Matalikilo 18
18
Kuzyalwa kwa Izaka mbokwakasyomezegwa alimwi
1Lino Mwami Leza wakalibonya kuli Abulahamu naakayakide kumibanga yaku Mamule. Abulahamu wakalikkede amulyango watente lyakwe ciindi zuba nolitwa mwaaba. 2Naakalanga, wakabona bantu botatwe baliimvwi. Mbwaakababonena buyo, wakabazuzaanina, wavuntama. 3Mpoonya wakati kulimbabo, “Nobaalumi balemenede, amundifwide luzyalo, mutaindilili pe. 4Amuleke mweetele maanzi kuti musambe kumaulu, amulyookezye munsi aamusamu ooyu. 5Ndiyanda kumupa cakulya, mulye kuti mweende kabotu musinzo wanu. Mbumwasika aŋanda yangu, ndileelede kuti ndimukutaukile.” Balo bakamwiingula kuti, “Mbubo ncibotu, kocita mbuli mbooamba.”
6Mpoonya Abulahamu wakafwambaana kunjila mutente lyakwe akwaambila Sala kuti, “Fwambaana, uzuzye tunsangwa totatwe twabusu bunante, ubukande kabotu, wamana ukange cinkwa.” 7Walo lwakwe wakazuzaanina kubutanga bwaŋombe, waakusala moombe muniini uuneneede, waambila mubelesi wakwe kuti amubambe -bambe cakufwambaana. 8Wakabapa mabisi aabwanda, mukupa anyama. Kabalya, wakaliimvwi ambali ambabo mucimvule camusamu.
9Beenzu bakamubuzya kuti, “Ino Sala mukaintu wako uli kuli?” Wakabaingula kuti, “Mwali mutente.” 10Lino Mwami Leza wakati, “Masimpe mwakali ciindi nciconya cino mukaintu wako Sala uyoozyala mwana mulombe mbubonya mbuli mbwindakasyomezya liya.” Sala wakaliswiilide, nkaambo wakakkede kusule acitendele.
11Abulahamu a Sala bakalicembeede kapati cakuti Sala taakalikukonzya kuzyala. 12Aboobo Sala wakaseka alikke akwaamba kuti, “Obuya mebo mbundacembaala kale, sena inga ndazyala bana? Sena ndicilangilwa kulikkomanisya obuno mbwendaba? Alimwi kunze aboobo mulumaangu awalo waba mudaala.” 13Mwami Leza wakabuzya Abulahamu kuti, “Ino nkaambo nzi Sala ncaseka akwaamba kuti, ‘Sena ncobeni inga mebo ndazyala mwana obuno mbwendakomena?’ 14Sena ku Mwami Leza kuli cintu ciyumu citakonzeki kucitwa? Bona, muciindi ceelede, njoocita ncobeni ncindakasyomezya, eelyo Sala uyoozyala mwana mulombe.” 15Lino akaambo kakuti Sala wakaliyoowede, wakatama, wati, “Peepe, nsiindaseka pe.” Pele Mwami Leza wakati, “Iiyi waseka.”
Abulahamu mbwaakakombelezezya Sodomu
16Mpoonya aabo bantu bakanyamuka batozya nzila yakali kuya ku Sodomu. Abulahamu wakabasindikila kubagwisya amunzi wakwe. 17Lino Mwami Leza wakalyaambauzya lwakwe wakati, “Nsyeelede kusisa Abulahamu cintu eeco ncenjoocita, 18nkaambo lunyungu lwakwe luyooba musyobo mupati uulaanguzu, alimwi misyobo yoonse yaansi iyoolelekwa kwiindila mulinguwe. 19Ndakamusala kuti akalailile bana bakwe balombe alimwi amukwasyi wakwe uuciboola kuti bakaswiilile milawo yangu kwiindila mukucita cibotu ciluzi. Alimwi ndiyoomucitila zyoonse nzendakasyomezya.” 20Mpoonya Mwami Leza wakati, “Minzi ya Sodomu a Gomola ilaampuwo mbi iiyoosya, alimwi zinyonyoono zyayo nzipati. 21Ncendainkila ono nkuti ndikabone naa milandu eeyi iili kasimpe, eelyo netikazibe cakucita.”
22Bantu aabo bakainka balulama ku Sodomu, walo Mwami Leza wakasyaala a Abulahamu. 23Abulahamu wakaswena aafwiifwi a Mwami Leza akumubuzya kuti, “Sena ncobeni inga uyoojailizya bantu batajisi mulandu? 24Ino kuti waakujana kuli bantu bali makumi osanwe baluleme mumunzi, sena inga tokooyooleka kuujaya munzi mukuti ufutule aabo bantu bali makumi osanwe? 25Kwalo ndilimasimpe kuti inga tokooyoobajailizya bantu batakwe mulandu antoomwe abaabo basimilandu. Eeco inga tacikonzeki pe! Tokonzyi kucita cili boobo. Kuti naa wacita boobo nkokuti inga abalo batakwe mulandu wabasubula mbubonya mbuli aabo basizibi. Nkabela eeco cili boobo tacikonzeki pe. Mwati inga mubetesi wanyika yoonse wacita boobo?”
26Lino Mwami Leza wakaingula kuti, “Kuti naa ndikajane bantu baluleme bali makumi osanwe mu Sodomu, nsikooyoonyonyoona munzi oonse ooyo akaambo kabantu aabo bali makumi osanwe.”
27Abulahamu wakaamba alimwi wakati, “Akaka kondilekelela, simalelo wangu, nkaambo ime ndili muntu buyo, nsyeelede kwaamba cintu niciba comwe kulinduwe. 28Pele, ino kuti kabali buyo bantu bali makumi one abasanu baluleme, mubusena bwabantu bali makumi osanwe, sena uyoonyonyoona munzi akaambo kabantu bosanwe babulila?” Mwami Leza wakaingula kuti, “Inga nsikooyoonyonyoona munzi kuti naa ndajana bantu bali makumi one abasanu.”
29Abulahamu wakaamba alimwi kuti, “Ino kuti wajana bantu baluleme bali makumi one buyo?” Mwami Leza wakaingula kuti, “Pe, inga nsikooyoonyonyoona munzi kuti naa kakuli baluleme bali makumi one.”
30Nkabela Abulahamu wakaamba kuti, “Ndakomba, utandinyemeni, simalelo wangu ndikumbila kuti ndaambe alimwi. Ino mbuti kuti waakujana baluleme bali makumi otatwe buyo?” Mwami Leza wakati, “Pe, nsikooyoonyonyoona munzi kuti naa ndajana bantu bali makumi otatwe.”
31Alimwi Abulahamu wakati, “Akaka, Simalelo wangu, kocindilekela kuti nkecaamba kulinduwe. Ino kuti waakujana buyo bantu bali makumi obilo baluleme?” Mwami Leza wakati, “Nsikooyoonyonyoona munzi kuti naa ndajana baluleme bali makumi obilo.”
32Lino Abulahamu wakaamba kuti, “Utandikalalili, Simalelo wangu, ndaambe lomwe buyo alimwi. Ino mbuti kuti kwaakujanika bantu baluleme bali kkumi buyo?” Mwami Leza wakati, “Inga nsikooyoounyonyoona munzi kuti naa baluleme bali kkumi bajanika mulinguwo.” 33Naakamanizya kwaambaula a Abulahamu, Mwami Leza wakainka, awalo Abulahamu wakapilukila kumunzi wakwe.
Currently Selected:
Matalikilo 18: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
