Kulonga 24
24
Cizuminano mbucakayumizigwa
1Lino Mwami Leza wakaambila Mozesi kuti, “Koboola kulindime, utante acilundu yebo, Aloni, Nadabu, a Abihu, alimwi abasololi ba Baisilayeli bali makumi aali ciloba, kamucili alaale muzookotame akukomba. 2Pele yebo Mozesi olikke nduwe uuzooswena aafwiifwi andime. Aaba bamwi tabakoozoosika aafwiifwi, alimwi abantu buyo bamwi batakabooli ayebo mucilundu pe.”
3Nkabela Mozesi wakabweeda, waakubaambila bantu malailile oonse amilawo yoonse ya Mwami Leza. Nkaako bantu boonse bakavutukila aamwi akuti, “Tulacita zyoonse nzyaamba Mwami Leza.” 4Mpoonya Mozesi wakaalemba oonse malailile aa Mwami Leza. Lino buce buyo cifumo-fumo, wakayaka cipaililo munsi acilundu eeco, wakaimika mabwe aali kkumi aabili aaiminina misyobo ya Baisilayeli iili kkumi aibili. 5Mpoonya wakatuma Baisilayeli bakubusi kuyoopa zipaizyo zyakutenta, alimwi mbabonya aabo bakajaya bapoho bacipaizyo calumvwano ku Mwami Leza. 6Mozesi wakabikka cisela cabulowa cimwi cakasyaala mumitiba, cimwi wakacisansaila acipaililo. 7Mpoonya wakabweza bbuku lyacizuminano, wakalibala cakupozomoka kubantu, bantu bakati, “Tuyoozicita zyoonse Mwami Leza nzyaalailila, alimwi tuyoomuswiilila.”
8Mpoonya Mozesi wakabweza bulowa oobo bwakali mumitiba, wakabusansaila bantu. Wakati, “Oobu bulowa mbobuyumya cizuminano eeco Mwami Leza ncaakapanga andinywe naakamupa malailile aaya oonse.”
9Lino Mozesi, Aloni, Nadabu, a Abihu, abasololi ba Baisilayeli bali makumi aali ciloba bakatanta acilundu 10kuyoobona Leza wa Baisilayeli. Nkabela kumbali aazituta zyakwe kwakali cintu cakali kulangika mbuli mabwe aacijulu-julu, aayalidwe, amweka mbuli julu. 11Aaba basololi ba Baisilayeli taakwe nibakanyonyoonwa pe. Bakabona Leza, alimwi bakalya akunywa.
Mozesi mbwakatanta atala aacilundu ca Sinai
12Lino Mwami Leza wakati kuli Mozesi, “Tanta acilundu, uboole kuno kulindime uzookkale nkuko. Ndizookupe zilembelo zyamabwe zijisi milawo amalailile ngendakalemba aakulailila bantu.” 13Eelyo Mozesi wakalibambila, antoomwe amubelesi wakwe Josyuwa, nkabela bakaya acilundu ca Leza. 14Mozesi wakaambila basololi kuti, “Amutulindile aano mane tukaboole. Twamusiya kuli Aloni a Hula, kufumbwa uujisi matongoosi, aaatole kulimbabo.”
15Mpawo Mozesi wakatanta acilundu, nkabela kkumbi lyakavumba. 16Bulemu bwa Mwami Leza bwakasika acilundu ca Sinai, kkumbi eelyo lyakalicivumbide cilundu kwamazuba aali cisambomwe. Lino mubuzuba bwaciloba, Mwami Leza wakaita Mozesi kuzwida mukkumbi. 17Ku Baisilayeli bulemu oobo bwa Mwami Leza bwakali kulangika mbuli kuti mulilo uuyaka atala acilundu. 18Nkabela Mozesi wakanjila oomo mukkumbi, watanta atala acilundu. Oomo wakaakukkala mazuba amasiku aali makumi one.
Currently Selected:
Kulonga 24: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
