Kulonga 17
17
Zyamaanzi aakazwa mubbwe
(Myeelwe 20.1-13)
1Lino Baisilayeli boonse bakazwa akusiya nkanda ya Sini, kabaya bulonga-longa kuzwa kucilawo cimwi akuya kuli cimwi mbubonya mbuli malailile aa Mwami Leza. Bakaakusika akuyaka zivuka kubusena butegwa Lefidimu, pele kwakanyina maanzi. 2Nkaako bantu bakatongookela Mozesi akuti kulinguwe, “Kotupa maanzi tunywe.” Mozesi wakaingula kuti, “Nkaambo nzi ncomutongookela ndime? Nkaambo nzi ncomutalika acaali Mwami Leza?”
3Lino bantu bakafwide nyota kapati, aboobo bakaindilizya akuti, “Ino wakatugwisizya nzi mu Ijipiti akutuleta kuno? Sena wakatweetela kuti tuzoomane kufwa nyota abana besu abanyama besu?”
4Lino Mozesi wakakomba canguzu ku Mwami Leza wakati, “Ino bantu aaba ndabacita buti? Mbaaba bakakatila kuti banduume mabwe!”
5Lino Mwami Leza wakati kuli Mozesi, “Tolelezya abamwi basololi ba Baisilayeli, mulibeelezye muye kumbele. Ubweze amusako wako ngookaumya mulonga wa Nailo, muunke. 6Njooima kumbele lyako abbwe pati kuya kunkanda ya Holebu. Ukalyuume eelyo bbwe pati. Mpoonya maanzi ayoopoomoka mulindilyo aakuti bantu bakanywe.” Nkabela Mozesi wakacita oobo kabalangilide basololi ba Baisilayeli. 7Lino busena oobo bwakaulikwa kuti “Masa” a “Meliba” nkaambo Baisilayeli bakatongooka akutalika Mwami Leza, aawo nibakali kubuzya kuti, “Mwati Mwami Leza mpali akati kesu naa pe?”
Baisilayeli mbubakazunda Baameleki
8Lino Baameleki bakaboola kuzoolwana Baisilayeli ku Lefidimu. 9Eelyo Mozesi wakaambila Josyuwa kuti, “Sala bamwi baalumi, muzooinke juunza kukulwana Baameleki. Mebo njooima atala aacilundu, kandijisi musako wakandipa Leza.” 10Eelyo Josyuwa wakacita mbuli mbwakamulailila Mozesi, wakainka kuyoolwana Baameleki, pele Mozesi, Aloni a Huli bakaya akuyootanta cilundu. 11Kwaciindi Mozesi naakatambikide maboko aakwe mujulu, Baisilayeli bakali kuzunda, pele kuti waalosya maboko aakwe, mpoonya Baameleki bakatalika kuzunda. 12Lino maboko aa Mozesi naakaminwa, Aloni a Huli bakamuletela bbwe kuti akkale mpawo, eelyo balo bakaima munsi lyakwe akutabilila maboko aakwe. Bakali kwaatabilide boobo mane kusikila nilyakabbila zuba. 13Munzila eeyi Josyuwa wakabazundila limwi Baameleki mukulwana ooko.
14Lino Mwami Leza wakati kuli Mozesi, “Lemba makani aaya mubbuku kuti atakalubwi pe, alimwi umwaambile Josyuwa kuti ndiyoocita kuti Baameleki bakalubilwe limwi munyika.” 15Mpoonya Mozesi wakayaka cipaililo akucuulika kuti, “Mwami Leza nindembela yangu.” 16Wakati, “Amwiimike ndembela ya Mwami Leza. Walo wakakonkezya kuti ulaba sinkondonyina a Baameleki kwamazyalani oonse.”
Currently Selected:
Kulonga 17: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
