Kulonga 18

Jetulo mbwaakaswaya Mozesi

1Lino Jetulo mupaizi waku Midiyani, simakwaakwe Mozesi, wakamvwa zyoonse Leza nzyaakacitila Mozesi abantu bakwe Baisilayeli, ambuli Mwami Leza mbwaakabasolwedela kuzwa mu Ijipiti. 2Aboobo Jetulo, wakatolelela Zipola, mukaintu wa Mozesi, ooyo walo Mozesi ngwaakapilusizye kwabo. 3Alimwi Jetulo wakaletelela abana ba Mozesi balombe bobilo, Gesyomu a Eliyazaa. Mozesi wakaambide kuti, “Ndimuzwakule munyika yabantu, aboobo umwi mwana wakwe wakamuulika kuti Gesyomu.” 4Alimwi wakalaambide akuti, “Leza wataata wakali ngolugwasyo lwangu, wakandivuna kupanga lya Falo, aboobo umwi mwana wakamuulika kuti Eliyazaa. 5Jetulo, simakwaakwe Mozesi, wakasika amukaintu alimwi abana balombe ba Mozesi bobilo munkanda oomo Mozesi mwaakayaka civuka kucilundu ca Leza. 6Jetulo wakatumizya mulomo kuli Mozesi wakuti, ‘Ime ndime Jetulo simakwaako, ndizabuza kulinduwe, amukaintu wako abana.’” 7Nkabela Mozesi wakainka kuyoomucingauzya, naakaakumujana wakamufugamina akumumyonta. Bakajuzyanya akubuzyanya-buzyanya zyambobapona, bamane bazoonjila mutente. 8Mozesi wakamulungulwida zintu zyoonse Mwami Leza nzyaakacita kuli Falo abantu bakwe Baijipiti akaambo ka Baisilayeli. Wakamwaambila azyabuyumu-yumu boonse mbubakajana munzila, ambuli mbwaakabavuna Mwami Leza. 9Jetulo wakabotelwa kapati akaambo kabubotu bwa Mwami Leza naakavuna Baisilayeli kuzwa ku Baijipiti. 10Wakati, “Alumbwe Mwami Leza wakamufutula kuzwa ku Baijipiti akuli Falo. 11Ndaziba kuti Mwami Leza mupati kwiinda baleza boonse, nkaambo wakacita eeci ku Baijipiti nibakasulaikide Baisilayeli.” 12Eelyo Jetulo wakaletela Leza cipaizyo cakutenta alimwi azituuzyo zimwi. Awalo Aloni abasololi boonse Baisilayeli bakaboola kuti balide amwi cinkwa asimakwaakwe Mozesi kumbele lya Leza.

Babetesi mbubakasalwa

(Ciibalusyo 1.9-18)

13Nibwakaca, Mozesi wakatalika kubeteka bantu, nkabela nkujana bantu bakalibungene kuzwida cifumo-fumo mane masiku. 14Jetulo simakwaakwe Mozesi, naakabona milimo yoonse yakali kucita Mozesi, wakabuzya kuti, “Ino milimo nzi yoonse eeyi njocitila bantu? Nkaambo nzi ncocita eeci olikke nkaambo nzi bantu ncobaza kulinduwe kuzwida cifumo-fumo mane kusikila masiku?”

15Lino Mozesi wakaingula kuti, “Ndileelede kucita boobu, nkaambo bantu balandizida kuzoobuzya mbuli mbwalailila Leza. 16Kuti naa bantu bobilo kabazwangana, balaboola kulindime, ndamana mebo, ndime eembeteka kaambo kabo kuti ndibone naa nguuli uuluzi, alimwi ndilabaambila aalo malailile aa Leza amilawo yakwe.”

17Amvwe boobo simakwaakwe Mozesi wakati kulinguwe, “Eeci cintu ncocita taciluzi pe. 18Kayi milimo ilakuminya, yebo abantu aabo bali aanduwe. Ooyu mulimo mmupati, tokonzyi kuucita olikke. 19Swiilila ndikulailile kabotu mbuli mboelede kucita, alimwi a Leza ulaba aanduwe. Ncibotu kuti wiiminine bantu kuli Leza akumuletela twaambo twabo. 20Uleelede kubaiisya malailile amilawo yakwe akubapandulwida mbuli mbobeelede kukkala anzyobeelede kucita. 21Nkaako usale baalumi basongo bakonzya kubeteka, mbotibikke kuti babe basololi bazyuulu, bamyaanda, bamakumi osanwe, abamakumi alimwi kabali bantu bayoowa Leza, batayandi zisinkamulomo. 22Ubabikke babe babetesi babantu, bakkalilile mumilimo eeyo. Yebo banookweetela buyo twaambo tuyumu toonse, pele balo banoobeteka twaambo toonse tuniini. Eeco inga ciyookuubila nkaambo muyooabana mukuli ambabo. 23Kuti naa wacita boobo, mukuti Leza nguwalailila inga tiikookuminya milimo pe, abalo bantu lwabo banookoswedwa cakufwambaana twaambo twabo akupiluka caluumuno kumaanda aabo.”

24Lino Mozesi wakaswiilila majwi aasimakwaakwe, akucita eeco ncaakaamba. 25Wakasala aabo bantu basongo akati ka Baisilayeli boonse, akubabikka mubusololi bwabantu, bamwi bakaba basololi bazyuulu, bamwi bamyaanda, bamwi bamakumi osanwe, abamwi bamakumi. 26Bakabeteka bantu kwaciindi coonse. Bakali kuleta milandu miyumu kuli Mozesi, pele balo beni bakali kukosola milandu miniini. 27Mozesi wakalayana asimakwaakwe, walo wakabweeda kunyika yokwabo.

Currently Selected:

Kulonga 18: Tonga96

Highlight

Compare

Copy