Kulonga 20
20
Milawo iili kkumi
(Ciibalusyo 5.1-21)
1Eelyo Leza wakaamba majwi aaya oonse. Wakati, 2“Ndime Mwami Leza wako wakakugwisya munyika ya Ijipiti, mubuzike.
3“Utabi aabaleza bambi kunze lyangu.
4“Utalicitili cibumbwa niciba cikozyanyo cacilenge cimwi camujulu naa caansi, niciba camumaanzi kunsi aanyika. 5Utakakotamini cikozyanyo nikuba kucikomba, nkaambo mebo ndime Mwami Leza wako, uutalekeleli bakomba baleza bambi. Ndasubula bana babaabo bandisulide mane kuyoosika kuzyalani lyatatu alyane. 6Pele kuli baabo bali zyuulu-zyuulu bandiyanda akubamba milawo yangu, nditondezya luyando lwangu lutamani kulimbabo.
7“Utabelesyi zina lya Mwami Leza wako munzila iitaluleme, nkaambo kufumbwa muntu uubelesya zina lyakwe munzila eeyi, Mwami Leza takooyoomweengelela.
8“Koyeeya buzuba bwa Sabata, ubusalazye. 9Kobeleka milimo yako yoonse mumazuba aali cisambomwe, 10pele buzuba bwa Sabata mbuzuba bwakulyookezya bwakulemeka Mwami Leza wako. Muli boobo toelede kubeleka milimo pe, noba nduwe, nibaba bana bako, nibaba babelesi bako baalumi, nibaba babelesi bako bakaintu, niziba ŋombe zyako naba mweenzu uuli aanduwe. 11Mumazuba aali cisambomwe Mwami Leza wakalenga julu anyika, aalwizi, azintu zyoonse zili mulinzizyo, pele mubuzuba bwa ciloba wakalyookezya. Ncenciceeco Mwami Leza ncaakabuleleka buzuba bwa Sabata akubusalazya.
12“Kolemeka uso abanyoko kuti upone ciindi cilamfu munyika eeyo Mwami Leza wako njayookupa
13“Utajayi.
14“Utaciti bumambe.
15“Utabbi.
16“Utabejelezyi mweenzinyoko kaambo.”
17“Utanyonokeli ŋanda yamweenzinyoko. Utanyonokeli mukamweenzinyoko, naa mubelesi wakwe mwaalumi, naba mubelesi wakwe mukaintu, naa musune wakwe, naa mbongolo yakwe, niciba cimwi cakwe.”
Baisilayeli mbubakayoowa
(Ciibalusyo 5.22-33)
18Lino bantu nibakamvwa kuzuma akubona ndabo akulila kwamweembo walwija lwamugutu, akusuntumuka kwabusi acilundu, bakakankama akuyoowa, eelyo bakatantamuka kuzwa kucilundu. 19Bakati kuli Mozesi, “Kotukananina buyo nduwe, tulakuswiilila, pele kuti naa Leza wakanana nguwe kulindiswe, tulafwa.” 20Mozesi wakati kulimbabo, “Mutayoowi pe, nkaambo Leza wazida buyo kuzoomusunka akuzoomucita kuti kamumuyoowa lyoonse, kutegwa kamutamubisizyi.” 21Pele bantu bakalisosolokede akwiimina alaale, Mozesi alikke nguwakaswenede aafwiifwi akkumbi oomo mwakali Leza.
Milawo yazipaililo
22Lino Mwami Leza wakaambila Mozesi kuti, “Mboobu mboelede kuyooambila Baisilayeli, ‘Tee, mwabona mbuli mbwendaambaula kulindinywe kuzwa kujulu. 23Mutakalicitili mituni yansiliva niiba yangolida kuti kamwiikomba mbuli ndime. 24Mukandiyakile cipaililo cabulongo, nkabela alincico muyoopaizya zituuzyo zyanu kuti zitentwe alimwi azituuzyo zyanu zyalumvwano, mbelele, mpongo aŋombe zyanu. Muyooyaka Kufumbwa mubusena oobo mweyoomwaambila kuti zina lyangu kalikombelwa mumo, ndiyooboola kulindinywe akuzoomuleleka. 25Kuti naa mwandiyakila cipaililo camabwe, mutakaciyasyi amabwe aabezedwe pe, nkaambo kuti naa mwabelesya mbezo alincico, mulacisofwaazya. 26Tamweelede kuunka kucipaililo cangu kamuya butanta azitantilo pe, kutegwa mutakatondezyi zinswe zyanu.’”
Currently Selected:
Kulonga 20: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
