Kulonga 36

1“Bezaleli a Oholiyabu alimwi abantu boonse bakonzya kucita milimo yamaanza, aabo Mwami Leza mbapede busongo abuuya, bazi mbokucitwa zintu zyoonse ziyandika mukuyaka tente lya Leza, baleelede kucita mbuli mbwaakalailila Mwami Leza.”

Bantu mbubakaleta zipego zinji

2Lino Mozesi wakaita Bezaleli, a Oholiyabu, alimwi abaalumi boonse bauya, aabo Mwami Leza mbaakapede busongo bwakucita milimo, abamwi boonse bakalibambilide kugwasya. 3Mpoonya Mozesi wakabapa zipego eezyo Baisilayeli nzibakaleta mukulimvwa zyakuyasya tente lya Leza. Baisilayeli bakali kuleta kuli Mozesi mulumbo wabo lyoonse cifumo-fumo. 4Mpoonya aabo bauya bakali kubeleka milimo yatente lya Leza yoonse, bakaleka milimo yabo yaandeene, bakasika 5akuti kuli Mozesi, “Bantu baleta kunji kwiinda mbuli kooko kuyandika mumulimo ooyo Leza ngwaakalailila kuti ucitwe.”

6Aboobo Mozesi wakabalailila boonse kuti, “Taakwe mwaalumi naba mukaintu uuceelede kuleta mulumbo watente.” Mbombubo oobu bantu mbwaakabalesya kuleta, 7nkaambo mulumbo ngobakaleta wakaindilila mumweelwe wazintu zyakali kuyandika kumanizya mulimo woonse.

Kuyaka tente lyakukkalila Mwami Leza

(Kulonga 26.1-37)

8Lino bantu bakali bauya bakayaka tente amasani aandeketela aali kkumi akalukidwe kabotu atutali toosedwe twacijulu-julu, atwacisombo alimwi atusalala pyu. Nkabela masani aaya akalukwa kabotu akubikkwa zikozyanyo zyobilo zyabakelibu. 9Isani limwi alimwi kalilampa tukokola tuli makumi obilo alusele, bwamba bwa tukokola tone, oonse buyo mbubonya. 10Osanwe aamasani aaya akasumwa cakwaalumikanya, lino aalo aayo amwi osanwe akasumwa mbubonya oobo. 11Bakasuma amikosi yatusani twamusyobo wacijulu-julu kumoombe wasani lyaanze, alimwi akumasani aakalumikizigwa aamwi. 12Kusani lyaatala lyacibeela camasani aakalumizigwa aamwi bakabikka mikosi yatusani iili makumi osanwe nkabela kucibeela cabili casani bakabikka mikosi kusani lyeelezya kutegwa mikosi eeyo kiilangene. 13Alimwi bakacita tungobyoobyo twangolida tuli makumi osanwe, twakaba twakuswaanganya zibeela zyamasani zyobilo eezyo, nkaako tente lyakaba lyomwe.

14Kumane bakaluka masani aaboya bwampongo aali kkumi kuti abe civumbyo catala aatente eelyo. Masani aali kkumi alimwi ngobakaluka. 15Alimwi sani lyakali kulampa tukokola tuli makumi otatwe, mubwamba lyakali kulampa tukokola tone, oonse akaleelene. 16Osanwe bakaasuma cakwaalumikanya kuti abe cibeela comwe, aalo amwi aali cisambomwe bakaalumikanya aamwi mucibeela comwe. 17Bakasuma mikosi iili makumi osanwe kumoombe wasani lyeelezya lyacibeela citaanzi, alimwi bakasuma mikosi iili makumi osanwe kumoombe wamasani aacibeela cimwi. 18Bakavunga tungobyoobyo twamukuba tuli makumi osanwe twakuswaanya zibeela zyobilo kuti zibe civumbyo comwe. 19Bakapanga zyakuvumbya tente zyobilo cimwi camakutu aabagutu cakanyikwa mucisila, alimwi acimwi camakutu aampongo.

20Eelyo bakapanga zicinda zyamulombe. 21Lino cicinda comwe-comwe kacilampa tukokola tuli kkumi, mubwamba cakalikakokola acisela. 22Cibeela comwe-comwe cakaliswaangene muziga zyobilo mumbali kutegwa zicinda eezyo zikonzye kulumizigwa aamwi. Nkabela zicinda zyatente zyakajisi ziga zyakalumizigwa aamwi. 23Bakabeza zicinda zili makumi obilo zyakulubazu lwakumusanza, 24eelyo wakazibikkila ziimino zyansiliva zili makumi one, eezi ziimino zyakujatilizya ziga eezyo zyobilo zyakuswaanganya zicinda. 25Akwalo kulubazu lwakunyika lyatente bakabikka zicinda zili makumi obilo. 26Bakabikka ziimino zyansiliva zili makumi one, zyakakkala zibili-zibili kunsi aacicinda comwe-comwe. 27Kusule lyatente, kumbo, bakabeza akubikka zicinda zili cisambomwe, 28alimwi bakabikka zicinda zyobilo muzyooko kusule aatente. 29Eezi zicinda zyamuzyooko zyakalijatene kunsi. Mbombubo oobu mbuzyakacitwa zicinda zyobilo eezyo, alimwi zyakalilumene kuzwida ansi mane kuyoosika kumubalo wakujulu. Zyakacita boobo eezyo zicinda zyobilo aazibeela eezyo zicita zyooko zyobilo. 30Aboobo kwakali zibeela zili lusele zyakajisi ziimino zili kkumi acisambomwe zyansiliva, zyakali zibili-zibili kunsi lyacibeela comwe-comwe.

31Kumane bakacita minkulu yamulombe akwiinganya, yosanwe yakali kulubazu lomwe lwatente, 32alimwi yosanwe yakali kulubazu lumwi, alimwi aimbi yosanwe yakali kulubazu lweelezya kumbo kusule. 33Munkulu waakati-kati wakaliingene kuzwa kulubazu lumwi kusikila kuli lumwi. 34Lino zicinda eezyo bakazizilulula angolida akwiibikka tuninga twangolida twakujatilizya minkulu yakwiinganya. Ayalo minkulu eeyo bakiizilulula angolida.

35Bakasuma sani lyacisitilizyo bakalisuma andeketela yamusyobo wacijulu-julu, awacisombo, alimwi abutonje busalala. Sani eeli lyakacekawidwe azikozyanyo zyabakelibu. 36Bakabikka zisamu zyamulombe zyone zizilulwidwe angolida, zyakajisi angobyoobyo zyangolida kazisimpidwe muziimino zyone zyansiliva zyakujatilizya zicinda eezyo. 37Lino kumulyango watente bakabikka sani lyakusitilizya lyandeketela lyamusyobo wacijulu-julu, awacisombo, alimwi ausalala pyu atutali toosedwe kabotu, akucekaulwa kabotu. 38Sani eeli bakalisimpila zisamu zyamulombe zyosanwe zizilulwidwe ngolida. Bakazibikka ngobyoobyo zyangolida alimwi akubikka ziimino zyosanwe zyamukuba.

Currently Selected:

Kulonga 36: Tonga96

Highlight

Compare

Copy