Kulonga 35
35
Milawo yabuzuba bwa Sabata
1Lino Mozesi wakabunganya buleya boonse bwa Baisilayeli antoomwe, akuti kulimbabo, “Mboobu mbwaamulailila Mwami Leza kuti mucite. 2Muyoobeleka milimo yanu kwamazuba aali cisambomwe, pele buzuba bwaciloba buyooba buzuba busalala kulindinywe, mbuzuba bwakulyookezya bupedwe ku Mwami Leza cakumaninina. Kufumbwa muntu uyoocita mulimo mulimbubo uleelede kujaigwa. 3Alimwi tamweelede akukutula mulilo mumaanda aanu mubuzuba bwa Sabata.”
Mulumbo watente lya Leza
(Kulonga 25.1-9)
4Lino Mozesi wakaambila Baisilayeli boonse, kuti “Mboobu Mwami Leza mbwaalailila. 5Muleelede kupa mulumbo ku Mwami Leza. Woonse uuyanda weelede kupa mulumbo wangolida, nsiliva amukuba, 6masani acijulu-julu, aacisombo aasalala pyu, alimwi amasani aandeketela, aaboya bwampongo, 7zikutu zyabagutu zyakanyikwa mucisila, zikutu zyakasukwa kabotu, mapulanga aamulombe, 8mungwimba wamumalambe, tununkilizyo twamafuta aakunana atwakuumpilila, 9mabwe amakwalala aacibize, amabwe meebesi aakubikka akasani kaacamba kabupaizi.”
Zintu zyamutente lyakukkalila
(Kulonga 39.32-43)
10“Lino boonse bantu basibuuya mukati kanu baleelede kuboola akuzoocita zintu zyoonse eezyo Mwami Leza nzyaakalailila, 11nkokuti tente lya Leza, aciluli calyo, acivunisyo calyo, angobyoobyo zyalyo, azicinda zyalyo, azipinzyo zyalyo, amisemo yalyo, alimwi aziimino zyalyo, 12bbokesi lyacizuminano, atukulisyo twalyo, civunisyo calyo, asani lyacisitilizyo, 13tebule atukulisyo twalyo, azibelesyo zyalyo, acinkwa cituulwa ku Mwami Leza, 14cikkazikilo calambe lyakupa mumuni azyakubelesya zyaco, amalambe aaco, amingwimba yamalambe, 15cipaililo cakutentela tununkilizyo, atukulisyo twaco, mafuta aakunana, tununkilizyo tubotu, asani lyakucingilizya lyaamulyango watente lya Leza, 16cipaililo cazipaizyo zyakutenta, cijisi ambaula zyamukuba, tukulisyo twalyo alimwi azibelesyo zyalyo zyoonse, amutiba wakusambila, atako lyawo, 17masani aakusitilizya bbuwa amisemo, alimwi aziimino zyawo, sani lyakusitilizya kumulyango wabbuwa, 18nembe zyatente lya Leza, anembe zyabbuwa zyazyo, 19azisani zibotu zyamulimo wabupaizi mubusena busalala, zisani zisalala zyamupaizi Aloni, abana bakwe nobacita mulimo wabo wabupaizi.”
Bantu mbubakaleta mulumbo
20Mpawo Baisilayeli boonse bakasiya Mozesi, 21lino umwi aumwi mbwaakali kulimvwa wakaleta mulumbo ku Mwami Leza wakuyasya tente lyakuswaanganina, azintu zimwi zyoonse zyakali kuyandika mumilimo, azyakulusya zisani zisalala. 22Baalumi abakaintu bakaza, boonse bakali kuyanda bakaleta mpande zyakubotya, tunkwinta-nkwinta, nweenwe, tuwenge, amisyobo iindene-indene yatulisakatizyo twangolida, akuzipa ku Mwami Leza. 23Kufumbwa muntu wakajisi mulembo wacijulu-julu wacisombo alimwi ausalala pyu atutali toosedwe kabotu, naa boya bwampongo, zikutu zyabagutu zyakanyikwa mucisila naa zikutu zyakasukwa kabotu wakaleta kufumbwa ncaakajisi, 24boonse bakali kukonzya kupa nsiliva naa mukuba bakazipa ku Mwami Leza, abaabo boonse bakajisi mapulanga aamulombe aakali kukonzya kubelesegwa mukuyasya bakaaleta. 25Abalo bakaintu bauya bakali kuluka milembo yacijulu-julu, yacisombo alimwi aisalala pyu atutali toosedwe kabotu, bamane bakaileta. 26Alimwi boonse bakaintu bakali bauya alimwi bakali kukonzya bakaluka zyaboya bwampongo. 27Abalo basololi bakaleta mabwe aamakwalala aacibize meebesi aakukabaki kubupaizi alimwi aakasani kaacamba, 28tununkilizyo, mungwimba wamumalambe, atununkilizyo twamafuta aakunana atwakuumpilila. 29Boonse baalumi abakaintu Baisilayeli aabo bakali kukonzya kupa mulumbo wakuliyandila ooyu Mwami Leza ngwaakalailila kwiindila muli Mozesi bakacita oobo.
Babelesi bamutente
(Kulonga 31.1-11)
30Lino Mozesi wakati ku Baisilayeli, “Mwami Leza wasala Bezaleli mwana wa Uli, mwanaa Hula, wamusyobo wa Juda. 31Wamuzuzya a Muuya wa Leza kutegwa abe amaanu, busongo abuuya, alimwi aluzibo mumilimo yoonse yamaanza, 32kuti akonzye kucita zintu zyeebeka akuzibumba angolida, nsiliva, alimwi amukuba, 33kubeza mabwe meebesi kusyomaika, kubeza zisamu, akucita milimo imwi yeebeka mibotu. 34Nkabela kulinguwe alimwi akuli Oholiyabu mwana wa Ahisamaki wamusyobo wa Dani, Mwami Leza wapa maanu aakukonzya kwiisya. 35Wapa maanu manji aakucita milimo yoonse yamaanza, mbuli kuluka, kucekaula milembo iiindene-indene yacijulu-julu, yacisombo alimwi aisalala pyu atutali toosedwe kabotu.”
Currently Selected:
Kulonga 35: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
