Kulonga 21

Milawo yabuzike

(Ciibalusyo 15.12-18)

1“Lino njeeyi milawo njoelede kupa Baisilayeli. 2Kuti waula muzike Muhibulu, akakubelekele kwamyaka iili cisambomwe. Nkabela mumwaka waciloba uyooangununwa kakutakwe acomwe nceelede kuyookubbadela. 3Kuti naa taakakwete ciindi naakaulwa, uleelede kuyoozwa alikke buyo. Pele kuti naa wakaza kakwete, uleelede kuyoozwa amukaintu wakwe. 4Kuti naa simalelo wakwe wakamupede mukaintu, kwamana mukaintu ooyo wazyala bana, mukaintu ooyo abana banooli basimalelo wakwe, pele mwaalumi alikke nguutikazwe. 5Pele kuti naa muzike ooyo walyaambilila kuti, ‘Mebo ndilamuyanda simalelo wangu, mukaintu, abana bangu, nsiyandi kuti ndaangununwe,’ 6simalelo wakwe uyoomuleta kuŋanda ya Leza, nkokuti kumulyango naa kucicinda caamulyango, ooko nkwayoomudonkweda kutwi. Kuzwaawo uyooba muzike wakwe kusikila mane akafwe.

7“Kuti muntu wauzya mwanaakwe musimbi mubuzike, ooyo mwana takooyooangununwa pe, mbuli bucitwa bazike baalumi. 8Kuti naa taakwe naakamukondelezya simalelo wakwe walikuyanda kumukwata, ulakonzya kumupilusya akumuulisya alimwi kwabo musimbi ooyo. Tazumizigwi kuyoomuuzya kubazwakule nkaambo eeci inga kwaba kumubisizya musimbi ooyo. 9Kuti naa simalelo wakwe kayeeya kuti amukwasye kumwanaakwe uleelede kumulanga mbuli mwanaakwe musimbi. 10Kuti naa muntu waalika, uleelede kunoopa namalelo zyakulya azyakusama mumweelwe ngoonya uuli mbuli ngwaakali kumupa lutaanzi, akunoomusandukila. 11Lino kuti kataciti oobo, uleelede kumuleka, katapilusilwi lubono.

Zyamilawo yakulwana

12“Kufumbwa muntu uuuma muntu akumujaya, awalo uyoojaigwa. 13Pele kuti naa taamuyubilila, nkabela cacitika buyo muntenda, inga ulakonzya kutijila kubusena mbwetikamusalile kuti akafutulwe. 14Pele kuti muntu wanyema akujaya mweenzinyina acaali, muleelede kumugwisya kucipaililo cangu kutegwa akajaigwe.

15“Kufumbwa uutikaume wisi nibaba banyina uyoojaigwa.

16“Kufumbwa ooyo uutikatole umwi muntu cakumuvumpa nikuba kuyoomuuzya, naa kuyoomuvuba, uyoojaigwa.

17“Kufumbwa ooyo uutikasinganye wisi nibaba banyina uyoojaigwa.

18“Kuti naa bantu balwana, nkabela umwi wauma mweenzinyina abbwe naa antuku, pele katamujayi inga takooyoopegwa cisubulo pe. Kuti ooyo ngwaakauma walala, 19pele kwamana walimvwa kabotu, nikuba kuti kaya busunkuta akasako ooyo wakamuuma uyoobbadela akaambo kakumusowela ciindi cakwe mukuciswa, alimwi uleelede kunoomubamba mane kusikila akapone.

20“Kuti naa muntu wauma muzike wakwe mwaalumi naa mukaintu acisamu kuti muzike ooyo wafwa mpoonya aawo, ooyo muntu weelede kusubulwa. 21Pele kuti muzike ooyo wapona kwabuzuba bomwe naa obilo inga simalelo wakwe takooyoopegwa cisubulo, nkaambo muzike muntu wakwe ngwavubide.

22“Kuti naa bantu mukulwana bacisilizya mukaintu uuminsi kwamana wasowa, pele walo lwakwe mwini tafwi, ooyo muntu wamucisa uyoobbadela mali kufumbwa mwaalumi wamukaintu ooyo ngatikayande, aatikazuminwe ababetesi. 23Pele kuti naa mukaintu ooyo wacisigwa kapati, eelyo cakulunga ciyooba buumi kubuuminyina, 24liso alisonyina, lino alinonyina, janza ajanzanyina, cituta acitutanyina, 25buya abuyanyina, cilonda acilondanyina, cicuzu acicuzunyina.

26“Kuti naa muntu wauma muzike wakwe mwaalumi naa mukaintu aliso akulidonkola, uyoomwaangununa muzike ooyo kuzwa mubuzike bwakwe kuti kube nkokulungila liso eelyo. 27Alimwi kuti naa wamukula lino, inga uyoomwaangununa kuzwa mubuzike bwakwe kuti kube nkokulungila lino eelyo.

Twaambo twabalaazintu

28“Kuti naa musune wayasa mwaalumi naa mukaintu, akumujaya, musune ooyo uyoojaigwa amabwe, nkabela takooyooligwa pe, pele mukamwini musune ooyo takooyoopegwa cisubulo. 29Pele kuti naa musune ooyo ncecilengwa cakwe cakuluma bantu, alimwi naa ooyo mukamwini musune wakalaambilidwe kale zicita musune wakwe, pele wakamulekelela buyo akutamujalila, kwamana wajaya mwaalumi naa mukaintu, musune uyoojaigwa amabwe, nkabela awalo mukamwini musune uyoojaigwa. 30Pele kuti waambilwa mweelwe wakubbadela kuti afutule buumi bwakwe, uleelede kubbadela mweelwe oonse uuyandika mukuti afutule buumi bwakwe. 31Kuti naa musune wayasa mwana mulombe naa musimbi akumujaya, mulawo ngoonya ooyu nguubeleka. 32Kuti naa musune wayasa muzike mwaalumi naa mukaintu akumujaya, mukamwini musune uyoobbadela mukamwini muzike mali aansiliva aali makumi otatwe, alimwi amusune uyoojaigwa amabwe.

33“Kuti naa muntu wasiya mulindi bukwazi, nikuba kuti muntu wakasya mulindi akuusiya buyo kuutavwikilidwe, nkabela musune niiba mbongolo yawida mukati, 34uyoobbadela mali kuli yooyo uuli aamunyama, pele munyama ooyo wafwa uyoomutola kuba wakwe. 35Kuti naa wajaya musune wamuntu uumbi, aabo bantu bobilo bali aabasune balamuuzya ooyo muumi akwaabana mali aamuulo wakwe, alimwi bayooabana anyama yamusune ooyo wafwa. 36Pele kuti naa calizizilwe kuti musune ooyo uli acilengwa cakuyasa basunenyina, kwamana mukamwini tamujalili uleelede kubbadela akupa musune muumi kuli ooyo muntu uuli aamusune wafwa, lino nyama yamusune wafwa iyooba yayooyo wabbadela.

Currently Selected:

Kulonga 21: Tonga96

Highlight

Compare

Copy