Matalikilo 42

Banabokwabo Josefa mbobakaya ku Ijipiti kuyooula zilyo

1Lino Jakobo naakaziba kuti mu Ijipiti muli cilyo, wakaambila bana bakwe kuti, “Ino nkaambo nzi ncomulangana kumeso? 2Ndakamvwa kuti ku Ijipiti nkocili cilyo. Kamuya mukatuulile kutegwa nzala itatujayi.” 3Aboobo banabokwabo Josefa bali kkumi bakaya ku Ijipiti kuyooula cilyo. 4Pele Jakobo taakwe naakatuminizya a Benjamini, ooyo uuzyalwa da lyomwe a Josefa, nkaambo wakali kuyoowa kuti awalo inga wajaigwa.

5Bana ba Isilayeli bakainka abamwi bantu kuyooula cilyo ku Ijipiti nkaambo mu Kenani mwakali nzala amwalo. 6Josefa mukuti wakali mweendelezi wacisi ca Ijipiti, nguwakali kuuzya cilyo kubantu boonse bazwa muzisi zyaandeene-andeene. Nkabela banabokwabo bakasika akuzoomufugamina, bakotama. 7Lino Josefa naakabona banabokwabo wakabaziba, pele wakali kucita mbuli kuti tabazi pe. Wakaamba cabukali kulimbabo wati “Muzwidayi nywebo?” Balo bakamwiingula kuti, “Tuzwa ku Kenani, twaza kuti tuule cilyo.”

8Josefa wakaziba bapati bakwe, pele balo taakwe nibakamuziba. 9Lino Josefa wakaziyeeya ziloto nzyaakalota akaambo kabo, nkabela wakati, “Nywebo muli basikutwela, mwazida kuzoobona cisi cesu mocili citeteete.” 10Balo bakamwiingula kuti, “Peepe mwami, swebo tuli bazike bako bazida buyo kuzooula cilyo. 11Iswe toonse aano tuli bana bamuntu omwe. Tatuli basikutwela pe, tuli bantu basyomeka.” 12Pele Josefa wakazumanana akwaamba kuti, “Peepe! Mwazida kubona buteteete bwacisi mpobubede.” 13Balo bakati, “Swebo tobazike bako tuli babunyina bali kkumi ababili, bana bamuntu omwe uuzwa ku Kenani. Musyoonto wesu wasyaala ataata, alimwi umwi taciwo.” 14Josefa wakabaambila kuti, “Amubone, mwamvwa! Ncenciceeco ncindaambila kuti nywebo muli basikutwela. 15Lino mboobu mbomutisolwe. Ndakonkezya muzina lya Falo kuti tamukoobweeda pe, ccita mane ooyo musyoonto wanu akaboole kuno. 16Amutume umwi wanu kuti akamweete. Pele bamwi banu balasyaala kabali muntolongo mane kusikila tukajane bwini bwamakani aayo ngemwaamba. Kuti kwataba boobo inga ndakonkezya kuti Falo mbwali muumi nywebo muli basikutwela.” 17Eelyo ucimana buyo kwaamba boobo, wakabanjizya muntolongo kwamazuba otatwe.

18Lino mubuzuba bwatatu Josefa wakabaambila kuti, “Mebo ndimuntu uukomba Leza. Lino inga mwakonzya kufutula buumi bwanu kuti naa mwacita eeci. 19Kuti kamusyomeka ncobeni inga kwasyaala buyo omwe wanu muntolongo, nywebo nobamwi mulainka mutole cilyo ncomwaula kumikwasyi yanu iifwa nzala. 20Muleelede kuyoomweeta ooyo musyoonto wanu kulindime kuti ndizoozibe kuti mwali kwaamba zyabwini, caba boobo tamuzoojaigwi.” Abalo bakaazumina makani aaya. 21Lino bakalyaambauzya muli cabo beni kuti, “Iiyi, twajana mulandu nkaambo kaceciya ncitwakacita kumusyoonto wesu. Twabona mapenzi mapati ngaakajisi ciindi naakali kutukumbila kuti tumuleke, pele taakwe nitwakamuswiilila. Nkakaambo aaka katunjizya mumapenzi aaya.” 22Mpoonya Lubeni wakati, “Tee ndakamwaambila kuti mutamujayi mulombe, pele taakwe nimwakandiswiilila pe. Aboobo lino mapenzi aalufu lwakwe atuboolela.” 23Lino Josefa wakalimvwide nzyobakali kwaambaula, pele balo taakwe nibakaziba, nkaambo naakali kwaambaula kulimbabo kwakali asikupandulula. 24Mpoonya Josefa wakabasiya, wakaya kumbali waakulila. Eelyo naakakonzya kwaambaula kulimbabo alimwi, wakaboola, wazoobweza Simiyoni akumwaanga kabalangilila.

Bapati ba Josefa mbubakabweeda ku Kenani

25Lino Josefa wakalailila kuti masaka aabo baazuzye amaila, akuti mali aumwi wabo abweedezegwe musaka lyakwe, akuti bapegwe cakuyoolya mulweendo. Zyoonse eezi zyakacitwa. 26Lino aabo babunyina bakabikka mikuli yacilyo ncobakaula ambongolo zyabo, eelyo bakainka. 27Lino nibakaakusika kubusena ooko nkobakaakulala, umwi wabo wakajalula saka lyakwe kuti asanine kambongolo, nkabela wakajana mali aakwe musaka. 28Eelyo wakaita banabokwabo akuti kulimbabo, “Basa! mebo mali aangu ngaaya musaka!” Mpoonya lyakabaleka. Bakalangana mukuyoowa kupati akubuzyanya kuti, “Ino ninzi Leza ncaatucitila boobu?”

29Lino nibakaakusika kuli Jakobo wisi ku Kenani, bakaakumwaambila zintu zyoonse zyakacitika kulimbabo, bakati, 30“Mweendelezi wacisi wakatutapatila cabukali, akututamizya kuti tuli basikutwela.” 31Pele twakamwaambila kuti, “Swebo tuli bantu basyomeka, tatuli basikutwela pe. 32Tuli babunyina bali kkumi ababili antoomwe, bana bamuntu omwe. Umwi wesu taciwo, alimwi musyoonto wesu wakasyaala ataata ku Kenani!” 33Lino walo mweendelezi wacisi, wakatwiingula kuti, “Mboobu mbwenga ndaziba kuti muli bantu baluleme. Omwe wanu asyaale andime, nywebo nobamwi mutole cakulya kumikwasyi yanu iifwa nzala, mweende kamuya. 34Mukamweete kulindime musyoonto wanu, mpaanga ndizooziba kuti tamuli basikutwela pe, pele muli bantu baluleme. Ndizoomupilusya mwanookwanu, anywebo muyookonzya kusambala kabotu mucisi.”

35Lino nibakasukumuna cakulya mumasaka aabo, mali aaumwi aumwi akajanika musaka lyakwe. Nibakabona mali aabo, boonse awisi bakayoowa. 36Nkabela Jakobo wisi wakati kuli mbabo, “Mwandilobya nketakwe abana pe. Josefa taciwo, awalo Simiyoni tawo, ono muyanda kuti mutole Benjamini. Ino ono andilimba mapenzi.”

37Eelyo Lubeni wakaambila wisi kuti, “Kuti naa intakamupilusyi Benjamini kuli nduwe, ukajaye bana bangu balombe bobilo. Ndimutole, ndiyoomubamba akumuleta alimwi.”

38Pele Jakobo wakati, “Nsikoomuzuminzya mwanaangu kuunka ayebo, mupati wakwe wakafwa, walo alikke buyo nguusyeede. Ambweni awalo akajaigwe munzila. Cakuti uyoondicita kuti ndikafwe amause ndemudaala.”

Currently Selected:

Matalikilo 42: Tonga96

Highlight

Copy