Matalikilo 40

Josefa mbwaakapandulula ziloto zyabasintolongonyina

1Ciindi cimwi musule aakooku, bamwi babelesi ba mwami waku Ijipiti, bakamubisizya simalelo wabo. Mwabaaba umwi wakali mupati wabasikujika umwi ooyu wakali mupati wabasikutola zyakunywa zya mwami. 2Falo wakabanyemena babelesi bakwe aaba bobilo, mupati wabasikutola zyakunywa amupati wabasikujika, 3eelyo wakababikka muntolongo mumaanza aamulangi mupati, mubusena mumonya mwakaangidwe Josefa. 4Mulangi mupati wakabikka Josefa kuti abe nguubalanga abalo aaba. Bakakkala mazuba manji muntolongo.

5Bumwi busiku kabali muntolongo, aaba babelesi ba Falo bobilo bakalota. Umwi aumwi wabo wakalota ciloto cakwe mwini cakajisi bupanduluzi bwaco cilikke. 6Lino Josefa naakabonana ambabo cifumo-fumo, wakabona kuti balipengede mumyoyo. 7Eelyo wakababuzya kuti, “Ino nkaambo nzi ncomuuside sunu?” 8Bakamwiingula kuti, “Twalota, pele kuno kunyina uukonzya kupandulula ziloto eezyo pe.” Amvwe boobo Josefa wakati, “Leza nguunga wapandulula ziloto, amundaambile nzimwalota.”

9Lino mupati wabasikutola zyakunywa wakaamba ciloto cakwe wati, “Mebo muciloto cangu kwali cisiko camusaansa, camenede kumbele lyangu, 10cajisi mitabi yotatwe. Mpoonya mbucasonsela buyo matu, cafulula maluba-luba, ndilyonya amicelo yatalika kubizwa. 11Lino mujanza lyangu ndajisi nkomeki ya Falo, aboobo ndacela nsaansa eezyo akuzisininina munkomeki mane ndamupa Falo kuti anywe.” 12Aawo Josefa wakati, “Mboobu mbocaamba. Mitabi yotatwe yaamba mazuba otatwe. 13Kwamana buyo mazuba otatwe Falo uyookugwisya muntolongo, alimwi uyookulekelela mulandu wako, unooyoomupa nkomeki mbubonya mbuli mbookali kumubelekela kotana jana mapenzi aaya. 14Pele ukandiyeeye mebo zintu zyaakukweendela kabotu, akaka ukandaambilile ambebo kuli Falo, kuti ndizoogwisigwe muntolongo. 15Mebo ndakabbigwa akugwisigwa munyika ya Bahibulu, akwalo okuno taakwe acomwe ncondakacita kuti ndibikkwe muntolongo.”

16Lino awalo mupati wabasikujika naakabona kuti ciloto camweenzinyina capandululwa kabotu, wakati kuli Josefa, “Ambebo nceeci ciloto ncendalota. Ndayumwide nsuwo zyotatwe zyazinkwa amutwe, 17nkabela mucisuwo cali atala aansuwonyina mwali misyobo yoonse yazilyo zikange zya Falo. Pele bayuni bali kuzilya.” 18Josefa wakaingula kuti, “Nkooku kupandulula kwaco. Nsuwo zyotatwe zyaamba mazuba otatwe. 19Kwamana buyo mazuba otatwe, Falo uzookugwisya akuyookukosola mutwe. Eelyo mubili wako uyoowaanzika mumusamu, nkaako bayuni bayoolya mutumba wako.”

20Lino oobo buzuba bwatatu bwakali mbobwakuzyalwa kwa Falo, aboobo wakacitila babelesi bakwe boonse pobwe pati. Mpoonya wakagwisya muntolongo mupati wabasikupa zyakunywa kuli Falo amupati wabasikujika. 21Lino mupati wabasikupa zyakunywa wakamubweedezya alimwi mumulimo wakwe, 22pele mupati wabasikujika wakamujaya. Kwakaba mbubonya mbuli Josefa mbwaakaambide mukupandulula ziloto zyabo. 23Pele mupati wabasikupa zyakunywa taakwe naakayeeya Josefa, wakamuluba.

Currently Selected:

Matalikilo 40: Tonga96

Highlight

Copy