaenda. Mpoonya Baijipiti bakati, “Atuzuze tutije kuzwa ku Baisilayeli nkaambo Mwami Leza nguubalwanina, kulwana ndiswe.”
26Lino Mwami Leza wakaambila Mozesi kuti, “Tandabika janza lyako atala aalwizi kuti maanzi ajalane akubanyikizya Baijipiti, ankalaki zyabo abasimabbiza babo.” 27Aboobo Mozesi wakatandabika janza lyakwe atala aalwizi, lino mpobuceda maanzi akabuwana akuba mbuli lyoonse. Nkabela Baijipiti nibakatikasole kulivuna, Leza wakabanyikizya. Mbombubo oobu mbwaakabazunda Baijipiti akati kalwizi. 28Maanzi akaboola akunyikizya nkalaki, basimabbiza aboonse basinkondo ba Falo bakali kuya butobela Baisilayeli. Taakwe anaba omwe wakasyaala pe. 29Pele Baisilayeli bakeenda anyika njumu mulwizi, maanzi akaba bwaanda kululyo akulumwensi lwabo.
30Lino mubuzuba oobo Mwami Leza wakavuna Baisilayeli kuzwa ku Baijipiti, alimwi Baisilayeli bakiibona mitumba ya Baijipiti kiilele bwaalaala munkomwe yalwizi. 31Alimwi bakabona nguzu zya Mwami Leza, bakamusyoma amubelesi wakwe Mozesi.
Currently Selected:
Kulonga 14: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
