Matalikilo 17

Kupalulwa ncitondezyo cacizuminano

1Lino Abulamu naakali aamyaka iili makumi aali fuka afuka Mwami Leza wakasika kulinguwe akuti, “Ndime Leza Singuzuzyoonse. Kondiswiilila mazuba aabuumi bwako boonse, ube muntu uulondokede. 2Ndiyoopanga cizuminano ayebo alimwi ndiyoovuzya lunyungu lwako.” 3Eelyo Abulamu wakavuntama, mpoonya Leza wakati kulinguwe, 4“Eeci ncecizuminano ncetibambe anduwe, ndakusyomezya kuti uyooba wisi wamisyobo minji. 5Kuzwa lino tocitegwa Abulamu pe, unootegwa Abulahamu nkaambo ndakucita kuti ube wisi wamisyobo minji. 6Ndiyookupa bana banji, alimwi bamwi babo bayooba bami bazisi. Bana bako bayoovula cakuti bayooba misyobo minji.”

7Mwami Leza wakaindilizya akuti, “Ndiyoobamba cizuminano cangu eeci kulinduwe akubana bako mumazyalani aabo oonse aaciboola, kuti cikabe cizuminano citakooyoomana. Ndiyooba Leza wako a Leza walunyungu lwako. 8Nyika eeyi, oomo moli mweenzu sunu, ndiyooipa kulinduwe akubana balunyungu lwako. Nyika yoonse eeyi ya Kenani iyooba yako akutamani, ambebo ndiyooba Leza wabantu bako.”

9Alimwi Leza wakati kuli Abulahamu, “Ayebo uleelede kubamba cizuminano eeci andime, yebo antoomwe abana balunyungu lwako mumazyalani aaciboola kumbele. 10Mboobu mbotweelede kuzuminana ayebo alimwi abana balunyungu lwako. Kufumbwa mwana mulombe akati kanu uleelede kupalulwa. 11Kuzwa lino muleelede kuti kamupalulwa kuti cibe citondezyo cacizuminano akati kanu andime. 12Kufumbwa mwana mulombe waba aamazuba aali lusele antoomwe abazike bazyalilwa muminzi yanu, nibaba baulwa kuzwa kumasi aambi, baleelede kupalulwa mbubonya buyo. 13Umwi aumwi mwana mulombe uleelede kupalulwa kuti cibe citondezyo amibili yanu cakuti cizuminano cangu ciyooba cizuminano citamani. 14Kufumbwa mwaalumi uutapalulwi uyoogwisigwa akati kabantu bakwe, nkaambo taakwe naabamba cizuminano eeci andime.”

15Alimwi Leza wakati kuli Abulahamu, “Mukaintu wako tocinoomwiiti limbi kuti Salayi, kuzwa lino unootegwa Sala. 16Ndiyoomuleleka, alimwi yebo ndiyookupa mwana mulombe uutikazyalwe amukaintu wako Sala. Ndiyoomuleleka Sala, uyooba banyina wamisyobo minji. Kuzwa kulunyungu lwakwe kuyooba bami bazisi.” 17Nkabela Abulahamu wakavuntama, watalika kuseka, naakayeeya kuti, “Ino inga muntu mudaala mbuli ndime, uujisi myaka iili mwaanda inga wakonzya buti kuzyala mwana? Sena ncobeni Sala mubucembele bwakwe bwamyaka iili makumi aali fuka inga wazyala mwana?” 18Mpoonya wakati kuli Leza, “Ndijisi kale mwana mulombe Isyimayeli.”

19Pele Leza wakati kuli Abulahamu, “Peepe, mukaintu wako Sala nguutikakuzyalile mwana mulombe ngotikaulike kuti Izaka. Ngonguwe ooyo alunyungu lwakwe, ngwenjoobamba cizuminano cangu citamani. 20Lino kumakani aa Isyimayeli, nceeci nceticite. Ndiyoomuleleka akumupa bana banji. Uyooba wisi bami bapati bali kkumi ababili, alimwi lunyungu lwakwe ndiyoolucita musyobo mupati. 21Pele cizuminano cangu ndiyoocibamba mumwanaako Izaka ooyo uutikazyalwe kumukaintu wako Sala muciindi nciconya cino mwakali.” 22Leza amane buyo kwaambaula a Abulahamu, wakamusiya. 23Lino mubuzuba mbubonya oobo, Abulahamu wakapalula mwanaakwe Isyimayeli alimwi abazike bakwe boonse, aabo bakazyalilwa mumunzi wakwe abaabo mbaakaulide, boonse bana balombe bamuŋanda yakwe, mbubonya mbuli Leza mbwaakamwaambila.

24Ciindi eeci Abulahamu wakali aamyaka iili makumi aali fuka afuka naakapalulwa. 25Mwanaakwe Isyimayeli wakali aamyaka iili kkumi aitatu ciindi naakapalulwa. 26Boonse bobilo bakapalulwa buzuba bomwe, 27antoomwe abazike bakwe boonse aabo bakazyalilwa mumunzi wakwe, abaabo mbaakaulide amali kuzwa kuli bamasi.

Currently Selected:

Matalikilo 17: Tonga96

Highlight

Copy