Matalikilo 41

Josefa mbwaakapandulula ziloto zya Falo

1Nikwakamana myaka yobilo, Falo wakalota kuti wakaimvwi kumbali aamulonga wa Nailo, 2kumane kwakazwa mumulonga ŋombe zili ciloba zibotu, zineneede zyakatalika kucela matete. 3Kumane waawo kwakazwa zimbi ŋombe mumulonga zyakali ciloba, eezi zyakalikotede zibi. Zyakasika akuzooima kumbali aazeezyo zimwi ŋombe, kumbali ankomwe yamulonga. 4Lino eezyo ŋombe zyakakotede zyakalya eezyo zyakaneneede zili ciloba. Amane Falo wakasinsimuka. 5Alimwi wakoona akulota cimbi ciloto. Cisiko cajila lyomwe cakazyede makunka aali ciloba oonse akajisi nseke zibotu zibizidwe kabotu. 6Alimwi kwakazyalwa aambi aali ciloba aakanyanide akaandwa aluuwo lutontola lwakujwe. 7Nkabela aayo makunka aakanyanide akalya aayo mabotu aakatubide aakali ciloba. Amane Falo wakasinsimuka alimwi akuzoojana kuti walikulota buyo. 8Lino nibwakaca wakapenga kapati mumoyo, nkaako wakatuma akwiita baŋanga abaalumi basyaabusongo boonse bamu Ijipiti. Wakabaambila ziloto zyakwe, pele taakwe aomwe wakakonzya kumupandulwida pe.

9Mpoonya ooyo mupati wabasikupa zyakunywa kuli Falo wakaambila Falo wati, “Ndeelede kwaamba sunu kuti ndakalubizya. 10Yebo, omwami, wakatunyemena tobabelesi bako, nkabela mebo amupati wabasikujika wakatupa kumulangi mupati wantolongo. 11Lino busiku bumwi twakalota. Umwi aumwi wesu wakalota ciloto cakajisi bupanduluzi bwaco cini. 12Twakali kukkala amukubusi Muhibulu oomo, muzike wamulangi wa ŋanda yabwami, eelyo twakamwaambila ziloto zyesu. Walo wakatupandulwida, akwaambila umwi aumwi wesu ncecaamba ciloto cakwe. 13Lino ncobeni kwakaba mbubonya mbuli mbwaakatupandulwida. Mebo ndakabweedezegwa mumulimo wangu, pele mupati wabasikujika wakajaigwa.”

14Eelyo Falo wakatuma kuti aletwe Josefa kulinguwe, mpoonya bakafwambaana kuyoomuleta kuntolongo. Lino naakamana kulinyoola akusama zimbi zisani, wakasika kuli Falo. 15Falo wakaambila Josefa kuti, “Mebo ndalota ziloto, pele taakwe wakonzya kuzipandulula. Nkabela ndaambilwa kuti yebo naa wacimvwa ciloto, inga ulakonzya kucipandulula.” 16Pele Josefa wakaingula Falo kuti, “Nsili ndime pe! Leza nguukonzya kupandulwida Falo.” 17Mpoonya Falo wakati, “Ndalota kuti ndaliimvwi ankomwe yamulonga wa Nailo, 18nkabela mumulonga kwazwa ŋombe zili ciloba, zineneede alimwi zibotu, zyatalika kucela matete. 19Musule kwazwa zimbi ŋombe zili ciloba, zikotede kapati zibi, nzezibi kwiinda zyoonse ŋombe nzendakabona muno mucisi coonse ca Ijipiti. 20Lino eezyo zikotede zyalya zineneede. 21Nikuba nizyamana kuzilya boobo, tiizyalibonya kuti naa zyacita nzi pe, nkaambo zyacilikulangika kubija akukotela mbubonya mbuli mbozyabede kusaanguna. Ndimane ndasinsimuka. 22Alimwi ndoona akulota kuti ndabona cisiko cajila cazyala makunka aali ciloba aazwide nseke zitubide kabotu. 23Alimwi acisiko eeco nciconya kwasyuuka aambi makunka aali ciloba mabi, aanyanide aluuwo lwakujwe. 24Nkabela makunka aanyanide amena makunka aali ciloba mabotu aazwide nseke. Ndabaambila baŋanga ziloto eezi, pele taakwe wakonzya kundipandulwida pe.”

25Eelyo Josefa wakati kuli Falo, “Ziloto zyobilo eezi zyaamba cintu comwe buyo, Leza wayubunwida mwami eeco ncaticite. 26Ŋombe zineneede zili ciloba zyaamba myaka iili ciloba, aalo makunka aazwide nseke aamba myaka iili ciloba. Ziloto zijisi bupanduluzi bomwe buyo. 27Ŋombe zikotede zili ciloba zyazwa musule amakunka aanyanide caamba myaka iili ciloba yanzala. 28Cili mbubonya mbuli mbwendaambila Falo kale, Leza wamuyubunwida ncaticite. 29Kuyooba myaka iili ciloba yacewo munyika yoonse ya Ijipiti. 30Pele yaakumana myaka eeyo, kuyooba myaka iimbi iili ciloba yanzala mpati, nkabela yoonse myaka mibotu iyoolubwa mu Ijipiti, nzala iyoocijaya cisi. 31Ciindi cacewo ciyoolubwa, nkaambo eeyo nzala iiyootobela inooyoolunzya kasuko. 32Lino ciloto eeci ncicaindululwa o mwami, nkuti makani aaya alibambidwe a Leza, alimwi Leza uyoocita kuti akacitike ncobeni mumazuba aaboola.

33“Lino uleelede kusala muntu musongo, uucenjede, alimwi munkutwe nkabela umucite kuti abe ngomweendelezi wazintu zyoonse mu Ijipiti. 34Alimwi uleelede kubikka babelesi basikulanga zintu mucisi, eelyo kwamyaka eeyo iili ciloba yacewo, muleelede kunooyobola cipaanzi casanu cacilyo cinooyootebulwa. 35Baleelede kubeleka kwiindila munguzu zizwa kulinduwe akuyooyobola maila aakulya muminzi, alimwi kabayooalanga kubona kuti ayobwedwe kabotu. 36Cilyo eeco ciyooyobolwa ncakuti bantu bakalye ciindi camyaka iili ciloba yanzala iiyoosika mu Ijipiti, kutegwa bantu bamu Ijipiti batakafwi ciindi canzala mpati.”

Josefa mbwaakabikkwa kuti abe muleli wa Ijipiti

37Lino Falo abalupati-pati bakwe bakaazumina makani aakaamba Josefa. 38Mpoonya Falo wakaambila balupati-pati bakwe kuti, “Ino tulamujana kuli muntu uuli mbuli yooyu, uujisi muuya wa Leza mulinguwe?” 39Nkabela Falo wakati kuli Josefa, “Mbuli Leza mbwaakutondezya zyoonse eezi, taakwe uumbi muntu musongo uucenjede uuli mbuli nduwe. 40Ndilakubikka kuti ube nduwe uulanga cisi cangu, alimwi bantu boonse baleelede kuswiilila malailile aako. Mebo buyo ndime enooli mupati kwiinda nduwe akaambo kakuti ndili mwami.” 41Mpoonya Falo wakati kuli Josefa, “Bona, lino ndakubikka kuba mweendelezi wacisi coonse ca Ijipiti.” 42Eelyo Falo wakagwisya nweenwe kumunwe wakwe yakasimbidwe acidinto cabwami, wakiisekka kumunwe wa Josefa. Alimwi wakamusamika azisani zyeebeka, akumuyabika kawenge kangolida munsingo yakwe. 43Wakamutansika munkalaki yakwe yabili yabwami, alimwi mulindizi wa Falo wakali kuya boompolola kumbele lyankalaki ya Josefa kati, “Amumwiinzizye!” Mbombuboobu Josefa mbwaakabikkwa kuti abe mweendelezi wacisi coonse ca Ijipiti. 44Alimwi Falo wakaambila Josefa kuti, “Mebo lwangu nde Falo ndaamba kuti, cintu coonse ncootazumizya yebo, taakwe muntu mucisi coonse ca Ijipiti uunga wasola kulicitila mbuli mbwayeeya mwini.” 45Falo wakaulika Josefa kuti Zafenatipaneya. Wakamupa mukaintu uutegwa Asinati, mwanaa Potifela mupaizi waku Oni. Aboobo Josefa wakeendeenda cisi coonse ca Ijipiti.

46Ciindi eeco Josefa naakatalika kubelekela mwami waku Ijipiti, wakali aamyaka iili makumi otatwe, wakeendeenda mucisi coonse ca Ijipiti. 47Lino ciindi camyaka iili ciloba yacewo, bakalima kapati munyika yoonse. 48Nkabela Josefa wakayobolola zilyo zyoonse munyika ya Ijipiti kwaciindi camyaka iili ciloba yacewo akuzibikka muminzi. Mumunzi umwi aumwi mupati wakayobolola cakulya mumyuunda iizingulukide munzi ooyo. 49Wakayobolola cilyo cinji kapati cakuti mane cakali kulangika mbuli kuti musenga wakulwizi. Cakulya cakavula cakuti wakaleka akuceeleka nkaambo tiicakacili kweelekeka pe. 50Lino kiitanasika myaka yanzala mpati, Josefa wakalijisi kale bana balombe bobilo kuli Asinati, mwanaa Potifela mupaizi wamunzi wa Oni. 51Nkabela Josefa wakaamba kuti, “Leza wandicita kuti ndilube mapenzi aangu oonse akuti ndilube mukwasyi wataata.” Nkaako mwanaakwe mulombe wakusaanguna wakamuulika kuti Manase. 52Alimwi wakaamba kuti, “Leza wandipa bana munyika yamapenzi aangu.” Nkaako wakaulika mwanaakwe wabili kuti Efulemu.

53Lino myaka iili ciloba yacewo mucisi ca Ijipiti yakamana, 54eelyo kwakatalika ciindi camyaka iili ciloba yanzala mpati, mbubonya mbuli Josefa mbwaakaambide. Kwakali nzala mumasi amwi oonse, mucisi ca Ijipiti buyo mumwakali cilyo. 55Lino Baijipiti nibakatalika kubula cakulya bakalilila Falo kuti abajanine cilyo. Wakabaambila kuti, “Kamuya kuli Josefa alimwi mukacite coonse ncatikamwaambile.” 56Lino nzala niyakabbebba, Josefa wakaajalula matala oonse aacakulya akuuzizya Baijipiti. 57Bantu bakasika ku Ijipiti kuzwida munyika yoonse kuzooula cilyo kuli Josefa, nkaambo nzala yakali bbebbede kapati munyika yoonse.

Currently Selected:

Matalikilo 41: Tonga96

Highlight

Copy