Kulonga 16

Baisilayeli mbubakapegwa mana abakancele

1Baisilayeli boonse bakatalika lweendo lwabo kuzwa ku Elimu, nkabela mubuzuba bwakkumi bwamwezi wabili kabazwide kale mu Ijipiti, bakasika kunkanda ya Sini, iili akati ka Elimu acilundu cipati ca Sinai. 2Nkamu yoonse ya Baisilayeli yakatongookela Mozesi a Aloni munkanda, 3akuti kulimbabo, “Nicakabota kuti Mwami Leza naakatujaila mu Ijipiti. Nkaambo okuya twakali kulya nyama azilyo zimwi cakulilekela. Pele nywebo mwakatweeta muno munkanda kuti tuzoomane kufwa nzala.”

4Lino Mwami Leza wakaambila Mozesi kuti, “Bona, ndacita kuti tunkwa katuloka kuzwa kujulu kuti nyoonse kamulya. Bantu baleelede kunooinka akubweza tuzulila buzuba oobo. Munzila eeyi ndakonzya kubasunka ndibone naa balatobela malailile aangu naa pe. 5Pele mubuzuba bwacisambomwe baleelede kweeta zibanzilo zyobilo kutali mbuli lyoonse, bamana babambe cilyo eeco kabotu.”

6Lino Mozesi a Aloni bakaambila Baisilayeli boonse kuti, “Mangolezya aano mulaziba kuti Mwami Leza nguwakamweeta kuzwa mu Ijipiti. 7Cifumo-fumo muzoobona bulemu bwa Mwami Leza, nkaambo wakamvwa matongoosi aanu. Iiyi, aayo ngimwakamutongookela, ino swebo ndiswe bani kuti kamututongookela?” 8Mpawo Mozesi wakaindilizya akuti, “Mwami Leza ulamupa nyama kumangolezya alimwi atunkwa tunji cifumo-fumo, nkaambo wakamvwa matongoosi aanu. Ino ndiswe bani swebo? Tamutongookeli ndiswe pe, mutongookela Mwami Leza.”

9Lino Mozesi wakati kuli Aloni, “Ambila Baisilayeli boonse kuti bazooime kumbele lya Mwami Leza nkaambo wamvwa matongoosi aabo.” 10Aloni kacaambaula kumbungano ya Baisilayeli, boonse bakalanga munkanda, mpoonya bulemu bwa Mwami Leza bwakalibonya mukkumbi. 11Eelyo Mwami Leza wakati kuli Mozesi, 12“Ndamvwa matongoosi aa Baisilayeli. Lino baambile kuti, ‘Kulubundu-bundu mulalya nyama, cifumo-fumo muzookkuta cinkwa.’ Ndendilyo nimuyooziba kuti mebo ndime Mwami Leza wanu.”

13Lino kumangolezya kwakasika bakancele bazoozula abusena oobo bwazivuka zyabo, alimwi cifumo-fumo kwakali lume kuzinguluka zivuka. 14Lino lume oolu nilwakayuminina, kwakalibonya tuntu tupapali tuuba-uba ansi, twakali mbuli tulosi twamaanzi aacaanda. 15Nkabela Baisilayeli nibakatubona bakatalika kubuzya kuti, “Ino ninzi eeci?” Nkaambo tiibakaziba kuti cakali cinzi. Mpoonya Mozesi wakati kulimbabo, “Eeci ncecinkwa ncaamupa Mwami Leza kuti mulye. 16Walailila kuti umwi aumwi abweze cakulya eeci mbuli mbwakonzya kulya. Nkokuti nsangwa yomwe, amuntu omwe kweendelana amukwasyi wakwe mucivuka.”

17Lino Baisilayeli bakacita oobo, bamwi bakali kubweza kunji, bamwi bakali kubweza kuce kwiinda bamwi. 18Pele nibakacipima kwakajanika kuti aabo bakabwezede kunji taakwe ncobakaleka kulya, abaabo bakabwezede kuce bakakkuta eeco nciconya. Omwe-omwe wakabweza ncakonzya kulya. 19Mozesi wakati kulimbabo, “Taakwe muntu uutisiye ndala yacilyo eeci kusikila cifumo-fumo.” 20Pele bamwi taakwe nibakaswiilila Mozesi pe, bakacilazika cimwi mane bwaca. Nibwakaca, cakali amvunyu cabija. Nkabela Mozesi wakanyemena bantu aabo. 21Lyoonse cifumo-fumo bakali kubweza aumwi mbuli mbwayanda, pele zuba nilyakali kubala cakali kweenzemuka.

22Lino mubuzuba bwacisambomwe bakali kubweza mweelwe wacakulya camazuba obilo, nkokuti nsangwa zyobilo aumwi muntu. Boonse basololi babantu bakasika akuzoomwaambila Mozesi eeci, 23eelyo walo wakati kulimbabo, “Mboobu mbwakalailila Mwami Leza, ‘Juunza mbuzuba bwakulyookezya, mbuzuba busalala bwakulyookezya bupedwe ku Mwami Leza, kufumbwa ncomuyanda kukanga amukangile limwi, acalo ncomuyanda kujika amujikile limwi. Citikasyaale muciyobole mane zona.’” 24Mbubonya mbuli mbwaakalailila Mozesi, bakaziyobola zyakasyaala mane kuyoosika zona, tiizyakabija pe, alimwi tiizyakajisi mvunyu. 25Buce Mozesi wakati, “Amulye eeci sunu, nkaambo sunu ni Sabata mbuzuba bwakulyookezya bupedwe ku Mwami Leza, aboobo taakwe ncomutijane ansi pe.” 26Mweelede kuti kamubweza buzuba abuzuba kwamazuba aali cisambomwe, pele buzuba bwaciloba, mbuzuba bwa Sabata, kuyoobula acomwe.

27Lino mubuzuba bwaciloba bamwi bantu bakaya kuti bakabweze, pele taakwe acomwe ncobakaakujana. 28Mpoonya Mwami Leza wakaambila Mozesi kuti, “Ino nywebo nobantu mulaleka lili kuvoolozya malailile amilawo yangu? 29Amubone, mebo nde Mwami Leza, ndimupede buzuba bwakulyookezya, nkankakaako ncemupeda cakulya cizulizya mazuba obilo mubuzuba bwacisambomwe. Oonse muntu kakkede buyo ooko nkwabede mubuzuba bwaciloba, taakwe muntu uutisiye civuka cakwe.” 30Aboobo bantu bakalyookezya mubuzuba bwaciloba.

31Lino Baisilayeli bakaita cilyo eeci kuti mana. Cakali mbuli nseke zyanzembwe, cakali kutuba akulweela mbuli tunkwa twavwelwa buci. 32Mozesi wakati, “Mboobu Mwami Leza mbwaalailila, ‘Muyobole nsangwa yomwe yamana muyobwede lunyungu lwanu luyoozyalwa kumbele kuti abalo bakabone cakulya ncindakamupede kuti mulye munkanda aawo nindakamugwisya mu Ijipiti.’” 33Mpoonya Mozesi wakati kuli Aloni, “Amubweze cinkuli, mubikke mana mulincico aazula nsangwa, eelyo mucibikke kumbele lya Mwami Leza kuti ciyobwedwe lunyungu lwanu luciza.” 34Mbubonya Mwami Leza mbwaakalailila Mozesi, Aloni wakacibikka kumbele lyabbokesi lyacizuminano kuti ciyobolwe. 35Baisilayeli bakali kulya mana kwamyaka iisika kumakumi one mane kusikila nibakaakusika kucisi cakali kukkala bantu. Bakali kulya mana mane nibakazoosika kumunyinza wanyika ya Kenani. 36Kuli nsangwa zili kkumi mucisuwo comwe.

Currently Selected:

Kulonga 16: Tonga96

Highlight

Compare

Copy